ന്യൂഡൽഹി: അമേരിക്കൻ പ്രസിഡന്റ് ഡോണൾഡ് ട്രംപും ഇന്ത്യൻ പ്രധാനമന്ത്രി നരേന്ദ്ര മോദിയും തമ്മിൽ നടത്തിയ ഫോൺ സംഭാഷണം വളരെ മികച്ചതായിരുന്നുവെന്ന് ഇന്ത്യയിലെ യുഎസ് അംബാസഡർ സെർജിയോ ഗോർ വ്യക്തമാക്കി. കഴിഞ്ഞ ദിവസം നടന്ന ഇരുനേതാക്കളുടെയും ആശയവിനിമയത്തെക്കുറിച്ച് സോഷ്യൽ മീഡിയ പ്ലാറ്റ്‌ഫോമായ എക്സിലൂടെയാണ് അംബാസഡർ ഔദ്യോഗികമായി പ്രതികരിച്ചത്.
വ്യാപാരം, പ്രതിരോധം, ഊർജം, നിർണായക സാങ്കേതികവിദ്യകൾ തുടങ്ങിയ മേഖലകളിൽ ഇന്ത്യയും അമേരിക്കയും തമ്മിലുള്ള ഉഭയകക്ഷി സഹകരണം ഇരുനേതാക്കളും സമഗ്രമായി വിലയിരുത്തി. പ്രാദേശികവും അന്തർദേശീയവുമായ വിവിധ വിഷയങ്ങളും ആഗോള സമാധാനത്തിനായുള്ള സംയുക്ത ശ്രമങ്ങളും ചർച്ചകളിൽ ഇടംപിടിച്ചു.
ഇന്ത്യ-യുഎസ് സമഗ്ര ആഗോള തന്ത്രപ്രധാന പങ്കാളിത്തം കൂടുതൽ ശക്തിപ്പെടുത്താനും ഇരു രാജ്യങ്ങളിലെയും ജനങ്ങളുടെ ക്ഷേമത്തിനായി ഒരുമിച്ച് പ്രവർത്തിക്കാനും നേതാക്കൾ പ്രതിജ്ഞാബദ്ധത ആവർത്തിച്ചു. അടുത്ത വർഷം ആദ്യത്തോടെ യുഎസ് പ്രസിഡന്റിന്റെ ഇന്ത്യ സന്ദർശനം സാധ്യമാക്കുന്നതിനുള്ള ഒരുക്കങ്ങൾ ഇരുരാജ്യങ്ങളുടെയും ഉന്നത ഉദ്യോഗസ്ഥർക്കിടയിൽ പുരോഗമിക്കുന്നതായും റിപ്പോർട്ടുകളുണ്ട്. അതിനിടെ, ഉഭയകക്ഷി വ്യാപാര കരാറുമായി ബന്ധപ്പെട്ട ചർച്ചകൾ പുരോഗമിക്കുകയാണെന്നും ഇരുരാജ്യങ്ങളും തമ്മിൽ ധാരണയിലെത്തിയിട്ടുണ്ടെന്നും വിദേശകാര്യ മന്ത്രി എസ്. ജയശങ്കർ അറിയിച്ചു.
അതേസമയം, യുഎസ് കോൺഗ്രസ് അടുത്തിടെ പാസാക്കിയ ‘ലിൻഡ്സെ ഒ. ഗ്രഹാം സാങ്ഷനിങ് റഷ്യ ആൻഡ് ഇറാൻ ആക്ട് 2026’ (SRIA) വഴി മോസ്‌കോയിൽ നിന്നും എണ്ണ വാങ്ങുന്ന ഇന്ത്യ ഉൾപ്പെടെയുള്ള രാജ്യങ്ങൾക്ക് മേൽ 100 ശതമാനം വരെ അധിക താരിഫ് ചുമത്താനുള്ള സാഹചര്യം നിലനിൽക്കുന്നതിൽ ഇന്ത്യ തങ്ങളുടെ കടുത്ത ആശങ്ക യുഎസിനെ ഔദ്യോഗികമായി അറിയിച്ചു.
യുഎൻ പൊതുസഭയുടെ സമ്മേളനത്തിനിടെ ഇന്ത്യൻ വിദേശകാര്യ മന്ത്രി എസ്. ജയശങ്കർ യുഎസ് സ്റ്റേറ്റ് സെക്രട്ടറി മാർക്കോ റൂബിയോയുമായി നടത്തിയ കൂടിക്കാഴ്ചയിലാണ് ഈ വിഷയം ശക്തമായി ഉന്നയിച്ചത്. ഈ നിയമം ഇരുരാജ്യങ്ങളും തമ്മിലുള്ള തന്ത്രപ്രധാന ബന്ധങ്ങളെ ബാധിക്കുമെന്നും ആഗോള ഊർജ്ജ വിപണിയിൽ പ്രതിസന്ധികൾ സൃഷ്ടിക്കുമെന്നും ഇന്ത്യ ചൂണ്ടിക്കാട്ടി. രാജ്യത്തെ 140 കോടി ജനങ്ങളുടെ ഊർജ്ജ സുരക്ഷ ഉറപ്പാക്കുക എന്നത് രാജ്യത്തിന്റെ പരമാധികാര താല്പര്യമാണെന്ന് വിദേശകാര്യ മന്ത്രാലയം വ്യക്തമാക്കിയിട്ടുണ്ട്.
ഈയൊരു സങ്കീർണ്ണമായ പശ്ചാത്തലത്തിൽ കൂടിയാണ് പ്രധാനമന്ത്രി മോദിയും ട്രംപും തമ്മിലുള്ള ഫോൺ സംഭാഷണം നടന്നത് എന്നത് ശ്രദ്ധേയമാണ്.
A new chapter in India-US relations: Significant phone conversation between Trump and Modi; US Ambassador says cooperation in strategic sectors will be strengthened.
