കണ്ണൂർ വാണിയപ്പാറ ഇൻഫൻ്റ് ജീസസ് ചർച്ചിലെ കല്ലറയിൽ ഒരു മൃതദേഹത്തിന് പുറമെ ദുരൂഹ സാഹചര്യത്തിൽ മറ്റൊരു വസ്തു കൂടി കണ്ടെത്തിയത് വലിയ പരപ്പരപ്പ് സൃഷ്ടിച്ചു. കല്ലറ തുറന്നപ്പോൾ പായയിൽ പൊതിഞ്ഞ നിലയിൽ മറ്റൊരു രൂപം കണ്ടെത്തുകയായിരുന്നു. ഇത് രണ്ടാമതൊരു മൃതദേഹമാണെന്ന ശക്തമായ സംശയത്തെ തുടർന്ന് കരിക്കോട്ടക്കരി പോലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്. ഒരു നാട്ടുകാരൻ സമൂഹമാധ്യമത്തിൽ പങ്കുവെച്ച കുറിപ്പിലൂടെയാണ് ഈ വിവരം ആദ്യം പുറംലോകമറിഞ്ഞത്.
ക്രിസ്ത്യൻ മതവിശ്വാസപ്രകരണവും ആചാരപ്രകാരവും ഒരു കല്ലറയിൽ ഒരേസമയം രണ്ട് മൃതദേഹങ്ങൾ അടക്കം ചെയ്യാറില്ലെന്ന് സംഭവം പുറത്തുവിട്ട നാട്ടുകാരനായ ജിൽസ് ഉണ്ണിമാക്കൽ പറഞ്ഞു. കല്ലറയിൽ അസ്വാഭാവികമായി എന്തോ ഉണ്ടെന്ന് മനസ്സിലാക്കിയപ്പോഴാണ് താൻ ഫേസ്ബുക്കിൽ പോസ്റ്റിട്ടതെന്നും, ഈ രഹസ്യം നേരത്തെ അറിഞ്ഞിരുന്ന ചിലർ ഇത് പുറത്തുപറയാൻ തയ്യാറായിരുന്നില്ലെന്നും അദ്ദേഹം ആരോപിച്ചു. എന്നാൽ പായയിൽ പൊതിഞ്ഞ രൂപം കണ്ട് ദുരൂഹത തോന്നിയ ഉടൻ തന്നെ പള്ളിക്കമ്മിറ്റിയാണ് പോലീസിനെ വിവരമറിയിച്ചതെന്ന് വികാരി ഫാ. ജിൽബർട്ട് കൊന്നയിൽ വ്യക്തമാക്കി.
കണ്ടെത്തിയ വസ്തു പണ്ട് പോസ്റ്റ്മോർട്ടം ചെയ്ത ശേഷം അടക്കം ചെയ്ത ഏതെങ്കിലും മൃതദേഹത്തിൻ്റെ അവശിഷ്ടങ്ങളാണോ എന്ന് സംശയമുണ്ടെന്നും വികാരി കൂട്ടിച്ചേർത്തു. കല്ലറയ്ക്കുള്ളിൽ കണ്ടെത്തിയ വസ്തു വിശദമായ പരിശോധനകൾക്കായി മാറ്റാനാണ് പോലീസിൻ്റെ തീരുമാനം. സംഭവത്തിൽ യാഥാർത്ഥ്യം പുറത്തുകൊണ്ടുവരാൻ പോലീസിൻ്റെ അന്വേഷണത്തോട് പൂർണ്ണമായി സഹകരിക്കുമെന്നും പള്ളി അധികൃതർ അറിയിച്ചിട്ടുണ്ട്.
Mystery at Kannur Vaniyappara Church as Second Body Suspected Inside Single Tomb; Police Launch Probe
