സമൂഹത്തിന്റെ ഐക്യവും പൊതുവായ മൂല്യങ്ങളും മുൻനിർത്തിയുള്ള കുടിയേറ്റ സംവിധാനത്തെ പിന്തുണച്ച് യുഎസ് വൈസ് പ്രസിഡന്റ് ജെ.ഡി. വാൻസ്. അമേരിക്കക്കാർക്ക് തങ്ങളുമായി പൊതുവായ താൽപര്യങ്ങളും മൂല്യങ്ങളുമുള്ളവർക്കൊപ്പം ജീവിക്കാൻ കഴിയണമെന്നും അദ്ദേഹം പറഞ്ഞു. തൊഴിൽ വിസകൾ ഉൾപ്പെടെയുള്ള കുടിയേറ്റ സംവിധാനങ്ങളിൽ ട്രംപ് ഭരണകൂടം പരിശോധന ശക്തമാക്കുന്നതിനിടെയാണ് വാൻസിന്റെ പ്രതികരണം.
ഒക്ടോബർ 17ന് സംപ്രേഷണം ചെയ്ത സിബിഎസ് ന്യൂസിന്റെ ടൗൺഹാൾ പരിപാടിയിലായിരുന്നു വാൻസിന്റെ പരാമർശം. മിഷിഗണിലെ വോട്ടർമാർ ട്രംപ് ഭരണകൂടത്തിന്റെ കുടിയേറ്റ നയങ്ങളെക്കുറിച്ചും ജീവിതച്ചെലവിനെക്കുറിച്ചും ഉന്നയിച്ച ചോദ്യങ്ങൾക്ക് മറുപടി നൽകുകയായിരുന്നു അദ്ദേഹം.
ചില എച്ച്-1ബി വിസക്കാരെ നേരത്തെ ‘വിദേശ അടിമത്തൊഴിലാളികൾ’ എന്ന് വിശേഷിപ്പിച്ചതിനെതിരായ വിമർശനങ്ങളിലും വാൻസ് പ്രതികരിച്ചു. വിദേശ തൊഴിലാളികളെയല്ല, അവരുടെ സാഹചര്യം മുതലെടുക്കുന്ന കമ്പനികളെയാണ് താൻ വിമർശിച്ചതെന്ന് അദ്ദേഹം വ്യക്തമാക്കി.
“എന്റെ പരാമർശങ്ങൾ അപൂർണമായിരുന്നെങ്കിൽ അതിന്റെ ഉത്തരവാദിത്തം എനിക്കാണ്,” വാൻസിനെ ഉദ്ധരിച്ച് സിബിഎസ് ന്യൂസ് റിപ്പോർട്ട് ചെയ്തു. അമേരിക്കൻ ജീവനക്കാരെ പിരിച്ചുവിടുന്നതിനൊപ്പം വിദേശ തൊഴിലാളികളെ നിയമിക്കുന്ന കമ്പനികളെയാണ് താൻ ലക്ഷ്യമിട്ടതെന്നും അദ്ദേഹം പറഞ്ഞു. ജോലി നഷ്ടപ്പെട്ടാൽ രാജ്യത്ത് തുടരാനുള്ള അനുമതിയെ ബാധിക്കുമെന്നതിനാൽ എച്ച്-1ബി വിസക്കാർ പലപ്പോഴും തൊഴിലുടമകളെ ആശ്രയിക്കേണ്ടിവരുന്ന സാഹചര്യമുണ്ടെന്നും വാൻസ് ചൂണ്ടിക്കാട്ടി.
കുടിയേറ്റക്കാരെ മനുഷ്യത്വരഹിതമായി ചിത്രീകരിക്കുകയല്ല തന്റെ ലക്ഷ്യമെന്നും അദ്ദേഹം പറഞ്ഞു. അതേസമയം, കുടിയേറ്റം ഒരു രാജ്യത്തിന്റെ സാമൂഹികവും സാംസ്കാരികവുമായ സ്വഭാവത്തിൽ മാറ്റങ്ങളുണ്ടാക്കാമെന്നും വാൻസ് അഭിപ്രായപ്പെട്ടു.
തൊഴിൽ അടിസ്ഥാനമാക്കിയുള്ള കുടിയേറ്റത്തിന് നിയന്ത്രണങ്ങൾ ശക്തമാക്കാനുള്ള ട്രംപ് ഭരണകൂടത്തിന്റെ നീക്കങ്ങൾക്കിടെയാണ് ഈ പ്രതികരണം. പ്രമുഖ സാങ്കേതിക കമ്പനികളുടെ പെർമനന്റ് ലേബർ സർട്ടിഫിക്കേഷൻ (PERM) നടപടികൾ മരവിപ്പിച്ചതും ഇതിന്റെ ഭാഗമാണ്. ഇതോടെ ചില വിദേശ ജീവനക്കാർക്കായി തൊഴിലുടമകൾ സ്പോൺസർ ചെയ്യുന്ന ഗ്രീൻ കാർഡ് അപേക്ഷകളുടെ നടപടികൾ മുന്നോട്ടുകൊണ്ടുപോകുന്നത് തടസ്സപ്പെട്ടിട്ടുണ്ട്.
അമേരിക്കൻ തൊഴിലാളികളുടെ താൽപര്യങ്ങൾ സംരക്ഷിക്കാനും കുടിയേറ്റ സംവിധാനത്തിന്റെ ദുരുപയോഗം തടയാനുമാണ് നിയന്ത്രണങ്ങളെന്നാണ് ഭരണകൂടത്തിന്റെ വിശദീകരണം. എന്നാൽ, പ്രത്യേക വൈദഗ്ധ്യമുള്ള തസ്തികകളിൽ അന്താരാഷ്ട്ര തലത്തിലുള്ള പ്രതിഭകളെ ആശ്രയിക്കേണ്ടതിന്റെ ആവശ്യകതയാണ് സാങ്കേതിക കമ്പനികൾ ചൂണ്ടിക്കാട്ടുന്നത്.
അമേരിക്കയിലുള്ള ഇന്ത്യൻ പ്രൊഫഷണലുകൾക്ക് ഈ നീക്കങ്ങൾ നിർണായകമാണ്. എച്ച്-1ബി വിസക്കാർക്ക് ജോലി തുടരുന്നതിനും പലപ്പോഴും ഗ്രീൻ കാർഡ് സ്പോൺസർഷിപ്പിനും തൊഴിലുടമകളെ ആശ്രയിക്കേണ്ടിവരും. അതിനാൽ കമ്പനികളുടെ നിയമനനയങ്ങളിലോ കുടിയേറ്റ ചട്ടങ്ങളിലോ ഉണ്ടാകുന്ന മാറ്റങ്ങൾ ഇവരുടെ ദീർഘകാല പദ്ധതികളെ ബാധിക്കാം.
JD Vance defends Trump’s immigration agenda, says Americans should share communities with like-minded people
