വാഷിംഗ്ടൺ/ടെൽ അവീവ്: അമേരിക്കൻ പ്രസിഡൻ്റ് ഡോണൾഡ് ട്രംപ് ഇറാനുമായി ഒരു ‘മോശം കരാറിൽ’ ഏർപ്പെട്ടേക്കുമെന്ന ശക്തമായ ആശങ്ക പങ്കുവെച്ച് ഇസ്രായേൽ. ഇരുരാജ്യങ്ങളും തമ്മിൽ നിലനിൽക്കുന്ന യുദ്ധത്തിലേക്ക് നയിച്ച പ്രധാന സുരക്ഷാ പ്രശ്നങ്ങൾ പൂർണ്ണമായി പരിഹരിക്കുന്നതിന് മുൻപ് തന്നെ യു.എസ് ധൃതിപിടിച്ച് ധാരണയിലെത്തിയേക്കുമെന്നാണ് ഇസ്രായേൽ വൃത്തങ്ങൾ വ്യക്തമാക്കുന്നത്. പ്രമുഖ അന്താരാഷ്ട്ര വാർത്താ ഏജൻസിയായ സിഎൻഎൻ ആണ് ഇസ്രായേൽ ഉദ്യോഗസ്ഥരെ ഉദ്ധരിച്ച് ഈ വിവരം റിപ്പോർട്ട് ചെയ്തത്.
ഇറാൻ്റെ ആണവപദ്ധതികൾ ഭാഗികമായി നിലനിർത്തുകയും, എന്നാൽ ഇസ്രായേലിന് വലിയ ഭീഷണിയായ ബാലിസ്റ്റിക് മിസൈൽ പദ്ധതികൾ, മേഖലയിലെ മറ്റ് സായുധ ഗ്രൂപ്പുകൾക്ക് ഇറാൻ നൽകുന്ന പിന്തുണ എന്നിവയെക്കുറിച്ചുള്ള ചർച്ചകൾ ഒഴിവാക്കുകയും ചെയ്യുന്ന ഒരു കരാർ ഇസ്രായേൽ അംഗീകരിക്കില്ലെന്ന് ഔദ്യോഗിക വൃത്തങ്ങൾ അറിയിച്ചു. ഇത്തരം വിട്ടുവീഴ്ചകളോടെയുള്ള കരാറാണ് ഉണ്ടാകുന്നതെങ്കിൽ ഈ യുദ്ധം അപൂർണ്ണമായാണ് ഇസ്രായേൽ കണക്കാക്കുക.
യുദ്ധത്തിൻ്റെ പ്രാരംഭ ഘട്ടത്തിൽ ഇറാൻ്റെ ആണവനിലയങ്ങൾ പൂർണ്ണമായി തകർക്കുമെന്നും, മിസൈൽ പദ്ധതികൾ അവസാനിപ്പിക്കുമെന്നും ട്രംപ് അവകാശപ്പെട്ടിരുന്നു. എന്നാൽ യുദ്ധം 10 ആഴ്ചകൾ പിന്നിടുമ്പോൾ അമേരിക്കയുടെ നയതന്ത്ര ചർച്ചകളുടെ മുൻഗണനകൾ മാറിയിരിക്കുകയാണ്. നിലവിൽ യുറേനിയം സമ്പുഷ്ടീകരണവും, തന്ത്രപ്രധാനമായ ഹോർമുസ് കടലിടുക്ക് വീണ്ടും തുറക്കുന്നതും മാത്രമാണ് ചർച്ചകളുടെ പ്രധാന അജണ്ട. ബാലിസ്റ്റിക് മിസൈലുകളും സായുധ ഗ്രൂപ്പുകൾക്കുള്ള പിന്തുണയും ചർച്ചകളിൽ നിന്ന് പൂർണ്ണമായി ഒഴിവാക്കപ്പെട്ടതായി ഇസ്രായേൽ വ്യക്തമാക്കുന്നു. ഈ സാഹചര്യത്തിലാണ് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു ഇറാൻ്റെ യുറേനിയം സമ്പുഷ്ടീകരണമെന്ന ഏറ്റവും അടിയന്തരമായ ഭീഷണിക്ക് മേൽ മാത്രം ശ്രദ്ധ കേന്ദ്രീകരിക്കാൻ നിർബന്ധിതനായത്.
യു.എസും ഇറാനും തമ്മിലുള്ള ഈ ചർച്ചകൾ പരാജയപ്പെടുന്നതിനെയാണ് ഇസ്രായേൽ ഇപ്പോൾ സ്വാഗതം ചെയ്യുന്നത്. “ഇറാനുമായി യാതൊരു കരാറും ഉണ്ടാകാതിരിക്കുകയും, ഹോർമുസ് കടലിടുക്കിലെ ഉപരോധം തുടരുകയും, ഇറാന് മേൽ കൂടുതൽ സൈനിക പ്രഹരങ്ങൾ ഏൽക്കുകയും ചെയ്യുന്നതാണ് തങ്ങൾക്ക് താല്പര്യം,” എന്ന് ഒരു മുതിർന്ന ഇസ്രായേൽ ഉദ്യോഗസ്ഥൻ സിഎൻഎന്നിനോട് പറഞ്ഞു. എങ്കിലും അന്തിമ തീരുമാനം ട്രംപിൻ്റേതാണെന്ന് അദ്ദേഹം സമ്മതിക്കുന്നു. ഇറാൻ ചർച്ചകൾ നീട്ടിക്കൊണ്ടുപോയി നയതന്ത്ര കളി തുടർന്നാൽ വീണ്ടും യുദ്ധം രൂക്ഷമാകാനുള്ള സാധ്യതയും ഇസ്രായേൽ തള്ളിക്കളയുന്നില്ല.
Israel fears Trump will make a ‘bad deal’ with Iran; considers war incomplete
