ന്യൂഡൽഹി: തമിഴ്നാട് രാഷ്ട്രീയത്തെ പിടിച്ചുലച്ചുകൊണ്ട് മുൻ ബിജെപി സംസ്ഥാന അധ്യക്ഷൻ കെ. അണ്ണാമലൈ ബിജെപിയിൽ നിന്ന് രാജിവെച്ചു. പാർട്ടിയുടെ പ്രാഥമിക അംഗത്വത്തിൽ നിന്നുള്ള അണ്ണാമലൈയുടെ രാജി ബിജെപി ദേശീയ അധ്യക്ഷൻ നിതിൻ നബീൻ ഔദ്യോഗികമായി അംഗീകരിച്ചതായി പാർട്ടി നേതൃത്വം വാർത്താക്കുറിപ്പിലൂടെ അറിയിച്ചു.
ഡൽഹിയിലെത്തിയ അണ്ണാമലൈ പാർട്ടി ദേശീയ അധ്യക്ഷൻ നിതിൻ നബീന് തൻ്റെ 5 പേജുള്ള രാജിക്കത്ത് കൈമാറുകയായിരുന്നു. രാജി സമർപ്പിക്കുന്നതിന് മുന്നോടിയായി കേന്ദ്ര ആഭ്യന്തര മന്ത്രി അമിത് ഷാ, ബിജെപി സംഘടനാ ജനറൽ സെക്രട്ടറി ബി.എൽ. സന്തോഷ് എന്നിവരുമായും അദ്ദേഹം നിർണ്ണായക കൂടിക്കാഴ്ചകൾ നടത്തിയിരുന്നു.
തമിഴ്നാട്ടിൽ പ്രാദേശിക പാർട്ടിയായ എഐഎഡിഎംകെയുമായി വീണ്ടും സഖ്യം ചേരാനുള്ള ബിജെപി കേന്ദ്ര നേതൃത്വത്തിൻ്റെ തീരുമാനത്തിലുള്ള ശക്തമായ വിയോജിപ്പാണ് രാജിയിലേക്ക് നയിച്ചതെന്നാണ് റിപ്പോർട്ടുകൾ. തമിഴ്നാട്ടിൽ ബിജെപിക്ക് തനതായ അടിത്തറയുണ്ടാക്കണമെന്ന നിലപാടുകാരനായിരുന്നു അണ്ണാമലൈ. എന്നാൽ സഖ്യരൂപീകരണത്തിൻ്റെ ഭാഗമായി അദ്ദേഹത്തെ സംസ്ഥാന അധ്യക്ഷ സ്ഥാനത്തുനിന്ന് മാറ്റിയതും, നിയമസഭാ തിരഞ്ഞെടുപ്പിലെ സ്ഥാനാർത്ഥി നിർണ്ണയത്തിലുള്ള അതൃപ്തിയും പാർട്ടി വിടാനുള്ള തീരുമാനത്തിന് ആക്കം കൂട്ടി.
ബിജെപി വിട്ട മുൻ ഐപിഎസ് ഉദ്യോഗസ്ഥൻ കൂടിയായ അണ്ണാമലൈ, തമിഴ്നാട്ടിൽ യുവാക്കളെയും പുതിയ വോട്ടർമാരെയും ലക്ഷ്യമിട്ട് ഒരു പുതിയ ‘ജനകീയ പ്രസ്ഥാനം’ ആരംഭിക്കുമെന്നാണ് അദ്ദേഹത്തോട് അടുത്ത വൃത്തങ്ങൾ നൽകുന്ന സൂചന. ഇത് പിന്നീട് ഒരു പുതിയ രാഷ്ട്രീയ പാർട്ടിയായി മാറ്റാനാണ് അദ്ദേഹത്തിൻ്റെ പദ്ധതി. തമിഴ് സ്വത്വത്തിനും അഴിമതി വിരുദ്ധ രാഷ്ട്രീയത്തിനും മുൻഗണന നൽകുന്നതായിരിക്കും ഈ പുതിയ പരീക്ഷണം. 2020-ൽ ബിജെപിയിൽ ചേർന്ന അണ്ണാമലൈ ചുരുങ്ങിയ കാലം കൊണ്ട് തമിഴ്നാട്ടിൽ പാർട്ടിയുടെ മുഖമായി മാറിയിരുന്നു. അദ്ദേഹത്തിൻ്റെ വമ്പിച്ച ജനസമ്പർക്ക പരിപാടികളും പദയാത്രകളും വലിയ ജനശ്രദ്ധ പിടിച്ചുപറ്റിയിരുന്നു. അണ്ണാമലൈയുടെ പെട്ടെന്നുള്ള ഈ പുറത്തുപോക്ക് തമിഴ്നാട്ടിലെ ബിജെപിയുടെ ഭാവി തന്ത്രങ്ങൾക്ക് വലിയ തിരിച്ചടിയാകുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. തൻ്റെ ഭാവി നിലപാടുകൾ വിശദീകരിക്കാൻ അണ്ണാമലൈ ഉടൻ തന്നെ മാധ്യമങ്ങളെ കാണുമെന്നാണ് പ്രതീക്ഷിക്കുന്നത്
K. Annamalai resigns from BJP,
