പ്രധാനമന്ത്രിയുടെ വസതിക്ക് മുന്നിൽ നടന്ന പ്രതിഷേധത്തിലടക്കം വിശദീകരണവുമായി കേന്ദ്ര സർക്കാരിനെതിരെ കടന്നാക്രമിച്ച് പ്രതിപക്ഷ നേതാവ് രാഹുൽ ഗാന്ധി. രാജ്യത്തെ വിദ്യാഭ്യാസ സമ്പ്രദായത്തെ പൂർണ്ണമായി തകർക്കുന്ന നയങ്ങളാണ് കേന്ദ്രം സ്വീകരിക്കുന്നതെന്ന് അദ്ദേഹം വിമർശിച്ചു. തിങ്കളാഴ്ച സി.ജെ.പി. പ്രതിഷേധത്തിനിടെ വിദ്യാർത്ഥികൾക്ക് നേരെ നടന്ന ക്രൂരമായ ലാത്തിച്ചാർജിന്റെയും പോലീസ് അതിക്രമങ്ങളുടെയും ദൃശ്യങ്ങൾ പ്രദർശിപ്പിച്ചുകൊണ്ടാണ് രാഹുൽ ഗാന്ധി വാർത്താസമ്മേളനം നടത്തിയത്. കേവലം കുറ്റവാളികളല്ലാത്ത വിദ്യാർത്ഥികൾ ചെയ്ത തെറ്റെന്താണെന്നും തങ്ങളുടെ പരാതികൾ കേൾക്കണമെന്ന് മാത്രമാണ് അവർ ആവശ്യപ്പെട്ടതെന്നും ചൂണ്ടിക്കാട്ടിയ അദ്ദേഹം, പ്രശസ്തമായിരുന്ന ഇന്ത്യൻ വിദ്യാഭ്യാസ മേഖല ഇന്ന് സങ്കീർണ്ണവും അഴിമതി നിറഞ്ഞതുമായി മാറിയെന്നും എ.ഐ.സി.സി. ആസ്ഥാനത്ത് കുറ്റപ്പെടുത്തി.
നീറ്റ് പരീക്ഷയുടേതടക്കം രാജ്യത്ത് ഇതുവരെ 152 പേപ്പർ ലീക്ക് സംഭവങ്ങളാണ് ഉണ്ടായിട്ടുള്ളതെന്ന് രാഹുൽ ഗാന്ധി ചൂണ്ടിക്കാട്ടി. ഇത് ഏഴരക്കോടിയോളം വിദ്യാർത്ഥികളുടെ ഭാവിയാണ് അനിശ്ചിതത്വത്തിലാക്കിയത്. ഇത്രയധികം തട്ടിപ്പുകൾ നടന്നിട്ടും കുറ്റക്കാർക്കെതിരെ യാതൊരു ശിക്ഷാ നടപടിയും ഉണ്ടായിട്ടില്ല. പരീക്ഷകൾക്കായി സർക്കാർ ബജറ്റിൽ വകയിരുത്തുന്ന തുകയിലും വലിയ തട്ടിപ്പുകളാണ് നടക്കുന്നത്. വിദ്യാർത്ഥികളുടെ കുടുംബങ്ങളെ കൊള്ളയടിക്കുന്ന ഇത്തരം നീക്കങ്ങൾക്ക് പിന്നിൽ ഒരു പ്രത്യേക സംഘം ആളുകൾ പ്രവർത്തിക്കുന്നുണ്ടെന്നും അദ്ദേഹം വാർത്താസമ്മേളനത്തിൽ ആരോപിച്ചു.
