ടെഹ്റാൻ: തന്ത്രപ്രധാനമായ ഹോർമുസ് കടലിടുക്കിലൂടെയുള്ള വാണിജ്യ കപ്പൽ ഗതാഗതം ക്രമീകരിക്കുന്നതുമായി ബന്ധപ്പെട്ട് ഇറാനും ഒമാനും തമ്മിൽ നടത്തുന്ന ചർച്ചകൾ അവസാന ഘട്ടത്തിലെത്തിയതായി ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഗായി അറിയിച്ചു. സുരക്ഷിതമായ താത്കാലിക കപ്പൽ പാത ഉറപ്പാക്കുന്നതിനുള്ള ഇരുരാജ്യങ്ങളുടെയും ധാരണാപത്രം വരുംദിവസങ്ങളിൽ അന്താരാഷ്ട്ര സമുദ്ര സംഘടനയ്ക്ക് (IMO) സമർപ്പിക്കുമെന്നും അദ്ദേഹം വ്യക്തമാക്കി.
കടലിടുക്കിന്റെ ഇരുവശങ്ങളിലുമായി സ്ഥിതിചെയ്യുന്ന ഇറാനും ഒമാനും മാസങ്ങളായി ഈ വിഷയം ചർച്ച ചെയ്തുവരികയാണ്. സുരക്ഷിത പാതയിലൂടെ കടന്നുപോകുന്ന കപ്പലുകളിൽ നിന്ന് സർവീസ് ഫീസ് ഈടാക്കാനുള്ള സാധ്യതയും ചർച്ചകളിൽ ഉയർന്നുവന്നിട്ടുണ്ട്. എന്നാൽ പ്രസ്തുത നീക്കത്തിനെതിരെ അമേരിക്ക ശക്തമായ എതിർപ്പും മുന്നറിയിപ്പും ഉയർത്തിയിട്ടുണ്ട്. വരുംദിവസങ്ങളിൽ ഇത് സംബന്ധിച്ച് കൂടുതൽ ഔദ്യോഗിക പ്രഖ്യാപനങ്ങൾ ഉണ്ടായേക്കും.
