വാഷിംഗ്ടൺ: ബഹിരാകാശ ഗവേഷണ രംഗത്ത് അപൂർവ്വമായൊരു പ്രതിഭാസത്തിന് സാക്ഷ്യം വഹിക്കാൻ ഒരുങ്ങി ശാസ്ത്രലോകം. പ്രമുഖ അമേരിക്കൻ സ്വകാര്യ ബഹിരാകാശ ഏജൻസിയായ സ്പേസ് എക്സിൻ്റെ നിയന്ത്രണം വിട്ട ഫാൽക്കൺ 9 റോക്കറ്റിൻ്റെ ഒരു ഭാഗം ഇന്ന് ചന്ദ്രനിൽ ഇടിച്ചിറങ്ങും. ഇന്ത്യൻ സമയം ഉച്ചയ്ക്ക് 12:05-ഓടെയാകും (കിഴക്കൻ സമയം പുലർച്ചെ 2:35) ഈ ഇടി നടക്കുകയെന്നാണ് ശാസ്ത്രജ്ഞരുടെ കണക്കുകൂട്ടൽ.
ചന്ദ്രൻ്റെ പടിഞ്ഞാറൻ അതിർത്തിയിലുള്ള ‘ഐൻസ്റ്റൈൻ ക്രേറ്റർ’ എന്ന ഗർത്തത്തിന് സമീപമാണ് റോക്കറ്റ് പതിക്കുക. എന്നാൽ ഈ ആഘാതം കൊണ്ട് ഭൂമിക്കോ ചന്ദ്രനിലുള്ള മറ്റ് ഗവേഷണ ഉപകരണങ്ങൾക്കോ യാതൊരുവിധ ഭീഷണിയുമില്ലെന്ന് അമേരിക്കൻ ബഹിരാകാശ ഏജൻസിയായ നാസ വ്യക്തമാക്കിയിട്ടുണ്ട്.
2025 ജനുവരി 15-നാണ് ലൂണാർ ലാൻഡറുകളെ ചന്ദ്രനിലേക്ക് എത്തിക്കാൻ ഈ ഫാൽക്കൺ 9 റോക്കറ്റ് വിക്ഷേപിച്ചത്. ലാൻഡറുകളെ ഭ്രമണപഥത്തിൽ എത്തിച്ച ശേഷം, റോക്കറ്റിൻ്റെ രണ്ടാം ഘട്ടമായ ‘അപ്പർ സ്റ്റേജ്’ (Upper Stage) ബഹിരാകാശത്ത് ഉപേക്ഷിക്കപ്പെട്ടിരുന്നു. സാധാരണയായി ഇത്തരം ഭാഗങ്ങൾ ഭൂമിയുടെ അന്തരീക്ഷത്തിൽ കത്തിയമരുകയാണ് പതിവ്. എന്നാൽ ഇത്തവണ സൂര്യനിൽ നിന്നുണ്ടായ അമിത ഊർജ്ജ വ്യതിയാനങ്ങളും ബഹിരാകാശത്തെ ഗുരുത്വാകർഷണ ബലങ്ങളും കാരണം ഈ റോക്കറ്റ് ഭാഗം ചന്ദ്രൻ്റെ ഭ്രമണപഥത്തിലേക്ക് വഴുതിവീഴുകയായിരുന്നു.
ഏകദേശം 12 മീറ്റർ നീളവും 4,000 കിലോഗ്രാം ഭാരവുമുള്ള ഈ കൂറ്റൻ ലോഹക്കുഴൽ മണിക്കൂറിൽ 8,700 കിലോമീറ്റർ വേഗതയിലാണ് ചന്ദ്രൻ്റെ ഉപരിതലത്തിലേക്ക് കുതിക്കുന്നത്. ഇത് ശബ്ദത്തേക്കാൾ ഏഴ് ഇരട്ടി വേഗതയാണ്. ഇതൊരു അപ്രതീക്ഷിത അപകടമാണെങ്കിലും ശാസ്ത്രലോകം ഇതിനെ ഒരു വലിയ ഗവേഷണ അവസരമായാണ് കാണുന്നത്. മൂന്ന് ടൺ ടി.എൻ.ടി സ്ഫോടകവസ്തു പൊട്ടുന്നതിന് തുല്യമായ ആഘാതത്തിൽ ചന്ദ്രനിൽ 65 മുതൽ 100 അടി വരെ വീതിയുള്ള ഒരു പുതിയ കുഴി രൂപപ്പെടും.
ഇടിയുടെ ഫലമായി ലക്ഷക്കണക്കിന് കിലോഗ്രാം ചന്ദ്രമണ്ണും പൊടിയും ഉയരത്തിലേക്ക് തെറിക്കും. ചന്ദ്രനിൽ അന്തരീക്ഷമില്ലാത്തതിനാൽ ഈ പൊടിപടലങ്ങളിൽ സൂര്യപ്രകാശം തട്ടി തിളങ്ങും. ഭൂമിയിലെ വലിയ ടെലിസ്കോപ്പുകൾ ഉപയോഗിച്ച് ഇത് നിരീക്ഷിക്കുന്നതിലൂടെ ചന്ദ്രൻ്റെ ഉള്ളറകളിലെ രാസഘടകങ്ങളെക്കുറിച്ച് പഠിക്കാൻ സാധിക്കും.
നാസയുടെ ‘ആർട്ടെമിസ്’ പദ്ധതിയിലൂടെ മനുഷ്യനെ വീണ്ടും ചന്ദ്രനിൽ എത്തിക്കുമ്പോൾ, ഭാവിയിൽ അവിടെ നിർമ്മിക്കേണ്ട ബഹിരാകാശ വീടുകൾക്ക് എത്രത്തോളം പ്രതിരോധശേഷി വേണമെന്ന് കണക്കുകൂട്ടാൻ ഈ പഠനം സഹായിക്കും. ഭൂമിയിൽ നിന്നും നഗ്നനേത്രങ്ങൾ കൊണ്ട് ഈ ഇടി കാണാൻ സാധിക്കില്ല. റോക്കറ്റ് വീഴുന്ന ചന്ദ്രൻ്റെ ഭാഗത്ത് നിലവിൽ സൂര്യപ്രകാശമുള്ളതിനാൽ ഇടിയുടെ വെളിച്ചം തിരിച്ചറിയാൻ പ്രയാസമായിരിക്കും. എന്നാൽ ദക്ഷിണ കൊറിയയുടെ ‘ദനൂരി’ ഓർബിറ്ററും നാസയുടെ ‘ലൂണാർ റീകണൈസൻസ് ഓർബിറ്ററും’ ഈ പ്രദേശത്തിൻ്റെ ചിത്രങ്ങൾ പകർത്തി ഉടൻ തന്നെ പുറത്തുവിടുമെന്ന് അറിയിച്ചിട്ടുണ്ട്.
Out-of-control SpaceX rocket to crash into moon today; NASA says no threat to Earth
