ഹൊനോലുലു: പ്രകൃതിയുടെ അത്ഭുത നിർമ്മിതികളിൽ ഒന്നായ ഹവായിയിലെ വിഖ്യാത ലാവാ ശിലാ രൂപീകരണം ‘ഹോലൈ സീ ആർച്ച്’ പസഫിക് സമുദ്രത്തിലേക്ക് തകർന്നു വീണു. ഏകദേശം 550 വർഷത്തോളം പഴക്കമുണ്ടെന്ന് കരുതപ്പെടുന്ന, 90 അടി (27.4 മീറ്റർ) ഉയരമുള്ള ഈ കൂറ്റൻ ആർച്ച് പൂർണ്ണമായും കടലിൽ പതിക്കുകയായിരുന്നു.
കഴിഞ്ഞ ദിവസങ്ങളിൽ പ്രദേശത്തുണ്ടായ ‘നോളോ’ ഉഷ്ണമേഖലാ കൊടുങ്കാറ്റിനെ തുടർന്ന് ഹവായി അഗ്നിപർവ്വത ദേശീയോദ്യാനം താൽക്കാലികമായി അടച്ചിട്ട സമയത്താണ് ഇത് സംഭവിച്ചതെന്ന് കരുതപ്പെടുന്നു. സെപ്റ്റംബർ 23-ന് തീരത്ത് പ്രതലത്തിൽ നിന്നും കടലിലേക്ക് നീണ്ടുനിൽക്കുന്ന രീതിയിൽ ഈ ആർച്ച് ദൃശ്യമായിരുന്നുവെന്നും എന്നാൽ സെപ്റ്റംബർ 27 ആയപ്പോഴേക്കും ഇത് പൂർണ്ണമായി അപ്രത്യക്ഷമായതായും നാഷണൽ പാർക്ക് സർവീസ് ഔദ്യോഗിക പ്രസ്താവനയിലൂടെ സ്ഥിരീകരിച്ചു. കൃത്യമായി ഏത് സമയത്താണ് ആർച്ച് തകർന്നതെന്ന് വ്യക്തമല്ല.
ഹവായി ദ്വീപിലെ (ദി ബിഗ് ഐലൻഡ്) ‘ചെയിൻ ഓഫ് ക്രേറ്റേഴ്സ് റോഡിന്റെ’ അറ്റത്ത് സ്ഥിതി ചെയ്തിരുന്ന ഈ പ്രകൃതിദത്ത കമാനം ലോകമെമ്പാടുമുള്ള വിനോദസഞ്ചാരികളുടെ ഒരു പ്രധാന ആകർഷണ കേന്ദ്രമായിരുന്നു. ദിവസേന ആയിരക്കണക്കിന് ആളുകളാണ് ഇവിടെയെത്തി ചിത്രങ്ങൾ പകർത്തിയിരുന്നത്.
ഈ സീ ആർച്ചിന് ഇരുവശവുമുള്ള തീരപ്രദേശങ്ങൾ വർഷങ്ങളായി കനത്ത അസ്ഥിരത നേരിടുന്നുണ്ടായിരുന്നുവെന്ന് അധികൃതർ ചൂണ്ടിക്കാണിക്കുന്നു. 2018-ൽ കിലാവേയ അഗ്നിപർവ്വത സ്ഫോടനത്തെത്തുടർന്നുണ്ടായ ഭൂകമ്പങ്ങൾ ആർച്ചിന് സമീപമുള്ള മലയിടുക്കുകളിൽ ഗുരുതരമായ വിള്ളലുകൾ ഉണ്ടാക്കിയിരുന്നു. ഇതേത്തുടർന്ന് സുരക്ഷ മുൻനിർത്തി 2020 ജനുവരിയിൽ ആർച്ചിന് സമീപമുണ്ടായിരുന്ന പഴയ വ്യൂവിംഗ് ഏരിയ അടയ്ക്കുകയും, പിന്നീട് സുരക്ഷിതമായ അകലത്തിൽ പുതിയൊരെണ്ണം സ്ഥാപിക്കുകയുമാണുണ്ടായത്. തുടർന്നുണ്ടായ ശക്തമായ ഒരു കൊടുങ്കാറ്റിൽ ഈ കമാനത്തിന്റെ അടിഭാഗത്തുനിന്നും വലിയൊരു പാറക്കഷ്ണം കടലിലേക്ക് ഇടിഞ്ഞു വീണിരുന്നു.
“ഈ രൂപം അതീവ മനോഹരമാണ്, പക്ഷേ ഇതിന് പരിമിതമായ ആയുസ്സേ ഉള്ളൂ,” എന്ന് 2021-ൽ തന്നെ പാർക്ക് അധികൃതർ മുന്നറിയിപ്പ് നൽകിയിരുന്നതാണ്. ഈ ആർച്ച് ഒടുവിൽ കടലിലേക്ക് തകരുമെന്നും, എന്നാൽ മലയിടുക്കുകൾ പതുക്കെ കരയിലേക്ക് നീങ്ങുമ്പോൾ കാലക്രമേണ ഇതിന് പകരം മറ്റൊന്ന് രൂപപ്പെടുമെന്നും അവർ കൂട്ടിച്ചേർത്തു.
ഹോലൈ സീ ആർച്ചിന്റെ തകർച്ചയുടെ വാർത്ത പുറത്തുവന്നതോടെ സോഷ്യൽ മീഡിയയിൽ ലോകമെമ്പാടുമുള്ള സഞ്ചാരികൾ തങ്ങളുടെ സന്ദർശന ഓർമ്മകളും അവസാന ചിത്രങ്ങളും പങ്കുവെച്ചുകൊണ്ട് ഈ പ്രകൃതിവിസ്മയത്തിന് വിട നൽകുകയാണ്.
That natural wonder has merged with the Pacific; Hawaii’s 550-year-old ‘Hōlei Sea Arch’ has collapsed.
