ഇസ്രായേൽ ഭരണകൂടത്തിലെ ചിലർക്ക് അനിശ്ചിതകാല യുദ്ധത്തിലാണ് താല്പര്യം; ചർച്ചകളെ അട്ടിമറിക്കാൻ ശ്രമമെന്ന് ജെഡി വാൻസ്, സൈനിക നടപടികൾ കൊണ്ട് മാത്രം ഹോർമുസ് കടലിടുക്കിലെ സുരക്ഷ ഉറപ്പാക്കാനാകില്ല

വാഷിംഗ്ടൺ: ഇറാനുമായുള്ള യുഎസിന്റെ നയതന്ത്ര നീക്കങ്ങളെ അട്ടിമറിക്കാനും യുദ്ധം ‘അനിശ്ചിതമായി’ നീട്ടിക്കൊണ്ടുപോകാനും ഇസ്രായേൽ സർക്കാരിലെ ചില വിഭാഗങ്ങൾ ശ്രമിക്കുന്നതായി യുഎസ് വൈസ് പ്രസിഡന്റ് ജെഡി വാൻസ്. പ്രശസ്തമായ ‘ദി ജോ റോഗൻ എക്സ്പീരിയൻസ്’ പോഡ്കാസ്റ്റിൽ നൽകിയ അഭിമുഖത്തിലാണ് വാൻസ് ഇസ്രായേൽ സർക്കാരിലെ ചില നേതാക്കൾക്കെതിരെ കടുത്ത വിമർശനവുമായി രംഗത്തെത്തിയത്.

ഇറാനുമായുള്ള സമാധാന ചർച്ചകൾക്കെതിരെ അമേരിക്കൻ പൊതുജനങ്ങളുടെ മനസ്സ് മാറ്റാൻ ഇസ്രായേലിലെ ചില വ്യക്തികൾ ശ്രമിക്കുന്നുണ്ടെന്ന് വാൻസ് ആരോപിച്ചു. ഇറാൻ ആണവായുധം കൈക്കലാക്കുന്നത് തടയുന്നതിനൊപ്പം അമേരിക്കയുടെ താല്പര്യങ്ങൾ സംരക്ഷിച്ചുകൊണ്ട് ഒരു സമാധാന കരാറിലെത്തുക എന്ന പ്രസിഡന്റ് ഡൊണാൾഡ് ട്രംപിന്റെ ലക്ഷ്യത്തിനാണ് താൻ മുൻഗണന നൽകുന്നതെന്നും അദ്ദേഹം വ്യക്തമാക്കി.

ഇറാനുമായുള്ള ചർച്ചകൾ തകർക്കാൻ വളരെ രഹസ്യവും വലിയ തോതിൽ പണം മുടക്കിയുള്ളതുമായ ഒരു കാമ്പയിൻ നടക്കുന്നുണ്ടെന്ന് വാൻസ് അവകാശപ്പെട്ടു. നയതന്ത്ര നീക്കങ്ങളെ പിന്തുണച്ചതിന്റെ പേരിൽ ഈ വിഭാഗം തന്നെ വ്യക്തിപരമായി ലക്ഷ്യമിടുകയാണെന്നും അദ്ദേഹം പറഞ്ഞു.

“അമേരിക്കൻ പൊതുജന അഭിപ്രായത്തെ സ്വാധീനിക്കാനും യുദ്ധം അനിശ്ചിതമായി തുടരാനും ഇസ്രായേൽ ഭരണകൂടത്തിലെ ചിലർ ശ്രമിക്കുന്നുണ്ട് എന്നതിൽ യാതൊരു സംശയവുമില്ല,” വാൻസ് കൂട്ടിച്ചേർത്തു. മുൻ ട്രംപ് കാമ്പയിൻ ഉദ്യോഗസ്ഥനുമായി ബന്ധമുള്ള ചിലർക്ക് ഇസ്രായേൽ സർക്കാരിലെ ചില ഘടകങ്ങൾ പണം നൽകിയതായി അടുത്തിടെ ടൈം മാഗസിൻ പ്രസിദ്ധീകരിച്ച ലേഖനത്തിൽ വ്യക്തമാക്കുന്നുണ്ടെന്നും വാൻസ് ചൂണ്ടിക്കാട്ടി.

ഇറാനുമായി ചർച്ചകൾ നടത്തരുതെന്നും സൈനിക നടപടി അനിശ്ചിതമായി തുടരണമെന്നുമാണ് തന്നെ ആക്രമിക്കുന്നവരുടെ നിലപാടെന്ന് വാൻസ് പറഞ്ഞു. വിദേശ സ്വാധീന കാമ്പയിനുകളെക്കുറിച്ച് വായിച്ചറിഞ്ഞ ശേഷം തനിക്ക് അവരോട് പറയാനുള്ളത് “നരകത്തിൽ പോകൂ” എന്ന് മാത്രമാണെന്നും, താൻ എപ്പോഴും അമേരിക്കൻ ജനതയുടെ താല്പര്യങ്ങൾക്കാണ് മുൻഗണന നൽകുന്നതെന്നും അദ്ദേഹം വ്യക്തമാക്കി.

അതേസമയം, ഇസ്രായേലിന്റെ സമ്മർദ്ദം കൊണ്ടല്ല ട്രംപ് ഇറാനെതിരെ മുൻപ് സൈനിക നിലപാടുകൾ സ്വീകരിച്ചതെന്നും, ഇറാൻ ആണവായുധം നിർമ്മിക്കരുത് എന്നത് ട്രംപിന്റെ സ്വന്തം താല്പര്യമാണെന്നും വാൻസ് ഓർമ്മിപ്പിച്ചു. ഇസ്രായേൽ സർക്കാരിലെ എല്ലാവരും ചർച്ചകൾക്ക് വിരുദ്ധരല്ലെന്നും, അനിശ്ചിതകാല യുദ്ധം തങ്ങൾക്ക് ഗുണം ചെയ്യില്ലെന്ന് മനസ്സിലാക്കുന്ന നിരവധിപ്പേർ ഇസ്രായേൽ ഭരണകൂടത്തിലുണ്ടെന്നും അദ്ദേഹം പറഞ്ഞു. സൈനിക നടപടികൾ കൊണ്ട് മാത്രം ഹോർമുസ് കടലിടുക്കിലെ സുരക്ഷ ഉറപ്പാക്കാനാകില്ലെന്നും അതിന് ചർച്ചകൾ അനിവാര്യമാണെന്നും യുഎസ് വൈസ് പ്രസിഡന്റ് വ്യക്തമാക്കി.

Some in the Israeli government are interested in an indefinite war; JD Vance says they are trying to sabotage the talks