ന്യൂയോർക്ക്/ബീജിംഗ്: അമേരിക്കയും ഇറാനും തമ്മിൽ നിലനിൽക്കുന്ന സൈനിക നീക്കങ്ങൾ അടിയന്തിരമായി അവസാനിപ്പിക്കണമെന്ന് ഐക്യരാഷ്ട്രസഭയുടെ രക്ഷാസമിതിയിൽ ചൈന ആവശ്യപ്പെട്ടു. സംഘർഷം ലഘൂകരിക്കുന്നതിനായി വിളിച്ചുചേർത്ത രക്ഷാസമിതിയുടെ അടിയന്തിര യോഗത്തിലാണ് യുഎന്നിലെ ചൈനയുടെ ഡെപ്യൂട്ടി പ്രതിനിധി സൺ ലീ ഇരുരാജ്യങ്ങളോടും ശത്രുത അവസാനിപ്പിക്കാൻ ആഹ്വാനം ചെയ്തത്. ഇരുപക്ഷവും തമ്മിലുള്ള വെടിനിർത്തൽ കരാർ അതേപടി നിലനിർത്തേണ്ടത് മേഖലയുടെ സമാധാനത്തിന് അത്യന്താപേക്ഷിതമാണെന്ന് അദ്ദേഹം ഓർമ്മിപ്പിച്ചു.
പരസ്പര പ്രാദേശിക അഖണ്ഡതയും പരമാധികാരവും ബഹുമാനിക്കുമെന്ന് ധാരണാപത്രത്തിന്റെ ഭാഗമായി അമേരിക്കയും ഇറാനും സമ്മതിച്ചിട്ടുള്ളതാണെന്നും അത് കർശനമായി പാലിക്കപ്പെടണമെന്നും ചൈനീസ് പ്രതിനിധി വ്യക്തമാക്കി. ഇറാനെതിരെ ഏർപ്പെടുത്തിയിട്ടുള്ള അന്താരാഷ്ട്ര ഉപരോധങ്ങൾ പൂർണ്ണമായും നീക്കണമെന്നും ശരിയും തെറ്റും തിരിച്ചറിഞ്ഞുള്ള ശരിയായ നിലപാടാണ് ഈ ഘട്ടത്തിൽ ഉണ്ടാകേണ്ടതെന്നും ചൈന രക്ഷാസമിതിയിൽ ആവശ്യപ്പെട്ടു. ആണവായുധങ്ങൾ നിർമ്മിക്കില്ലെന്ന തങ്ങളുടെ മുൻ പ്രതിജ്ഞയോട് ഇറാൻ തുടർന്നും വിശ്വസ്തത പുലർത്തണം.
എന്നാൽ അതോടൊപ്പം തന്നെ സമാധാനപരമായ ആവശ്യങ്ങൾക്കായി സിവിൽ ആണവോർജ്ജം വികസിപ്പിക്കാനുള്ള പൂർണ്ണമായ അവകാശം ഇറാന് ഉണ്ടെന്നും ചൈനീസ് പ്രതിനിധി കൂട്ടിച്ചേർത്തു. നിലവിലെ പ്രതിസന്ധികൾ പരിഹരിക്കുന്നതിൽ ചൈനയ്ക്ക് എന്നും നിഷ്പക്ഷവും സ്ഥിരതയാർന്നതുമായ നിലപാടാണുള്ളതെന്നും മേഖലയിലെ സമാധാനപരമായ പ്രശ്നപരിഹാരത്തിനായി നിർണ്ണായകവും നിർമ്മിതിപരവുമായ പങ്ക് വഹിക്കാൻ ചൈന എപ്പോഴും പ്രതിജ്ഞാബദ്ധമാണെന്നും സൺ ലീ വ്യക്തമാക്കി.
