പാരീസ്: ഫ്രഞ്ച് തലസ്ഥാനത്തിന്റെ പ്രാന്തപ്രദേശത്തുണ്ടായ മാരകമായ വെടിവെയ്പ്പ് രാജ്യത്തെ പിടിച്ചുലച്ച “വംശീയ ഭീകരാക്രമണം” ആണെന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ പ്രഖ്യാപിച്ചു. ഫ്രാൻസിന്റെ ചരിത്രത്തിൽ വംശീയമായ കാരണങ്ങളാൽ ഇത്തരമൊരു കൂട്ടക്കൊല ഇതിനുമുമ്പ് ഉണ്ടായിട്ടില്ലെന്നും, ഇത് റിപ്പബ്ലിക്കിന്റെ ജീവനിലെ വലിയൊരു “വഴിത്തിരിവാണെന്നും” അദ്ദേഹം വിശേഷിപ്പിച്ചു. ആക്രമണം നടന്ന ട്രാപ്സ് പ്രദേശം നേരിട്ട് സന്ദർശിച്ചാണ് മാക്രോൺ നിലപാട് വ്യക്തമാക്കിയത്. ജനങ്ങളുടെ ചർമ്മത്തിന്റെ നിറവും മതവും നോക്കിയാണ് അക്രമി ലക്ഷ്യമിട്ടതെന്നും, വംശീയ വിദ്വേഷം വളർത്തുന്ന ആശയങ്ങൾക്ക് മുന്നിൽ രാജ്യം ഒരടിപോലും പിന്നോട്ട് പോകില്ലെന്നും അദ്ദേഹം ഉറപ്പിച്ചു പറഞ്ഞു.
അതേസമയം, സംഭവവുമായി ബന്ധപ്പെട്ട് ഫ്രഞ്ച് നാഷണൽ ആന്റി ടെററിസ്റ്റ് പ്രൊസിക്യൂട്ടർ ഓഫീസിന്റെ നേതൃത്വത്തിൽ അന്വേഷണം ഊർജിതമാക്കിയിട്ടുണ്ട്. കുടിയേറ്റ പശ്ചാത്തലമുള്ളവരെ ലക്ഷ്യമിട്ട് കാറിൽ സഞ്ചരിച്ച് തുരുതുരാ വെടിയുതിർത്ത കെവിൻ ടി (39) എന്ന പ്രതിയെക്കുറിച്ചുള്ള കൂടുതൽ വിവരങ്ങൾ പുറത്തുവന്നു. മുൻപ് നാല് തവണ ഇയാൾ ശിക്ഷിക്കപ്പെട്ടിട്ടുണ്ടെങ്കിലും അവയെല്ലാം നിയമപരമായി റദ്ദാക്കപ്പെട്ടവയായിരുന്നു. എന്നാൽ, ഫ്രഞ്ച് രഹസ്യാന്വേഷണ വിഭാഗത്തിന്റെ സുരക്ഷാ ഭീഷണിയുള്ളവരുടെ നിരീക്ഷണപ്പട്ടികയിൽ ഇയാൾ ഉൾപ്പെട്ടിരുന്നില്ല എന്നത് പൊലീസിനെ വെട്ടിലാക്കിയിട്ടുണ്ട്. പ്രതിയുടെ കുടുംബത്തിൽപ്പെട്ട മറ്റൊരാളെക്കൂടി പൊലീസ് നിലവിൽ കസ്റ്റഡിയിലെടുത്ത് ചോദ്യം ചെയ്തുവരികയാണ്.
ആക്രമണത്തിൽ പരിക്കേറ്റ അഞ്ചുപേരിൽ മൂന്നുപേരുടെ നില ഇപ്പോഴും അതീവ ഗുരുതരമായി തുടരുകയാണെന്നാണ് ഒടുവിലത്തെ വിവരം. ഇതിൽ എട്ട് തവണ വെടിയേറ്റ് അടിയന്തര ശസ്ത്രക്രിയയ്ക്ക് വിധേയയാക്കിയ 12 വയസ്സുകാരിയുടെ ജീവൻ രക്ഷിക്കാനുള്ള തീവ്രശ്രമത്തിലാണ് ഡോക്ടർമാർ. കുട്ടി ഹിജാബ് ധരിച്ചിരുന്നതിനാലാണ് ആക്രമിക്കപ്പെട്ടതെന്ന് മാതാവ് മാധ്യമങ്ങളോട് പറഞ്ഞു.
രണ്ടാം ലോകമഹായുദ്ധ കാലത്തെ പഴയ സെമി-ഓട്ടോമാറ്റിക് മാരകായുധം ഉപയോഗിച്ച് ജനങ്ങൾ തടിച്ചുകൂടിയ പെട്രോൾ പമ്പ്, മെഡിക്കൽ സെന്റർ, കളിസ്ഥലം എന്നിവിടങ്ങളിലാണ് പ്രതി 15 മിനിറ്റോളം കൂട്ടക്കൊലയ്ക്ക് ശ്രമിച്ചത്. ഭീകരവാദ നിരോധന നിയമപ്രകാരവും വംശീയ ഗൂഢാലോചനയ്ക്കും കേസെടുത്ത് പൊലീസ് അന്വേഷണം വ്യാപിപ്പിച്ചിട്ടുണ്ട്.
Macron condemns Paris shooting; condition of injured girl critical.
