കാലിഫോർണിയ: പ്രമുഖ അമേരിക്കൻ പോപ്പ്-റോക്ക് മ്യൂസിക് ബാൻഡായ MUNA സഞ്ചരിച്ചിരുന്ന ടൂർ ബസിന് ഹൈവേയിൽ വെച്ച് തീപിടിച്ചു. കാലിഫോർണിയയിലെ ബർബാങ്കിലുള്ള സൗത്ത്ബൗണ്ട് 5 ഫ്രീവേയിൽ വെച്ചായിരുന്നു സംഭവം. ബാൻഡിലെ പ്രധാന അംഗങ്ങളായ കാറ്റി ഗാവിൻ, നവോമി മക്ഫെർസൺ, ജോസെറ്റ് മാസ്കിൻ എന്നിവരടക്കം ബസിലുണ്ടായിരുന്ന എല്ലാവരും പരിക്കുകളൊന്നുമില്ലാതെ അത്ഭുതകരമായി രക്ഷപ്പെട്ടു.
തങ്ങളുടെ ‘ഗെറ്റ്സ് സോ ഹോട്ട് ടൂറിന്റെ’ ഭാഗമായി സ്റ്റാൻഫോർഡിലെ സംഗീത പരിപാടി കഴിഞ്ഞ് മടങ്ങുമ്പോഴായിരുന്നു അപകടം. ബസിന്റെ പിൻഭാഗത്താണ് ആദ്യം തീപിടുത്തമുണ്ടായത്. തുടക്കത്തിൽ ഡ്രൈവർ വിവരം അറിഞ്ഞിരുന്നില്ലെങ്കിലും, പുക ഉയർന്നതോടെ ബസ് ഹൈവേയിൽ നിർത്തി യാത്രക്കാരെ ഉടനടി പുറത്തിറക്കുകയായിരുന്നു. തുടർന്ന് ബർബാങ്ക് ഫയർഫോഴ്‌സ് സ്ഥലത്തെത്തിയാണ് തീ പൂർണ്ണമായും അണച്ചത്.
തങ്ങൾ എല്ലാവരും സുരക്ഷിതരാണെന്നും എന്നാൽ വ്യക്തിപരമായ പല സാധനങ്ങളും സംഗീതോപകരണങ്ങളും തീപിടുത്തത്തിൽ നശിച്ചുപോയെന്നും ബാൻഡ് അംഗങ്ങൾ ഔദ്യോഗിക ഇൻസ്റ്റാഗ്രാം പേജിലൂടെ ആരാധകരെ അറിയിച്ചു. തീപിടുത്തത്തിന്റെ കൃത്യമായ കാരണം കണ്ടെത്താൻ കാലിഫോർണിയ ഹൈവേ പെട്രോൾ അന്വേഷണം ആരംഭിച്ചിട്ടുണ്ട്. അപകടമുണ്ടായെങ്കിലും മുൻകൂട്ടി നിശ്ചയിച്ചിട്ടുള്ള അടുത്ത സംഗീത പരിപാടികളുമായി മുന്നോട്ട് പോകാനാണ് ബാൻഡിന്റെ തീരുമാനം.
Music band ‘MUNA’s tour bus caught fire in California; members had a miraculous escape.
