അബുദാബി: ഫ്ലൈദുബായ് വിമാനത്തിലെ കോക്ക്പിറ്റ് ആക്രമണത്തിൽ പരിക്കേറ്റ ക്യാപ്റ്റൻ സ്മിത് മച്ചാറിന്റെ ആരോഗ്യനില സംബന്ധിച്ച നിർണായക മെഡിക്കൽ റിപ്പോർട്ടുകൾ പുറത്തുവന്നു. ഒമാനി കോ-പൈലറ്റ് ഹമാം അൽ-ഹമ്മാമി കോടാലി ഉപയോഗിച്ച് നടത്തിയ ക്രൂരമായ ആക്രമണത്തിൽ ഇന്ത്യൻ പൈലറ്റായ സ്മിത് മച്ചാറിന്റെ തലയോട്ടിക്കും കൈക്കും ഗുരുതരമായി പരിക്കേറ്റിട്ടുണ്ട്. ക്യാപ്റ്റന്റെ ജീവനും കാഴ്ചശക്തിയും ഇല്ലാതാക്കുക എന്ന ലക്ഷ്യത്തോടെയാണ് ഈ വധശ്രമം നടന്നതെന്നാണ് വിവരം.
ആക്രമണത്തിൽ തലയോട്ടിക്ക് ക്ഷതമേൽക്കുകയും കാഴ്ചയുമായി ബന്ധപ്പെട്ട ഞരമ്പുകളെ ബാധിക്കുകയും ചെയ്തതിനെ തുടർന്ന് അദ്ദേഹത്തിന്റെ കാഴ്ച പൂർണ്ണമായും മങ്ങുന്ന അവസ്ഥയുണ്ടായി. ആദ്യഘട്ടത്തിൽത്തന്നെ കാഴ്ച തടസ്സപ്പെട്ടിട്ടും ആക്രമണത്തെ പ്രതിരോധിക്കാൻ ശ്രമിച്ചതായി ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായുള്ള സംഭാഷണത്തിനിടെ മച്ചാർ വെളിപ്പെടുത്തിയിരുന്നു. സൗദി അറേബ്യയിൽ വിമാനം അടിയന്തരമായി ഇറക്കി പ്രാഥമിക ചികിത്സ നൽകിയ ശേഷമാണ് വിദഗ്ധ ചികിത്സയ്ക്കായി അദ്ദേഹത്തെ യു.എ.ഇയിലേക്ക് മാറ്റിയത്.
ഗുരുതരമായ പരിക്കുകൾ ക്യാപ്റ്റന്റെ ഓർമ്മശക്തിയെയും ബാധിച്ചിട്ടുള്ളതിനാൽ സംഭവം നടന്ന സമയത്തെ കാര്യങ്ങൾ ഭാഗികമായി മാത്രമാണ് അദ്ദേഹത്തിന് ഓർത്തെടുക്കാൻ സാധിക്കുന്നത്. വീണ്ടും മാനസിക സമ്മർദ്ദമുണ്ടാകാതിരിക്കാൻ ആക്രമണത്തെക്കുറിച്ചുള്ള വിശദാംശങ്ങൾ അദ്ദേഹത്തോട് സംസാരിക്കുന്നത് ഒഴിവാക്കുകയാണെന്ന് ഭാര്യ സോണൽ മച്ചാർ അറിയിച്ചു. കഠിനമായ തലവേദന അനുഭവപ്പെടുന്നതിനാൽ ശക്തമായ വേദനസംഹാരികളും ഉറക്കമരുന്നുകളും നൽകുന്നതിനൊപ്പം നാഡീവ്യൂഹ സംബന്ധമായ പരിശോധനകളും നടന്നു വരികയാണ്.
നിലവിൽ അബുദാബിയിലെ പ്രത്യേക മെഡിക്കൽ കേന്ദ്രത്തിൽ ചികിത്സയിൽ കഴിയുന്ന സ്മിത് മച്ചാർ ഏതാനും അടികൾ നടക്കാനും ഭക്ഷണം കഴിക്കാനും തുടങ്ങി. യു.എ.ഇയിലെ അന്വേഷണ ഏജൻസികൾ അദ്ദേഹത്തിന്റെ പ്രാഥമിക മൊഴി രേഖപ്പെടുത്തിയിട്ടുണ്ട്. നിലവിൽ ലഭിക്കുന്ന മെഡിക്കൽ പരിചരണത്തിൽ കുടുംബം തൃപ്തി രേഖപ്പെടുത്തി.
Flydubai Attack: Captain Smith Machar Suffers Skull Fracture and Blurred Vision; Under Treatment in Abu Dhabi