കേന്ദ്ര സർക്കാരിന് മുന്നിൽ മൂന്ന് സുപ്രധാന ആവശ്യങ്ങളാണ് പ്രതിപക്ഷ നേതാവ് മുന്നോട്ടുവെച്ചത്. വിദ്യാഭ്യാസ മന്ത്രിയായി തുടരാൻ ധർമ്മേന്ദ്ര പ്രധാൻ യോഗ്യനല്ലെന്നും അദ്ദേഹം അടിയന്തരമായി രാജിവെക്കണമെന്നതാണ് ആദ്യ ആവശ്യം. വിദ്യാഭ്യാസ മന്ത്രി രാജിവെക്കാതെ പ്രതിഷേധത്തിൽ നിന്ന് പിന്നോട്ടില്ലെന്ന് രാഹുൽ വ്യക്തമാക്കി. വിദ്യാർത്ഥികളെ ക്രൂരമായി ആക്രമിച്ച പോലീസ് നടപടിയിൽ പ്രധാനമന്ത്രി നരേന്ദ്ര മോദി രാജ്യത്തോടും വിദ്യാർത്ഥികളോടും മാപ്പ് പറയണമെന്നതാണ് രണ്ടാമത്തെ ആവശ്യം. സമരം ചെയ്ത വിദ്യാർത്ഥികളെ ക്രൂരമായി തല്ലിച്ചതച്ച പോലീസുകാർക്കെതിരെ കർശന നടപടി സ്വീകരിക്കണമെന്നതാണ് മൂന്നാമത്തെ ആവശ്യം.
പ്രധാനമന്ത്രിയുടെ വസതിക്ക് മുന്നിൽ നടന്ന പ്രതിഷേധത്തെക്കുറിച്ചും രാഹുൽ ഗാന്ധി വിശദീകരിച്ചു. വിദ്യാർത്ഥികളുടെ വിഷയത്തിൽ ചർച്ച ആവശ്യപ്പെട്ട് ലോക്സഭ സ്പീക്കറെ കണ്ടിരുന്നെങ്കിലും സർക്കാരിനോട് ആലോചിച്ച് മറുപടി പറയാമെന്നാണ് സ്പീക്കർ അറിയിച്ചത്. എന്നാൽ പിന്നീട് വ്യക്തമായ ഒരു മറുപടിയും ലഭിച്ചില്ല. അതിനാലാണ് വിദ്യാർത്ഥികളുടെ ആവശ്യങ്ങൾക്ക് പിന്തുണ പ്രഖ്യാപിച്ച് പ്രധാനമന്ത്രിയുടെ വസതിയിലേക്ക് പ്രതിഷേധവുമായി പോയതെന്ന് അദ്ദേഹം വ്യക്തമാക്കി. ചർച്ച വാഗ്ദാനം ചെയ്തിട്ടും രാഹുൽ നിലപാട് മാറ്റിയെന്ന കേന്ദ്രമന്ത്രി ജിതേന്ദ്ര സിംഗിന്റെ ആരോപണം തള്ളിയ രാഹുൽ, ഇത്തരം കാര്യങ്ങളിൽ ജിതേന്ദ്ര സിംഗ് അപ്രസക്തനാണെന്നും കൂട്ടിച്ചേർത്തു.
തനിക്കെതിരായ സർക്കാരിന്റെ വിമർശനങ്ങളെ ഗൗനിക്കുന്നില്ലെന്നും ഇത്തരം കാര്യങ്ങൾ കൊണ്ട് തന്നെ ഒന്നും ചെയ്യാനാവില്ലെന്നും രാഹുൽ ഗാന്ധി പറഞ്ഞു. പ്രതിഷേധത്തിനിടെ തന്നെ എന്ത് ചെയ്തു എന്നതിലല്ല, വിദ്യാർത്ഥികളുടെ പ്രശ്നങ്ങൾക്കാണ് മുൻഗണന നൽകുന്നത്. പോലീസിന്റെ ഉപദ്രവങ്ങൾ ഇപ്പോൾ തനിക്ക് പരിചിതമായിക്കഴിഞ്ഞു. വിദ്യാർത്ഥികളുടെ ന്യായമായ ആവശ്യങ്ങൾ അംഗീകരിക്കും വരെയും വിദ്യാഭ്യാസ മേഖലയെ തകർച്ചയിൽ നിന്ന് രക്ഷിക്കും വരെയും ശക്തമായ പ്രക്ഷോഭവുമായി മുന്നോട്ടുപോകുമെന്നും പ്രഖ്യാപിച്ചാണ് പ്രതിപക്ഷ നേതാവ് വാർത്താസമ്മേളനം അവസാനിപ്പിച്ചത്.
Rahul Gandhi Demands PM’s Apology and Education Minister’s Resignation Over Police Action on Students
