ടെൽ അവീവ്: ഇസ്രയേൽ പൊതുതെരഞ്ഞെടുപ്പിന്റെ വോട്ടെണ്ണൽ അവസാന ഘട്ടത്തിലേക്ക് കടക്കുമ്പോൾ രാജ്യം വീണ്ടുമൊരു രാഷ്ട്രീയ അനിശ്ചിതത്വത്തിലേക്ക്. 90 ശതമാനത്തിലധികം വോട്ടുകൾ എണ്ണിത്തീരുമ്പോൾ പ്രധാനമന്ത്രി ബെഞ്ചമിൻ നെതന്യാഹുവിന്റെ ലികുഡ് പാർട്ടി ഏറ്റവും വലിയ ഒറ്റക്കക്ഷിയായി മുന്നേറുന്നുണ്ടെങ്കിലും, ഒരു മുന്നണിക്കും കേവല ഭൂരിപക്ഷം ലഭിക്കാത്ത സാഹചര്യമാണുള്ളത്. 120 അംഗങ്ങളുള്ള ഇസ്രയേൽ പാർലമെന്റായ നെസറ്റിൽ സർക്കാരുണ്ടാക്കാൻ 61 സീറ്റുകളാണ് വേണ്ടത്.
നിലവിലെ ട്രെൻഡുകൾ അനുസരിച്ച് നെതന്യാഹു നയിക്കുന്ന വലതുപക്ഷ ഭരണസഖ്യത്തിന് 53 സീറ്റുകൾ വരെ ലഭിച്ചേക്കാം. അതേസമയം ഗാഡി ഐസെൻകോട്ടിന്റെ നേതൃത്വത്തിലുള്ള പ്രതിപക്ഷ സഖ്യം 48 സീറ്റുകളുമായി തൊട്ടുപിന്നിലുണ്ട്. ഇത്തവണ മികച്ച പ്രകടനം കാഴ്ചവെച്ച അറബ് പാർട്ടികൾ 19 സീറ്റുകൾ വരെ നേടി നിർണായക ശക്തിയായി മാറിയിരിക്കുകയാണ്. ജൂത പാർട്ടികൾ അറബ് കൂട്ടായ്മകളുമായി സഖ്യമുണ്ടാക്കാൻ മടിക്കുന്നതിനാൽ, ഇവരുടെ നിലപാട് സർക്കാരുണ്ടാക്കുന്നതിൽ വലിയ പങ്കുവഹിക്കും.
സൈനികരുടെയും നയതന്ത്ര ഉദ്യോഗസ്ഥരുടെയും ഉൾപ്പെടെയുള്ള വോട്ടുകൾ എണ്ണിത്തീരുന്നതോടെ നവംബർ നാലിനായിരിക്കും ഔദ്യോഗിക ഫലപ്രഖ്യാപനം ഉണ്ടാകുക. അതിനുശേഷം ഇസ്രയേൽ പ്രസിഡന്റ് ഐസക് ഹെർസോഗ് വിവിധ പാർട്ടി നേതാക്കളുമായി ചർച്ച നടത്തുകയും, ഭൂരിപക്ഷം തെളിയിക്കാൻ സാധ്യതയുള്ള നേതാവിനെ സർക്കാർ രൂപീകരിക്കാൻ ക്ഷണിക്കുകയും ചെയ്യും. ഏറ്റവും വലിയ ഒറ്റക്കക്ഷിയെന്ന നിലയിൽ നെതന്യാഹുവിന് ആദ്യ അവസരം ലഭിച്ചേക്കാമെങ്കിലും, ഭരണം നിലനിർത്താൻ ചെറിയ പാർട്ടികളുമായി കടുത്ത സഖ്യചർച്ചകൾ നടത്തേണ്ടി വരും. ചർച്ചകൾ പരാജയപ്പെട്ടാൽ രാജ്യം വീണ്ടുമൊരു തിരഞ്ഞെടുപ്പിലേക്ക് നീങ്ങാനുമുള്ള സാധ്യത തള്ളിക്കളയാനാവില്ല.
അതേസമയം, തിരഞ്ഞെടുപ്പിൽ അറബ് പാർട്ടികൾ അട്ടിമറി നടത്തിയെന്ന് നെതന്യാഹുവിന്റെ ലികുഡ് പാർട്ടിയുടെ ആരോപണം. പൊലീസും തിരഞ്ഞെടുപ്പ് കമ്മിറ്റിയും അന്വേഷണം നടത്തണമെന്നും ആവശ്യപ്പെട്ടു.
Over 90% of votes counted; Netanyahu’s party leads in Israel, but lacks an absolute majority; allegations of an upset also emerge.
