കാലടി ശ്രീശങ്കരാചാര്യ സംസ്‌കൃത സർവകലാശാലയിലെ വൈസ് ചാൻസലറും വിദ്യാർഥികളും തമ്മിലുള്ള തർക്കം കൂടുതൽ രൂക്ഷമാകുന്നു. സസ്പെൻഡ് ചെയ്ത വിദ്യാർഥികളെ പരീക്ഷയെഴുതിക്കാൻ അനുമതി നൽകിയ സിംഗിൾ ബെഞ്ച് ഉത്തരവിനെതിരെ വൈസ് ചാൻസലർ സിസ തോമസ് ഹൈക്കോടതിയിൽ അപ്പീൽ നൽകി. സമരത്തിൽ പങ്കെടുത്ത വിദ്യാർഥികൾക്ക് ആവശ്യമായ ഹാജർ ഇല്ലെന്നും, മതിയായ ഹാജറില്ലാത്തവരെ പരീക്ഷയെഴുതിക്കാൻ അനുവദിക്കില്ലെന്നുമാണ് വി.സിയുടെ നിലപാട്. സമരം ചെയ്തതിന്റെ പേരിൽ 16 വിദ്യാർഥികളാണ് കഴിഞ്ഞ 63 ദിവസമായി സർവകലാശാലയിൽ സസ്‌പെൻഷനിൽ തുടരുന്നത്.
അതേസമയം, വെബ്‌സൈറ്റ് തുറന്ന് ഫീസ് സ്വീകരിച്ച് പരീക്ഷ എഴുതാൻ അനുമതി നൽകണമെന്ന് കോടതി ഉത്തരവിട്ടിട്ടും അത് നടപ്പാക്കാത്തതിനെ തുടർന്ന് ശക്തമായ നിയമപോരാട്ടത്തിനൊരുങ്ങുകയാണ് വിദ്യാർഥികൾ. നിർദിഷ്ട സമയം കഴിഞ്ഞിട്ടും രജിസ്‌ട്രേഷന് സൗകര്യമൊരുക്കാത്ത സാഹചര്യത്തിൽ വൈസ് ചാൻസലർക്കും രജിസ്ട്രാർക്കുമെതിരെ നാളെ കോടതിയലക്ഷ്യ ഹർജി നൽകുമെന്ന് അവർ അറിയിച്ചു. ഇതിനൊപ്പം മൂന്ന് വിദ്യാർഥികൾ വീതം സർവകലാശാലയിൽ നാളെ മുതൽ നിരാഹാര സമരം ആരംഭിക്കുകയും ചെയ്യും. വിഷയത്തിൽ നിയമയുദ്ധം തുടരുമെന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദൻ വ്യക്തമാക്കി.
അതിനിടെ, വിദ്യാർഥികൾ സിസ തോമസിനെ ആക്രമിച്ചതിന് തെളിവില്ലെന്ന അന്വേഷണ സമിതി അംഗം ഡോ. കെ.എസ്. ജിനിതയുടെ റിപ്പോർട്ടിലെ കണ്ടെത്തലുകൾ എസ്.എഫ്.ഐ നേതാക്കൾ പുറത്തുവിട്ടു. സിസ തോമസ് അന്വേഷണത്തിൽ ഇടപെടാൻ ശ്രമിച്ചതായും വിദ്യാർഥികൾക്കെതിരെ തുട നടപടികൾക്ക് തെളിവില്ലെന്നും റിപ്പോർട്ടിലുണ്ട്. എന്നാൽ വിദ്യാർഥികൾക്കെതിരായ നടപടികളിൽ തീരുമാനം എടുക്കേണ്ടത് സർവകലാശാലയാണെന്നും ഇതിൽ സർക്കാർ ഇടപെടേണ്ടതില്ലെന്നുമാണ് ഉന്നതവിദ്യാഭ്യാസ മന്ത്രി റോജി എം. ജോൺ പ്രതികരിച്ചത്.
Kalady Varsity Row Deepens: VC Appeals High Court Order; Students to File Contempt Petition
