ന്യൂഡൽഹി: ചോദ്യപേപ്പർ ചോർച്ച കേസുകൾ കൈകാര്യം ചെയ്യാൻ അതിവേഗ കോടതികൾ സ്ഥാപിക്കുമെന്ന പ്രധാനമന്ത്രി നരേന്ദ്ര മോദിയുടെ പ്രഖ്യാപനത്തിനെതിരെ രംഗത്തെത്തി കോൺഗ്രസ് നേതാവ് രാഹുൽ ഗാന്ധി. സർക്കാർ വിദ്യാർത്ഥികളുടെ താല്പര്യം സംരക്ഷിക്കുകയാണെന്ന പ്രധാനമന്ത്രി മോദിയുടെ അവകാശവാദത്തെ എക്സിലെ കുറിപ്പിലൂടെ രാഹുൽ ഗാന്ധി തള്ളി. “നമ്മുടെ യുവാക്കളുടെ ഭാവി ഏറ്റവും കൂടുതൽ തകർത്തത് നിങ്ങളാണ്,” എന്ന് അദ്ദേഹം കുറിച്ചു.
രാജ്യത്തെ വിദ്യാഭ്യാസ സമ്പ്രദായം തകരാൻ സർക്കാർ അനുവദിച്ചതായി അദ്ദേഹം ആരോപിച്ചു. “നമ്മുടെ വിദ്യാഭ്യാസ സമ്പ്രദായത്തെ പൂർണ്ണമായി പിടിച്ചെടുക്കാനും നശിപ്പിക്കാനും നിങ്ങൾ അനുവദിക്കുകയും പ്രോത്സാഹിപ്പിക്കുകയും ചെയ്തു – അതിന് ഉത്തരവാദികളായ ഓരോ വ്യക്തിയെയും സംരക്ഷിക്കുകയും ചെയ്തു,” രാഹുൽ ഗാന്ധി പറഞ്ഞു.
പ്രതിഷേധിക്കുന്ന വിദ്യാർത്ഥികൾ ഉന്നയിച്ച മൂന്ന് ആവശ്യങ്ങൾ ലോക്സഭാ പ്രതിപക്ഷ നേതാവായ രാഹുൽ ഗാന്ധി വീണ്ടും ആവർത്തിച്ചു. ധർമ്മേന്ദ്ര പ്രധാനെ പുറത്താക്കുക, വിദ്യാർത്ഥികളോട് മാപ്പ് പറയുക, വിദ്യാർത്ഥികളെ മർദ്ദിച്ചവർക്കെതിരെ നടപടിയെടുക്കുക എന്നീ ആവശ്യങ്ങളാണ് രാഹുല് ഉയര്ത്തിയത്.
ചോദ്യപേപ്പർ ചോർച്ചയിൽ ഉൾപ്പെട്ടവർക്ക് വേഗത്തിലും കർശനവുമായ ശിക്ഷ ഉറപ്പാക്കാൻ ഫാസ്റ്റ് ട്രാക്ക് കോടതികൾ സ്ഥാപിക്കുമെന്ന് പ്രധാനമന്ത്രി മോദി പ്രഖ്യാപിച്ചതിന് തൊട്ടുപിന്നാലെയാണ് രാഹുൽ ഗാന്ധിയുടെ പരാമർശം.
നേരത്തെ എക്സിലെ പോസ്റ്റിൽ പ്രധാനമന്ത്രി മോദി കുറിച്ചത് ഇങ്ങനെയായിരുന്നു: “നമ്മുടെ യുവാക്കളുടെ ക്ഷേമത്തിനും ഭാവിക്കും ഉപരിയായി മറ്റൊന്നുമില്ല! ചോദ്യപേപ്പർ ചോർച്ചയിൽ ഉൾപ്പെട്ടവർക്ക് വേഗത്തിലും കർശനവുമായ ശിക്ഷ ഉറപ്പാക്കാൻ അതിവേഗ കോടതികൾ സ്ഥാപിക്കാൻ ഞങ്ങൾ തീരുമാനിച്ചിട്ടുണ്ട്.” വിദ്യാർത്ഥികളുടെ താല്പര്യങ്ങൾ സംരക്ഷിക്കുന്നതിനായി അധികാരികൾക്ക് ആവശ്യമായ എല്ലാ നടപടികളും സ്വീകരിക്കാൻ നിർദ്ദേശം നൽകിയിട്ടുണ്ടെന്നും, യുവാക്കളുടെ ഭാവി തകർക്കാൻ ശ്രമിക്കുന്നവരെ വെറുതെ വിടില്ലെന്നും അദ്ദേഹം കൂട്ടിച്ചേർത്തു.
ഈ പ്രഖ്യാപനത്തിൽ പ്രധാനമന്ത്രിക്കെതിരെ കോൺഗ്രസ് ജനറൽ സെക്രട്ടറി ജയറാം രമേശും വിമർശനം ഉന്നയിച്ചു. വിഷയം പാർലമെന്റിൽ ചർച്ച ചെയ്യാൻ പ്രധാനമന്ത്രി ഭയപ്പെടുകയാണെന്ന് അദ്ദേഹം പറഞ്ഞു. നടന്നുകൊണ്ടിരിക്കുന്ന പ്രതിഷേധങ്ങളിൽ നിന്നുള്ള സമ്മർദ്ദമാണ് പ്രധാനമന്ത്രിയുടെ സോഷ്യൽ മീഡിയ പോസ്റ്റിൽ നിഴലിക്കുന്നതെന്ന് അദ്ദേഹം അവകാശപ്പെട്ടു. “വോട്ട് ചോരണം, സീറ്റ് ചോരണം, ഫണ്ട് ചോരണം, പരീക്ഷാ പേപ്പർ ചോരണം… ഈ പട്ടിക നീണ്ടുപോകുന്നു,” എന്നും ജയറാം രമേശ് കുറിച്ചു.
നീറ്റ്ചോദ്യപേപ്പർ ചോർച്ച വിവാദത്തെക്കുറിച്ചുള്ള പ്രതിഷേധം ഡൽഹിയിലും മറ്റ് പല നഗരങ്ങളിലും തുടരുകയാണ്. കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജി, പേപ്പർ ചോർച്ചയ്ക്ക് കാരണക്കാരായവർക്കെതിരെ നടപടി, കേന്ദ്ര സർക്കാരിന്റെ മറുപടിയും ഇടപെടലും ആവശ്യപ്പെട്ടാണ് സമരം പുരോഗമിക്കുന്നത്.
‘You are the ones who have destroyed the future of our youth the most’: Rahul Gandhi responds to PM’s fast-track court announcement; raises 3 demands again
