വാഷിംഗ്ടൺ: കോവിഡ് മഹാമാരിയുടെ ഉത്ഭവത്തെക്കുറിച്ചും പ്രതിരോധ നടപടികളെക്കുറിച്ചുമുള്ള യുഎസ് സെനറ്റ് സമിതിയുടെ നിർണായക ചോദ്യം ചെയ്യലിൽ ഒരക്ഷരം പോലും മിണ്ടാതെ മുൻ പ്രമുഖ ആരോഗ്യ ഉപദേശകൻ ഡോ. ആൻ്റണി ഫൗചി. റിപ്പബ്ലിക്കൻ പാർട്ടി അംഗങ്ങൾ തന്നെ ബോധപൂർവ്വം കെണിയിൽപ്പെടുത്തി വ്യാജസാക്ഷ്യത്തിന് കേസെടുക്കാൻ ശ്രമിക്കുകയാണെന്ന് ആരോപിച്ചാണ് 85-കാരനായ ഫൗചി ചോദ്യങ്ങളിൽ നിന്ന് പൂർണ്ണമായി ഒഴിഞ്ഞുമാറിയത്.
തനിക്കെതിരെ ക്രിമിനൽ തെളിവായി മാറാൻ സാധ്യതയുള്ള ചോദ്യങ്ങളിൽ നിന്ന് മാറിനിൽക്കാൻ പൗരന്മാർക്ക് യുഎസ് നിയമം നൽകുന്ന സംരക്ഷണമായ ‘അഞ്ചാം ഭേദഗതി’ നൂറിലധികം തവണയാണ് മൂന്ന് മണിക്കൂർ നീണ്ട ഹിയറിംഗിൽ ഫൗചി പ്രയോഗിച്ചത്. റിപ്പബ്ലിക്കൻ സെനറ്ററായ ജോഷ് ഹാവ്ലി, ‘ഇന്ന് ഏത് ദിവസമാണ്’, ‘ധരിച്ചിരിക്കുന്ന ടൈയുടെ നിറമെന്താണ്’ എന്ന് തുടങ്ങിയ ലളിതമായ ചോദ്യങ്ങൾ ചോദിച്ചപ്പോൾ പോലും ഫൗചി ഭരണഘടനാപരമായ ഈ അവകാശം ഉന്നയിച്ച് മറുപടി നൽകാൻ വിസമ്മതിച്ചത് സഭയെ പ്രകോപിപ്പിച്ചു.
മുൻ പ്രസിഡൻ്റ് ജോ ബൈഡൻ തൻ്റെ കാലാവധി അവസാനിക്കും മുൻപ് ഫൗചിക്ക് 2014-25 കാലയളവിലെ ഔദ്യോഗിക പ്രവർത്തനങ്ങൾക്ക് മുൻകൂർ ഫെഡറൽ മാപ്പ് നൽകിയിരുന്നു. എന്നാൽ, ഈ മാപ്പ് ഇപ്പോൾ നടക്കുന്ന സെനറ്റ് കമ്മിറ്റിയോടുള്ള സമീപനങ്ങൾക്കോ പുതിയ മൊഴികൾക്കോ ബാധകമല്ല. സെനറ്റിന് മുൻപാകെ നൽകുന്ന മൊഴികളിൽ നേരിയ വൈരുദ്ധ്യം വന്നാൽ പോലും അത് വലിയ നിയമക്കുരുക്കായി മാറുമെന്നതിനാലാണ് അദ്ദേഹം മിണ്ടാതിരുന്നത്.
ഹിയറിംഗിന് നേതൃത്വം നൽകിയ റിപ്പബ്ലിക്കൻ സെനറ്റർ റാൻഡ് പോളിന് തന്നെ എങ്ങനെയെങ്കിലും ജയിലിലടക്കാൻ ‘ഭ്രാന്തമായ അഭിനിവേശം’ ഉണ്ടെന്ന് ഫൗചി തൻ്റെ പ്രസ്താവനയിൽ കുറ്റപ്പെടുത്തി. ഫൗചി മറുപടി നൽകിയില്ലെങ്കിലും റാൻഡ് പോൾ ചോദ്യം ചെയ്യൽ തുടരുകയും, കോൺഗ്രസിനെ അവഹേളിച്ച കുറ്റത്തിന് ഫൗചിക്കെതിരെ അടുത്ത ആഴ്ച സമിതിയിൽ വോട്ടെടുപ്പ് നടത്തുമെന്ന് പ്രഖ്യാപിക്കുകയും ചെയ്തു. ചോദ്യം ചെയ്യലിനിടെ നിയമപരമായ പോയിൻ്റുകൾ ഉന്നയിക്കാൻ ശ്രമിച്ച ഫൗചിയുടെ പ്രധാന അഭിഭാഷകൻ ഡേവിഡ് ഷെർട്ട്ലറെ റാൻഡ് പോൾ ഹാളിൽ നിന്നും പുറത്താക്കിയത് വലിയ തർക്കങ്ങൾക്ക് കാരണമായി.
ഹിയറിംഗിനിടെ പ്രസിഡൻ്റ് ഡോണൾഡ് ട്രംപ് സോഷ്യൽ മീഡിയയിലൂടെ ഫൗചിയെ രൂക്ഷമായി വിമർശിച്ചു. വൈറസ് ചൈനയിലെ വുഹാൻ ലാബിൽ നിന്നാണ് വന്നതെന്ന് താൻ ആദ്യം മുതലേ പറഞ്ഞിരുന്നതായും, ഫൗചി ചൈനയെ സംരക്ഷിക്കാൻ ശ്രമിച്ചതായും ട്രംപ് ആരോപിച്ചു. അതേസമയം കോവിഡിൻ്റെ തുടക്കകാലത്ത് ലാബ് ചോർച്ചയെക്കുറിച്ചും പ്രകൃതിദത്തമായ പരിണാമത്തെക്കുറിച്ചും ഫൗചിക്ക് രഹസ്യമായി തുറന്ന മനസ്സ് ഉണ്ടായിരുന്നുവെന്ന് വ്യക്തമാക്കുന്ന അദ്ദേഹത്തിൻ്റെ സ്വകാര്യ ഡയറി കുറിപ്പുകൾ റാൻഡ് പോൾ സഭയിൽ പുറത്തുവിട്ടു.
ഹിയറിംഗിന് പിന്നാലെ ഫ്ലോറിഡയിലെ റിപ്പബ്ലിക്കൻ അറ്റോർണി ജനറൽ ഫൗചിക്കെതിരെ ഔദ്യോഗിക അന്വേഷണം പ്രഖ്യാപിച്ചിട്ടുണ്ട്. അതേസമയം, ഹിയറിംഗ് ഫൗചിയെ ബോധപൂർവ്വം വേട്ടയാടാൻ വേണ്ടിയുള്ള രാഷ്ട്രീയ നാടകമാണെന്ന് പറഞ്ഞ് ഡെമോക്രാറ്റിക് പാർട്ടി അംഗങ്ങൾ അദ്ദേഹത്തെ ശക്തമായി പിന്തുണച്ചു.
Political battle in Covid hearing: Anthony Fauci fails to answer questions before US Senate committee; Dramatic scenes during questioning
