യൂറോപ്പിൽ കടുത്ത ഉഷ്ണതരംഗം: ഇറ്റലിയിൽ റെഡ് അലർട്ട്, ഓസ്ട്രിയയിലും സ്ലൊവാക്യയിലും സർവകാല റെക്കോർഡ് ചൂട്

റോം/ബർലിൻ: യൂറോപ്യൻ രാജ്യങ്ങളിൽ കടുത്ത ഉഷ്ണതരംഗം ജനജീവിതം സ്തംഭിപ്പിക്കുന്നു. ചൂട് 40 ഡിഗ്രി സെൽഷ്യസ് കടന്നതോടെ ഇറ്റലി രാജ്യവ്യാപകമായി അതീവ ജാഗ്രതാ നിർദ്ദേശം (റെഡ് അലർട്ട്) പുറപ്പെടുവിച്ചു. ഓസ്ട്രിയ, സ്ലൊവാക്യ എന്നീ രാജ്യങ്ങളിൽ ചരിത്രത്തിലെ ഏറ്റവും ഉയർന്ന താപനിലയാണ് കഴിഞ്ഞ ദിവസങ്ങളിൽ രേഖപ്പെടുത്തിയത്. കടുത്ത ചൂടിനെത്തുടർന്ന് വനങ്ങളിൽ തീ പടരുന്നതും ജലാശയങ്ങളിലെ ജലനിരപ്പ് താഴുന്നതും ഊർജ്ജോത്പാദനത്തെയും ഗതാഗതത്തെയും വിനോദസഞ്ചാര മേഖലയെയും പ്രതികൂലമായി ബാധിച്ചിട്ടുണ്ട്.

ചരിത്രത്തിലാദ്യമായി ഇറ്റലിയിലെ 27 പ്രധാന നഗരങ്ങളെയും ഉൾപ്പെടുത്തി ആരോഗ്യ മന്ത്രാലയം റെഡ് അലർട്ട് പ്രഖ്യാപിച്ചു. സാധാരണയായി മുതിർന്നവർക്കും രോഗികൾക്കും മാത്രം നൽകാറുള്ള ഈ മുന്നറിയിപ്പ് ഇത്തവണ പ്രായഭേദമന്യേ എല്ലാവർക്കും ബാധകമാക്കിയിട്ടുണ്ട്. ഉച്ചയ്ക്ക് ശേഷം ആളുകൾ പുറത്തിറങ്ങരുതെന്നും ധാരാളം വെള്ളം കുടിക്കണമെന്നും അധികൃതർ നിർദ്ദേശിച്ചു. ചരിത്രസ്മാരകമായ കൊളോസിയത്തിൽ വിനോദസഞ്ചാരികൾക്കായി തണുത്ത വെള്ളം തളിക്കുന്ന മിസ്റ്റ് ഫാനുകളും പ്രത്യേക മെഡിക്കൽ സ്റ്റേഷനുകളും സ്ഥാപിച്ചു. റോമിലെ ടൈബർ നദിക്കരയിൽ ജനങ്ങൾക്ക് ആശ്വാസമേകാൻ നീന്തൽക്കുളങ്ങളും തണലിടങ്ങളുമുള്ള സൗജന്യ ‘അർബൻ ബീച്ചും’ നഗരസഭ തുറന്നിട്ടുണ്ട്.

ഓസ്ട്രിയയിലെ ബാഡ് ഡോയ്ച്ച്-ആൾട്ടൻബർഗിൽ താപനില ചരിത്രത്തിലാദ്യമായി 41.2 ഡിഗ്രി സെൽഷ്യസിലെത്തി. തൊട്ടടുത്ത ദിവസം സ്ലൊവാക്യയിലെ ഡോൾനെ പ്ലാക്റ്റിൻസെയിൽ 42.2 ഡിഗ്രി സെൽഷ്യസ് ചൂടാണ് രേഖപ്പെടുത്തിയത്. ഇരു രാജ്യങ്ങളുടെയും ചരിത്രത്തിലെ ഏറ്റവും ഉയർന്ന താപനിലയാണിത്. ഡാന്യൂബ് നദിയിലെ ജലനിരപ്പ് റെക്കോർഡ് അളവിൽ താഴ്ന്നതോടെ സ്ലൊവാക്യയിലെ ഏറ്റവും വലിയ ജലവൈദ്യുത നിലയമായ ഗാബ്ചിക്കോവോയിലെ 8 ടർബൈനുകളിൽ 7 എണ്ണവും നിർത്തിവച്ചു.

ആണവനിലയം തണുപ്പിക്കാൻ ഡാന്യൂബ് നദിയിലെ വെള്ളത്തെ ആശ്രയിക്കുന്ന ഹംഗറിയിൽ ഉത്പാദനം 10 ശതമാനമായി ചുരുങ്ങി. ഇതേത്തുടർന്ന് രാജ്യം കടുത്ത ഊർജ്ജ നിയന്ത്രണത്തിലേക്ക് നീങ്ങുകയാണ്. വൈകുന്നേരങ്ങളിൽ വൈദ്യുതി ഉപയോഗം കുറയ്ക്കാൻ ജനങ്ങളോട് സർക്കാർ ആവശ്യപ്പെട്ടു. ബുഡാപെസ്റ്റിലെ അലങ്കാര വിളക്കുകൾ അണയ്ക്കുകയും ചരക്ക് ട്രെയിൻ സർവീസുകൾക്ക് നിയന്ത്രണം ഏർപ്പെടുത്തുകയും ചെയ്തിട്ടുണ്ട്.

ജർമ്മനിയിലെ റൈൻ നദിയിലെ ജലനിരപ്പ് താഴുന്നത് ഉൾനാടൻ കപ്പൽ ഗതാഗതത്തെയും വ്യവസായങ്ങളെയും ബാധിക്കുമെന്ന് മുന്നറിയിപ്പുണ്ട്. തെക്കുകിഴക്കൻ ഫ്രാൻസിൽ 60 ചതുരശ്ര കിലോമീറ്ററിലധികം വനം കവർന്ന വലിയ കാട്ടുതീ നിയന്ത്രണവിധേയമാക്കിയെങ്കിലും ശക്തമായ കാറ്റും വരും ദിവസങ്ങളിലെ വരണ്ട കാലാവസ്ഥയും വീണ്ടും തീ പടർത്തുമെന്ന ആശങ്കയിലാണ് അഗ്നിശമന സേന. ബാൽക്കൻ രാജ്യങ്ങളിലും സെർബിയയിലും താപനില 40 ഡിഗ്രിക്ക് അടുത്താണ്.

കാലാവസ്ഥാ വ്യതിയാനമാണ് ഇത്തരം തീവ്രമായ പ്രകൃതി പ്രതിഭാസങ്ങൾക്ക് കാരണമെന്നും ഇത് പൊതുജനാരോഗ്യം, അടിസ്ഥാന സൗകര്യങ്ങൾ എന്നിവയ്ക്ക് വലിയ ഭീഷണിയാണെന്നും ശാസ്ത്രജ്ഞർ മുന്നറിയിപ്പ് നൽകുന്നു.

Severe heatwave in Europe: Red alert in Italy, all-time record heat in Austria and Slovakia