ന്യൂഡല്ഹി: അയോധ്യ രാമക്ഷേത്ര നിര്മാണത്തിനായി ലഭിച്ച സംഭാവനകളില് മോഷണം നടന്നെന്ന ആരോപണത്തില് പ്രധാനമന്ത്രി നരേന്ദ്ര മോദിക്കെതിരെ രൂക്ഷവിമര്ശനവുമായി കോണ്ഗ്രസ് നേതൃത്വം. വിഷയത്തില് പ്രധാനമന്ത്രി പുലര്ത്തുന്ന മൗനം ‘അംഗീകരിക്കാനാകില്ല’ എന്ന് ചൂണ്ടിക്കാട്ടി ലോക്സഭയിലെ പ്രതിപക്ഷ നേതാവ് രാഹുല് ഗാന്ധിയും കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയും പ്രധാനമന്ത്രിക്ക് സംയുക്തമായി കത്തയച്ചു.
ശ്രീരാമ ജന്മഭൂമി തീര്ത്ഥക്ഷേത്ര ട്രസ്റ്റിന്റെ മുന് ജനറല് സെക്രട്ടറി ചമ്പത് റായ് ഒരു ‘അപമാനമാണെന്ന്’ കത്തില് വിശേഷിപ്പിച്ച നേതാക്കള്, അദ്ദേഹം പ്രധാനമന്ത്രിയുടെ അടുത്ത അനുയായി ആയിരുന്നുവെന്നും ഓര്മ്മിപ്പിച്ചു.
ഇത്തരം ഒരു ഗുരുതരമായ കുറ്റകൃത്യം നടന്നിട്ടും പ്രധാനമന്ത്രി മൗനം പാലിക്കുന്നത് ശരിയല്ല. സംഭവത്തില് കൃത്യമായ അന്വേഷണം നടത്തി കുറ്റക്കാരെ കണ്ടെത്തേണ്ടത് സര്ക്കാരിന്റെ കടമയാണ്. പണം, സ്വര്ണം, വെള്ളി എന്നിവയുള്പ്പെടെ ക്ഷേത്രത്തിലേക്ക് ലഭിച്ച മുഴുവന് വഴിപാടുകളും കൈകാര്യം ചെയ്തതില് വലിയ ക്രമക്കേട് നടന്നിട്ടുണ്ട്. ഇതിനെക്കുറിച്ച് അടിയന്തരമായി ഒരു സ്വതന്ത്രവും സമഗ്രവുമായ അന്വേഷണം പ്രഖ്യാപിക്കണം. ട്രസ്റ്റിന്റെ സാമ്പത്തിക ഇടപാടുകളെക്കുറിച്ചുള്ള കണ്ടെത്തലുകളും അക്കൗണ്ട് വിവരങ്ങളും പൊതുജനങ്ങള്ക്ക് മുന്നില് വെളിപ്പെടുത്തണം. തങ്ങള് നല്കിയ കണ്ട്രീബ്യൂഷനുകള് എങ്ങനെയാണ് വിനിയോഗിക്കപ്പെട്ടതെന്ന് അറിയാന് ഓരോ ഭക്തനും അവകാശമുണ്ടെന്നും കത്തില് വ്യക്തമാക്കുന്നു. ‘ഇത്തരം ഒരു കുറ്റകൃത്യത്തിന് മുന്നില് നിങ്ങളുടെ ഇപ്പോഴത്തെ മൗനം അംഗീകരിക്കാനാകില്ല. ഇതില് ഉത്തരവാദിത്തവും നഷ്ടപരിഹാരവും ഉറപ്പാക്കേണ്ടത് നിങ്ങളുടെ കടമയാണ്.’- കത്തില് ചൂണ്ടിക്കാട്ടുന്നു.
പാര്ലമെന്റിന്റെ വര്ഷകാല സമ്മേളനം ആരംഭിക്കാനിരിക്കെയാണ് പ്രതിപക്ഷ നേതാക്കള് ഈ വിഷയം ഉയര്ത്തി പ്രധാനമന്ത്രിക്ക് കത്തയച്ചിരിക്കുന്നത്. വരും ദിവസങ്ങളില് പാര്ലമെന്റില് ഈ വിഷയം വലിയ രാഷ്ട്രീയ ചര്ച്ചകള്ക്ക് വഴിവെച്ചേക്കും.
Ram Mandir donation theft: PM’s silence unacceptable, Rahul and Kharge write to Modi
