വാഷിംഗ്‌ടൺ: ഫ്രാൻസിൽ വൻ ജനകീയ പ്രക്ഷോഭമായി മാറിയ ഹൈസ്കൂൾ വിദ്യാർത്ഥികളുടെ സമരത്തിന് പിന്നിൽ ഇസ്ലാമിക അധിനിവേശമാണെന്ന ഗുരുതര ആരോപണവുമായി യുഎസ് പ്രസിഡന്റ് ഡോണൾഡ് ട്രംപ്. ഫ്രാൻസിലെ വിദ്യാലയങ്ങളിൽ നിലനിൽക്കുന്ന മോശം അവസ്ഥയോ ഫണ്ടിന്റെ കുറവോ അല്ല ഇപ്പോഴത്തെ അശാന്തിക്ക് കാരണം, മറിച്ച് രാജ്യം പിടിച്ചെടുക്കാനുള്ള ഇസ്ലാമിന്റെ ശ്രമങ്ങളാണ് ഇതിന് പിന്നിലെന്ന് ട്രംപ് ആരോപിച്ചു.
ചൊവ്വാഴ്ച ഫ്രാൻസിലുടനീളം രണ്ടര ലക്ഷം ആളുകൾ തെരുവിലിറങ്ങി വൻ പ്രതിഷേധം രേഖപ്പെടുത്തിയതിന് തൊട്ടുപിന്നാലെയാണ് ട്രംപിന്റെ ഈ വിവാദ പരാമർശം. സ്വന്തം സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യൽ’ വഴിയിലൂടെയായിരുന്നു അദ്ദേഹത്തിന്റെ പ്രതികരണം.
“ഫ്രാൻസിൽ ഇപ്പോൾ സംഭവിച്ചുകൊണ്ടിരിക്കുന്നത് നിയന്ത്രണം വിട്ട കൂട്ടക്കുടിയേറ്റത്തിന്റെ ഫലമാണ്. ഇത് സ്കൂളുകളെക്കുറിച്ചുള്ള പ്രശ്നമല്ല. ഒരിക്കൽ മഹത്തായ ഒരു രാജ്യമായിരുന്ന ഫ്രാൻസിനെ ഇസ്ലാം കീഴടക്കാൻ ആഗ്രഹിക്കുന്നതിന്റെ ലക്ഷണമാണിത്,” ട്രംപ് കുറിച്ചു.
സ്കൂളുകളിലെ മോശം കെട്ടിടങ്ങൾ, ജീവനക്കാരുടെ കുറവ്, ഫണ്ടില്ലായ്മ എന്നിവ പരിഹരിക്കണമെന്ന് ആവശ്യപ്പെട്ട് കഴിഞ്ഞ സെപ്റ്റംബർ മുതൽ വിദ്യാർത്ഥികളും അധ്യാപകരും രക്ഷിതാക്കളും ഫ്രാൻസിൽ സമരത്തിലാണ്. പാരീസിലെ പിന്നാക്ക മേഖലകളിൽ തുടങ്ങി പിന്നീട് രാജ്യം മുഴുവൻ പടർന്ന സമരം ഇമ്മാനുവൽ മാക്രോൺ സർക്കാരിനെ വലിയ പ്രതിസന്ധിയിലാക്കിയിരിക്കുകയാണ്. എന്നാൽ, ഇത് കേവലം വിദ്യാഭ്യാസ പ്രശ്നമാണെന്ന വാദം പൂർണ്ണമായും തള്ളിക്കളയുകയാണ് ട്രംപ് ചെയ്തത്.
അടുത്ത മാസം യുഎസിൽ ഇടക്കാല തെരഞ്ഞെടുപ്പ് നടക്കാനിരിക്കെ, ട്രംപും റിപ്പബ്ലിക്കൻ പാർട്ടിയും തങ്ങളുടെ യാഥാസ്ഥിതിക വോട്ടർമാരെ സ്വാധീനിക്കാൻ കുടിയേറ്റ വിഷയം ശക്തമായി ഉയർത്തുന്നതിനിടയിലാണ് ഫ്രാൻസിലെ സംഭവവികാസങ്ങളെയും ഇതിലേക്ക് വലിച്ചിഴച്ചിരിക്കുന്നത്. ഫ്രാൻസിലെ കലാപം പാശ്ചാത്യ രാജ്യങ്ങൾക്കുള്ള വ്യക്തമായ മുന്നറിയിപ്പാണെന്ന് ട്രംപ് അനുകൂലികൾ വാദിക്കുന്നു.
അതേസമയം, ഫ്രാൻസിലെ പ്രക്ഷോഭങ്ങൾ പലയിടത്തും അക്രമാസക്തമായി തുടരുകയാണ്. സ്ട്രാസ്ബർഗ്, ലിയോൺ, റെന്നസ് തുടങ്ങിയ നഗരങ്ങളിൽ പ്രതിഷേധക്കാർ തീയിടുകയും പോലീസിന് നേരെ അക്രമം അഴിച്ചുവിടുകയും ചെയ്തു. പോലീസ് കണ്ണീർ വാതകം പ്രയോഗിച്ചാണ് ജനക്കൂട്ടത്തെ പിരിച്ചുവിട്ടത്. പ്രായപൂർത്തിയാകാത്ത വിദ്യാർത്ഥികൾക്ക് നേരെ പൊലീസ് ക്രൂരമായ ബലപ്രയോഗം നടത്തുന്നുവെന്ന് മനുഷ്യാവകാശ സംഘടനകൾ ആരോപിക്കുമ്പോൾ, സമരത്തിലേക്ക് പുറത്തുനിന്നുള്ള അക്രമകാരികൾ നുഴഞ്ഞുകയറി ക്രമസമാധാനം തകർക്കുകയാണെന്നാണ് ഫ്രഞ്ച് സർക്കാരിന്റെ വിശദീകരണം.
സമരത്തെ തുടർന്ന് രാജ്യത്തെ ആയിരക്കണക്കിന് സ്കൂളുകളുടെ പ്രവർത്തനം പൂർണ്ണമായോ ഭാഗികമായോ തടസ്സപ്പെട്ടിരിക്കുകയാണ്. ചോർന്നൊലിക്കുന്ന മേൽക്കൂരകളും എലിശല്യവുമുള്ള സ്കൂൾ കെട്ടിടങ്ങൾ നവീകരിക്കാതെ സമരത്തിൽ നിന്ന് പിന്മാറില്ലെന്ന നിലപാടിലാണ് വിദ്യാർത്ഥി യൂണിയനുകൾ.
Mass migration is the cause of school protests in France; Trump claims Islam is trying to conquer the country.
