ടെഹ്റാൻ: അമേരിക്കയുമായും ഇസ്രായേലുമായും മാസങ്ങളായി തുടരുന്ന കടുത്ത സൈനിക ഏറ്റുമുട്ടലുകളെത്തുടർന്ന് രാജ്യം വലിയൊരു സാമ്പത്തിക തകർച്ചയെ നേരിടുന്നതിനിടയിൽ, ഇറാന് വൻതോതിൽ മാനുഷിക സഹായം എത്തിച്ചുനൽകി കസാക്കിസ്ഥാൻ. കസാക്കിസ്ഥാൻ പ്രസിഡന്റിന്റെ പ്രത്യേക നിർദ്ദേശപ്രകാരം അതിർത്തി കടന്നെത്തിയ 30 റെയിൽവേ വാഗണുകൾ നിറഞ്ഞ വമ്പൻ അടിയന്തര സഹായശേഖരം ഇറാന് കൈമാറിയതായി തസ്നിം വാർത്താ ഏജൻസി റിപ്പോർട്ട് ചെയ്തു.
ഇറാൻ-കസാക്കിസ്ഥാൻ അതിർത്തിയിലെ സരാഖ്സ് റെയിൽവേ സ്റ്റേഷനിൽ വെച്ച് നടന്ന ഔദ്യോഗിക ചടങ്ങിൽ കസാക്കിസ്ഥാൻ ഇന്റർനാഷണൽ ഡെവലപ്മെന്റ് ഏജൻസി അധികൃതർ ഈ സഹായ സാമഗ്രികൾ ഇറാനിയൻ റെഡ് ക്രെസന്റ് സൊസൈറ്റിക്ക് കൈമാറുകയായിരുന്നു. ടിന്നിലടച്ച ഇറച്ചി, പഞ്ചസാര, ഉയർന്ന ഗുണനിലവാരമുള്ള ഗോതമ്പ് മാവ്, അത്യാധുനിക മെഡിക്കൽ ഉപകരണങ്ങൾ, ജീവൻരക്ഷാ മരുന്നുകൾ എന്നിവയടക്കമുള്ള അത്യന്താപേക്ഷിതമായ സാധനങ്ങളാണ് ഈ ട്രെയിൻ മാർഗ്ഗം എത്തിച്ചിട്ടുള്ളത്.
ഇരുരാജ്യങ്ങളും തമ്മിലുള്ള ആഴത്തിലുള്ള നയതന്ത്ര സൗഹൃദം വെളിപ്പെടുത്തുന്നതായിരുന്നു ചടങ്ങിൽ കസാക്കിസ്ഥാൻ അംബാസഡർ ഒന്റാലപ് ഒനാൽബയേവ് നടത്തിയ പ്രസ്താവന. മിഡിൽ ഈസ്റ്റിലും ഇസ്ലാമിക ലോകത്തും കസാക്കിസ്ഥാന്റെ ഏറ്റവും പ്രധാനപ്പെട്ട രാഷ്ട്രീയ, സാമ്പത്തിക, മാനുഷിക പങ്കാളികളിൽ ഒന്നാണ് ഇറാനെന്ന് അദ്ദേഹം ചൂണ്ടിക്കാട്ടി. ‘ആപത്ഘട്ടങ്ങളിലാണ് യഥാർത്ഥ സുഹൃത്തുക്കളെ തിരിച്ചറിയാൻ സാധിക്കുക’ എന്ന് ഓർമ്മിപ്പിച്ച അദ്ദേഹം, ഇറാന്റെ മുൻകാല പ്രതിസന്ധികളിലെല്ലാം കസാക്കിസ്ഥാൻ ജനത ഒപ്പം നിന്നിട്ടുണ്ടെന്നും ഇനിയും അത് തുടരുമെന്നും വ്യക്തമാക്കി.
യുദ്ധത്തിന്റെ പശ്ചാത്തലത്തിൽ ഇറാൻ നേരിടുന്ന കടുത്ത ആഭ്യന്തര പ്രതിസന്ധികൾക്കിടയിലാണ് ഈ സഹായം എത്തിച്ചേരുന്നത് എന്നത് ഏറെ ശ്രദ്ധേയമാണ്. യുദ്ധം മൂലമുണ്ടായ വിതരണ തടസ്സങ്ങൾ കാരണം ഇറാന്റെ ഔദ്യോഗിക സ്ഥിതിവിവരക്കണക്കുകൾ പ്രകാരം രാജ്യത്തെ വാർഷിക പണപ്പെരുപ്പം 53.7 ശതമാനമായി കുതിച്ചുയർന്നിരിക്കുകയാണ്. സാധാരണക്കാരുടെ ജീവിതം ദുസ്സഹമാക്കിക്കൊണ്ട് ഭക്ഷണസാധനങ്ങളുടെ വില മുൻവർഷത്തെ അപേക്ഷിച്ച് 115 ശതമാനത്തിലധികമാണ് വർദ്ധിച്ചിരിക്കുന്നത്. ഈ സാഹചര്യത്തിൽ കസാക്കിസ്ഥാൻ നൽകിയ ഈ വലിയ പിന്തുണ ഇറാനിയൻ ജനതയ്ക്ക് താൽക്കാലികമായി വലിയൊരു ആശ്വാസമാകുമെന്നാണ് അന്താരാഷ്ട്ര മാധ്യമങ്ങൾ വിലയിരുത്തുന്നത്.
