വാഷിംഗ്ടൺ: യുഎസിലെ ഒറിഗോണിൽ നവദമ്പതികളുടെ മരണത്തിനിടയാക്കിയ ട്രെയിലർ ട്രക്ക് അപകടക്കേസിൽ ഇന്ത്യൻ പൗരനായ രാജീന്ദർ കുമാറിനെ (32) വിചാരണയ്ക്കായി ഒറിഗോൺ സ്റ്റേറ്റ് കസ്റ്റഡിക്ക് കൈമാറി. യുഎസ് ഇമിഗ്രേഷൻ ആൻഡ് കസ്റ്റംസ് എൻഫോഴ്‌സ്‌മെന്റ് ആണ് ഇക്കാര്യം ഔദ്യോഗികമായി വ്യക്തമാക്കിയത്. ഫസ്റ്റ് ഡിഗ്രി മനഃപൂർവമല്ലാത്ത നരഹത്യ, അശ്രദ്ധമായി മറ്റുള്ളവരുടെ ജീവൻ അപകടപ്പെടുത്തൽ തുടങ്ങിയ ഗുരുതരമായ കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്.
2025 നവംബറിലാണ് കേസിനാസ്പദമായ അപകടം നടക്കുന്നത്. തുടർന്ന് പ്രാദേശിക പൊലീസ് അറസ്റ്റ് ചെയ്ത ഇയാളെ ഡെഷൂട്ട്സ് കൗണ്ടി ജയിലിലേക്ക് മാറ്റിയിരുന്നു. ഇയാളെ വിട്ടയക്കരുതെന്ന ഇമിഗ്രേഷൻ വിഭാഗത്തിന്റെ കർശന നിർദ്ദേശം മറികടന്ന് 2026 ഏപ്രിലിൽ കൗണ്ടി അധികൃതർ ഇയാളെ ജാമ്യത്തിൽ മോചിപ്പിച്ചു. തുടർന്ന് നടത്തിയ വ്യാപക തിരച്ചിലിനൊടുവിലാണ് ഒളിവിലായിരുന്ന കുമാറിനെ ഇമിഗ്രേഷൻ വിഭാഗം വീണ്ടും പിടികൂടുന്നത്. നിലവിൽ ഫെഡറൽ തടങ്കലിലായിരുന്ന ഇയാളെ, അടുത്ത വർഷം ജനുവരിയിൽ നടക്കാനിരിക്കുന്ന വിചാരണയ്ക്കായി ഇപ്പോൾ ഡെഷൂട്ട്സ് കൗണ്ടി ജയിലിലേക്ക് മാറ്റിയിരിക്കുകയാണ്.
2022 നവംബർ 28-ന് മെക്സിക്കോ അതിർത്തി വഴി അനധികൃതമായി അമേരിക്കയിലേക്ക് കടക്കാൻ ശ്രമിക്കുന്നതിനിടെയാണ് അരിസോണയിൽ വെച്ച് അതിർത്തി രക്ഷാസേന ഇയാളെ ആദ്യം പിടികൂടുന്നത്. തുടർന്ന് ഇയാൾക്കെതിരെ രാജ്യം കടത്തുന്നതിനുള്ള നിയമനടപടികൾ പുരോഗമിക്കുകയായിരുന്നു. ഇതിനിടെയാണ് യുഎസ് ഹൈവേ 20-ൽ വെച്ച് ഇയാൾ ഓടിച്ചിരുന്ന സെമി-ട്രക്ക് നിയന്ത്രണം വിട്ട് റോഡിന് കുറുകെ കിടക്കുകയും, ഈ ട്രക്കിലേക്ക് കാർ വന്നിടിച്ച് വൻ ദുരന്തം സംഭവിക്കുകയും ചെയ്തത്.
അപകടത്തിൽ കാറിലുണ്ടായിരുന്ന വില്യം മിക്ക കാർട്ടർ, ജെന്നിഫർ ലിൻ ലോവർ എന്നിവരാണ് മരണപ്പെട്ടത്. വിവാഹം കഴിഞ്ഞ് വെറും 16 ദിവസങ്ങൾ മാത്രം പിന്നിട്ട ഈ ദമ്പതികൾ ഹണിമൂൺ യാത്ര കഴിഞ്ഞു മടങ്ങുന്നതിനിടെയാണ് അപകടത്തിൽപ്പെട്ടത്.
ICE transferred Rajinder Kumar, a criminal illegal alien from India, to Oregon state custody to face prosecution in connection with the deaths of two newlywed Americans.Kumar has been indicted in Deschutes County, Ore., on 2 counts of first-degree manslaughter and other related charges stemming from a deadly November 2025 tractor-trailer accident.After his local arrest, ICE lodged an immigration detainer with the Deschutes County Jail, but in April 2026, Deschutes County released Kumar from custody without honoring ICE’s detainer. ICE officers subsequently located and arrested Kumar at large earlier this year.Following the conclusion of state criminal proceedings, ICE will pursue Kumar’s immigration case consistent with federal law.
— U.S. Immigration and Customs Enforcement (@ICEgov) October 18, 2026
കുമാറിനെതിരെയുള്ള ഒറിഗോൺ കോടതിയിലെ വിചാരണ നടപടികൾ പൂർത്തിയായ ശേഷം ഇയാൾക്കെതിരെയുള്ള ഇമിഗ്രേഷൻ കേസുകൾ ഫെഡറൽ നിയമപ്രകാരം തുടർന്ന് കൈകാര്യം ചെയ്യുമെന്നും അതിനുശേഷം നാടുകടത്തുമെന്നും യുഎസ് അധികൃതർ വ്യക്തമാക്കി.
Vehicle accident in the US that claimed the lives of a newlywed couple: Indian driver, who had been in hiding, handed over to Oregon police for trial.
