ബോസ്റ്റണിൽ നടക്കാനിറങ്ങിയ തെലങ്കാന സ്വദേശിനിയായ വിദ്യാർത്ഥിനിയെ കാണാനില്ല; സഹായം അഭ്യർത്ഥിച്ച് കുടുംബം

ബോസ്റ്റൺ: അമേരിക്കയിലെ ബോസ്റ്റണിൽ ഉപരിപഠനം നടത്തിവരികയായിരുന്ന 23 കാരിയായ ഇന്ത്യൻ വിദ്യാർത്ഥിനിയെ കാണാതായി. തെലങ്കാനയിലെ നൽഗൊണ്ട ജില്ലയിലുള്ള കനഗൽ മണ്ഡലത്തിലെ ശബ്ദുള്ളാപുരം സ്വദേശിനിയായ ശ്രീജ റെഡ്ഡിയെയാണ് കാണാതായത്. ഒരു വർഷം മുൻപ് യു.എസിൽ എത്തിയ ശ്രീജ ബോസ്റ്റണിലെ യുമാസ് സർവ്വകലാശാലയിലെ വിദ്യാർത്ഥിനിയാണ്. പഠനത്തോടൊപ്പം പാർട്ട് ടൈം ജോലിയും ചെയ്തുവരികയായിരുന്നു.

നവംബർ 2-ന് താമസസ്ഥലത്തുനിന്നും വൈകുന്നേരം നടക്കാനിറങ്ങിയ ശ്രീജയെ അതിനുശേഷമാണ് കാണാതാകുന്നത്. അന്നുമുതൽ ഇവരുടെ മൊബൈൽ ഫോണും സ്വിച്ച് ഓഫ് ചെയ്ത നിലയിലാണ്. പെൺകുട്ടിയെ കാണാനില്ലെന്ന് ചൂണ്ടിക്കാട്ടി നവംബർ 3-നാണ് സുഹൃത്തുക്കൾ പൊലീസിൽ പരാതി നൽകിയത്. തുടർന്ന് നവംബർ 4-ന് ബോസ്റ്റൺ പൊലീസ് ഡിപ്പാർട്ട്മെന്റ് ഔദ്യോഗികമായി പെൺകുട്ടിയെ കണ്ടെത്താൻ പൊതുജനങ്ങളുടെ സഹായം അഭ്യർത്ഥിച്ചുകൊണ്ട് ലുക്ക്ഔട്ട് നോട്ടീസ് പുറപ്പെടുവിച്ചു.

മകളെ കാണാതായതു മുതൽ യാതൊരു വിവരവും ലഭ്യമല്ലെന്നും അതീവ ആശങ്കയോടെ മകളുടെ തിരിച്ചുവരവിനായി കാത്തിരിക്കുകയാണെന്നും ശ്രീജയുടെ പിതാവ് കൊയ്യ യാദഗിരി റെഡ്ഡി മാധ്യമങ്ങളോട് പറഞ്ഞു. അടുത്തിടെ നാട്ടിൽ വന്ന് ഒരു മാസം കുടുംബത്തോടൊപ്പം ചിലവഴിച്ച ശേഷമാണ് ശ്രീജ യു.എസിലേക്ക് മടങ്ങിയത്. സംഭവദിവസം കോളേജിൽ പോയി മുറിയിൽ തിരിച്ചെത്തിയ ശേഷം പുറത്തേക്ക് നടക്കാനിറങ്ങിയതായിരുന്നുവെന്നും, താമസസ്ഥലത്തുനിന്ന് ഒരു കിലോമീറ്റർ അകലെവച്ചാണ് കാണാതായതെന്നും പിതാവ് വ്യക്തമാക്കി.

മെലിഞ്ഞ ശരീരപ്രകൃതിയുള്ള ശ്രീജയ്ക്ക് 5 അടി 3 ഇഞ്ച് മുതൽ 5 അടി 5 ഇഞ്ച് വരെ ഉയരമുണ്ട്. കാണാതാകുന്ന സമയത്ത് കറുത്ത ജാക്കറ്റും ബ്ലൂ ജീൻസുമാണ് ധരിച്ചിരുന്നത്. ഇവർ ബോസ്റ്റണിലെ കാർസൺ ബീച്ച് അല്ലെങ്കിൽ ഹാർബർ പോയിന്റ് പ്രദേശങ്ങളിൽ ഉണ്ടാകാമെന്നാണ് പൊലീസ് നിഗമനം. ശ്രീജയുടെ അവസാനമായി ലഭ്യമായ ലൊക്കേഷൻ താമസസ്ഥലത്തുനിന്ന് വെറും അര കിലോമീറ്റർ മാത്രം അകലെയായതിനാൽ പെൺകുട്ടി സുരക്ഷിതയായി തിരിച്ചെത്തുമെന്ന പ്രതീക്ഷയിലാണ് അധികൃതർ.

സംഭവത്തിൽ തെലങ്കാന റോഡ്സ് ആൻഡ് ബിൽഡിംഗ്സ് മന്ത്രിയും നൽഗൊണ്ട എം.എൽ.എയുമായ കോമാട്ടിറെഡ്ഡി വെങ്കട്ട് റെഡ്ഡി ഇടപെട്ടിട്ടുണ്ട്. വിദ്യാർത്ഥിനിയെ കണ്ടെത്താനുള്ള ശ്രമങ്ങൾക്കായി അദ്ദേഹം ബോസ്റ്റണിലെ ഇന്ത്യൻ കോൺസുലേറ്റ് ജനറൽ, വിദേശകാര്യ മന്ത്രാലയം, ബോസ്റ്റൺ പൊലീസ് എന്നിവരുടെ സഹായം തേടി. തിരച്ചിൽ ഏകോപിപ്പിക്കുന്നതിനായി തെലുങ്ക് അസോസിയേഷൻ ഓഫ് നോർത്ത് അമേരിക്ക അംഗങ്ങളുമായും അദ്ദേഹം ബന്ധപ്പെട്ടിട്ടുണ്ട്.

ശ്രീജയെ കണ്ടെത്താൻ ബോസ്റ്റൺ പൊലീസ് ഡിപ്പാർട്ട്മെന്റ് അന്വേഷണം ഊർജിതമാക്കിയിട്ടുണ്ട്. ഇവരെക്കുറിച്ച് എന്തെങ്കിലും വിവരം ലഭിക്കുന്നവർ അടിയന്തര സേവനങ്ങളുമായോ അല്ലെങ്കിൽ ഡിസ്ട്രിക്റ്റ് സി-11 ഡിറ്റക്ടീവ്സിനെ (617) 343-4335 എന്ന നമ്പറിലോ ബന്ധപ്പെടണമെന്ന് പൊലീസ് അറിയിച്ചു.

Student from Telangana goes missing while out for a walk in Boston; family seeks help