ദോഹ: യുഎസ്-ഇസ്രായേൽ സഖ്യം ഇറാനുമായി നടത്തുന്ന യുദ്ധം ആറുമാസം പിന്നിടുമ്പോൾ, മരണപ്പെട്ടവരുടെയും പലായനം ചെയ്തവരുടെയും കണക്കുകൾ മുതൽ ആഗോള സമ്പദ്വ്യവസ്ഥയിലുണ്ടായ വൻ തകർച്ച വരെയുള്ള വിവരങ്ങൾ ക്രോഡീകരിച്ച് റിപ്പോർട്ട് പുറത്ത്. ഈ കാലയളവിലെ പ്രധാന കണക്കുകൾ താഴെ നൽകുന്നു:
മരണസംഖ്യ 7,900 കടന്നു
ഏറ്റവും പുതിയ ഔദ്യോഗിക കണക്കുകൾ പ്രകാരം, ഫെബ്രുവരി 28-ന് യുദ്ധം ആരംഭിച്ചതിന് ശേഷം ലെബനനിൽ 4,350 പേരും ഇറാനിൽ 3,527 പേരും ഗൾഫ് രാജ്യങ്ങളിൽ 28 പേരും കൊല്ലപ്പെട്ടതായി സ്ഥിരീകരിച്ചിട്ടുണ്ട്. മറുവശത്ത്, ഇറാൻ നടത്തിയ പ്രത്യാക്രമണങ്ങളിൽ ഇതുവരെ 60 ഇസ്രായേലികളും 18 അമേരിക്കൻ സൈനികരും കൊല്ലപ്പെട്ടിട്ടുണ്ട്. ഇതിനുപുറമേ 757 യു.എസ് സൈനിക ഉദ്യോഗസ്ഥർക്ക് പരിക്കേറ്റതായും പെന്റഗൺ വ്യക്തമാക്കിയിട്ടുണ്ട്. വിവിധ രാജ്യങ്ങളിലെ ആരോഗ്യ മന്ത്രാലയങ്ങളിൽ നിന്നും മറ്റ് ഔദ്യോഗിക ഏജൻസികളിൽ നിന്നും ശേഖരിച്ച വിവരങ്ങളുടെ അടിസ്ഥാനത്തിലാണ് ഈ കണക്കുകൾ തയ്യാറാക്കിയിട്ടുള്ളത്. യുദ്ധസാഹചര്യങ്ങൾ മാറുന്നതിനനുസരിച്ചും പുതിയ വിവരങ്ങൾ ലഭ്യമാകുന്നതിനനുസരിച്ചും ഈ കണക്കുകളിൽ മാറ്റം വന്നേക്കാം.
5,500-ലധികം ആക്രമണങ്ങൾ
അമേരിക്ക ആസ്ഥാനമായി പ്രവർത്തിക്കുന്ന യുദ്ധ നിരീക്ഷണ ഏജൻസിയായ ‘ആംഡ് കോൺഫ്ലിക്റ്റ് ലൊക്കേഷൻ ആൻഡ് ഇവന്റ് ഡാറ്റ പ്രൊജക്റ്റിന്റെ’ റിപ്പോർട്ട് അനുസരിച്ച്, ഫെബ്രുവരി 28 മുതൽ യു.എസും ഇസ്രായേലും ചേർന്ന് ഇറാനിൽ കുറഞ്ഞത് 3,580 ആക്രമണങ്ങളെങ്കിലും നടത്തിയിട്ടുണ്ട്. ഇതേ കാലയളവിൽ ഗൾഫ് മേഖലയിലുടനീളവും വിശാലമായ മിഡിൽ ഈസ്റ്റിലുമായി ഇറാൻ 2,053-ലധികം പ്രത്യാക്രമണങ്ങൾ നടത്തിയതായും കണക്കുകൾ വ്യക്തമാക്കുന്നു.
