തമിഴ്നാട് നിയമസഭാ തിരഞ്ഞെടുപ്പ് ഫലത്തിന് പിന്നാലെ സംസ്ഥാനത്ത് സർക്കാർ രൂപീകരണത്തിനുള്ള ചർച്ചകൾ സജീവമായി. വിജയ് നയിക്കുന്ന തമിഴക വെട്രി കഴകത്തെ (ടിവികെ) പിന്തുണയ്ക്കണമെന്ന് കോൺഗ്രസ് എംഎൽഎമാരുടെ ഇടയിൽ ഭൂരിപക്ഷാഭിപ്രായം ഉയർന്നത് ഡിഎംകെ സഖ്യത്തിൽ വിള്ളലുണ്ടാക്കി. കോൺഗ്രസ് ഹൈക്കമാൻഡ് എംഎൽഎമാരുടെ അഭിപ്രായം തേടിയപ്പോൾ ടിവികെ സഖ്യത്തിന് അനുകൂലമായ നിലപാടാണ് ഭൂരിഭാഗം പേരും സ്വീകരിച്ചതെന്നാണ് സൂചന. കെ.സി. വേണുഗോപാലിന് ടിവികെ ഔദ്യോഗികമായി കത്ത് നൽകിയതോടെ കോൺഗ്രസ് നേതൃത്വം രാഹുൽ ഗാന്ധിയുടെ സാന്നിധ്യത്തിൽ നിർണ്ണായക യോഗം ചേരും.
അതേസമയം, സഖ്യകക്ഷി നേതാക്കൾ എം.കെ. സ്റ്റാലിനെ സന്ദർശിക്കുന്ന ചിത്രങ്ങൾ പങ്കുവെച്ച ഡിഎംകെ, തങ്ങളുടെ സഖ്യം ശക്തമായി തുടരുമെന്ന് പ്രഖ്യാപിച്ചു. ഇടതുപാർട്ടികളും വിസികെയും വിജയ്യെ പിന്തുണയ്ക്കില്ലെന്ന് ഡിഎംകെ അവകാശപ്പെട്ടെങ്കിലും കോൺഗ്രസിന്റെ കാര്യത്തിൽ പാർട്ടി മൗനം പാലിച്ചു. സ്റ്റാലിൻ വിളിച്ച യോഗത്തിൽ നിന്ന് കോൺഗ്രസ് വിട്ടുനിന്നതിൽ ഡിഎംകെ അതൃപ്തി അറിയിച്ചിട്ടുണ്ട്. ഡിഎംകെയും അണ്ണാ ഡിഎംകെയും തമ്മിലുള്ള പുതിയ സഖ്യനീക്കങ്ങളോടുള്ള എതിർപ്പാണ് കോൺഗ്രസിനെ വിജയ്യോട് അടുപ്പിക്കുന്നതെന്നാണ് രാഷ്ട്രീയ നിരീക്ഷകർ കരുതുന്നത്.
നാല് ദിവസത്തിനുള്ളിൽ സർക്കാർ രൂപീകരിക്കുമെന്ന് ടിവികെ നേതൃത്വം പ്രഖ്യാപിച്ചു. ടിവികെ ജനറൽ സെക്രട്ടറി ഗവർണർ രാജേന്ദ്ര അർലേക്കറുമായി ഫോണിൽ സംസാരിക്കുകയും ഗവർണർ ചെന്നൈയിൽ എത്തുമ്പോൾ വിജയ് അദ്ദേഹത്തെ നേരിൽ കാണുമെന്നും അറിയിച്ചു. കോൺഗ്രസ് കൂടി പിന്തുണ പ്രഖ്യാപിച്ചാൽ തമിഴ്നാട് രാഷ്ട്രീയത്തിൽ വലിയ അട്ടിമറികൾക്കാകും വരുംദിവസങ്ങൾ സാക്ഷ്യം വഹിക്കുക.
Tamil Nadu Political Crisis: Congress Likely to Support Vijay’s TVK
