ദോഹ/ടെഹ്റാൻ: അമേരിക്കയും ഇറാനും തമ്മിൽ നിലനിൽക്കുന്ന കടുത്ത സൈനിക സംഘർഷം ലഘൂകരിക്കുന്നതിനും ഇരുരാജ്യങ്ങളും തമ്മിലുള്ള ചർച്ചകൾ പുനരാരംഭിക്കുന്നതിനുമുള്ള നിർണ്ണായക നീക്കങ്ങളുമായി ഖത്തർ. ഇതിന്റെ ഭാഗമായി ഖത്തറിൽ നിന്നുള്ള പ്രത്യേക നയതന്ത്ര മധ്യസ്ഥ സംഘം ഇറാന്റെ തലസ്ഥാനമായ ടെഹ്റാനിൽ എത്തി ഉന്നത ഉദ്യോഗസ്ഥരുമായി കൂടിക്കാഴ്ച ആരംഭിച്ചതായി അന്താരാഷ്ട്ര മാധ്യമമായ സി.എൻ.എൻ റിപ്പോർട്ട് ചെയ്യുന്നു. അമേരിക്കയുമായി പൂർണ്ണമായി ഏകോപിപ്പിച്ചാണ് ഖത്തർ സംഘത്തിന്റെ ഈ അടിയന്തിര ഇറാൻ സന്ദർശനം ആസൂത്രണം ചെയ്തതെന്ന് ഈ നയതന്ത്ര നീക്കങ്ങളെക്കുറിച്ച് വ്യക്തമായ ധാരണയുള്ള ഒരു നയതന്ത്രജ്ഞൻ വെളിപ്പെടുത്തി.
കഴിഞ്ഞ ദിവസങ്ങളിൽ ഇരുരാജ്യങ്ങളും തമ്മിൽ നടന്ന ശക്തമായ മിസൈലാക്രമണങ്ങൾ നിലവിലുണ്ടായിരുന്ന യു.എസ്-ഇറാൻ കരാറുകളെ തകർക്കുന്ന ഘട്ടത്തിലേക്ക് എത്തിച്ചിരുന്നു. എന്നാൽ വെള്ളിയാഴ്ചയോടെ ഇരുപക്ഷത്തുനിന്നും പുതിയ ആക്രമണങ്ങൾ ഉണ്ടാകാത്തത് താൽക്കാലികമായ ശാന്തതയ്ക്ക് വഴിതുറന്നിട്ടുണ്ട്.
ഈ സാഹചര്യം മുതലെടുത്ത് ഇരുവിഭാഗത്തെയും വീണ്ടും ചർച്ചാ മേശയിലേക്ക് തിരിച്ചെത്തിക്കാനാണ് മധ്യസ്ഥർ ഇപ്പോൾ തീവ്രശ്രമം നടത്തുന്നത്. മേഖലയിലെ സൈനിക നീക്കങ്ങൾ കൂടുതൽ വഷളാകാതിരിക്കാനും നയതന്ത്ര ചർച്ചകൾക്ക് കൃത്യമായ സമയം അനുവദിക്കാനുമായി, ആക്രമണങ്ങൾക്ക് ശേഷം ബോധപൂർവ്വം സൈനിക നടപടികൾക്ക് താൽക്കാലിക വിരാമം നൽകുന്ന തന്ത്രമാണ് തങ്ങൾ സ്വീകരിക്കുന്നതെന്ന് ഒരു യു.എസ് ഉദ്യോഗസ്ഥനും നേരത്തെ വ്യക്തമാക്കിയിരുന്നു.
