വാഷിംഗ്ടൺ: ഇറാനിലെ യുഎസ് സൈനിക നീക്കങ്ങൾക്കായി പതിനായിരക്കണക്കിന് കോടി ഡോളറിന്റെ അടിയന്തര ധനസഹായം വേണമെന്ന് പ്രസിഡന്റ് ഡോണൾഡ് ട്രംപ് അഭ്യർത്ഥിക്കുമ്പോഴും, ഫണ്ട് അനുവദിക്കില്ലെന്ന ഉറച്ച നിലപാടിൽ യുഎസ് കോൺഗ്രസിലെ ഡെമോക്രാറ്റുകൾ. ഇതോടെ, ഒരു സായുധ പോരാട്ടത്തിന് നടുവിൽ നിൽക്കുമ്പോൾ സൈന്യത്തിന്റെ തലവനായ പ്രസിഡന്റ് ആവശ്യപ്പെട്ട യുദ്ധ ഫണ്ട് പ്രതിപക്ഷം പൂർണ്ണമായി നിരസിക്കുന്ന അപൂർവ്വമായ കാഴ്ചയ്ക്കാണ് അമേരിക്കൻ രാഷ്ട്രീയം സാക്ഷ്യം വഹിക്കുന്നത്. ഇതോടെ ആധുനിക യുഎസ് ചരിത്രത്തിൽ തന്നെ കടുത്ത രാഷ്ട്രീയ ഭിന്നത ഉണ്ടാക്കിയ യുദ്ധമായി ഇറാൻ സൈനിക നീക്കം മാറിയിരിക്കുകയാണ്.
കഴിഞ്ഞ ഒരു നൂറ്റാണ്ടിനിടയിൽ ആദ്യമായാണ് ഒരു യുദ്ധത്തിനെതിരെ ഒരു പ്രമുഖ രാഷ്ട്രീയ പാർട്ടി ആദ്യദിനം മുതൽ ഒന്നടങ്കം നിലയുറപ്പിക്കുന്നത്. യുദ്ധത്തിന് കൂടുതൽ പണം അനുവദിക്കില്ലെന്ന നിലപാടിനൊപ്പം, ഇറാനിൽ നിന്ന് സൈന്യത്തെ പിൻവലിക്കണമെന്ന് ആവശ്യപ്പെട്ട് ഡെമോക്രാറ്റുകൾ കൂട്ടത്തോടെ വോട്ട് ചെയ്യുകയാണ്. ഇതിന് പുറമെ, സൈനികരുടെ ശമ്പളം വർദ്ധിപ്പിക്കുന്നത് ഉൾപ്പെടെ ഈ യുദ്ധവുമായി നേരിട്ട് ബന്ധമില്ലാത്ത വ്യവസ്ഥകൾ ഉൾപ്പെടുന്ന പെന്റഗണിന്റെ വിപുലമായ നയപരമായ പ്രമേയങ്ങളെപ്പോലും പ്രതിഷേധ സൂചകമായി ഇവർ എതിർത്ത് വോട്ട് ചെയ്തു.
യുദ്ധസമയത്ത് സൈന്യത്തെ പിന്തുണയ്ക്കുന്നില്ലെന്ന ആരോപണങ്ങളെ ഭയന്ന് പ്രതിപക്ഷം പിന്മാറിയിരുന്ന മുൻകാല അനുഭവങ്ങളിൽ നിന്നുള്ള വലിയൊരു രാഷ്ട്രീയ മാറ്റമാണിത്. എന്നാൽ റിപ്പബ്ലിക്കൻ വോട്ടർമാർ ഉൾപ്പെടെയുള്ള അമേരിക്കൻ ജനത തങ്ങൾക്കൊപ്പമുണ്ടെന്നും വരാനിരിക്കുന്ന നവംബർ തിരഞ്ഞെടുപ്പിൽ യുദ്ധത്തോടുള്ള റിപ്പബ്ലിക്കൻ പാർട്ടിയുടെ പിന്തുണ പ്രധാന ചർച്ചാവിഷയമാകുമെന്നും ഡെമോക്രാറ്റിക് ജനപ്രതിനിധികൾ വാദിക്കുന്നു.
ഡെമോക്രാറ്റുകളുടെ ഈ നിലപാടിൽ ശക്തമായ അമർഷം രേഖപ്പെടുത്തിയ ഹൗസ് സ്പീക്കർ മൈക്ക് ജോൺസൺ, പെന്റഗണിനുള്ള ഫണ്ട് നിഷേധിക്കുന്നത് നാണംകെട്ട നടപടിയാണെന്ന് വിമർശിച്ചു. ആയുധശേഖരത്തിൽ കുറവ് നേരിടുന്ന സാഹചര്യത്തിലും ഇറാനിലെ സൈനിക നീക്കങ്ങൾക്കായി ഭരണകൂടം ഏകദേശം എഴുപത് ശതകോടി ഡോളർ അധികമായി ആവശ്യപ്പെടുന്ന പശ്ചാത്തലത്തിലാണ് ഈ രാഷ്ട്രീയ പോര്.
ഡെമോക്രാറ്റുകളുടെ എതിർപ്പിന് പിന്നിൽ പല കാരണങ്ങളുണ്ട്. വിദേശ സൈനിക ഇടപെടലുകളോട് പൊതുവെ സംശയാസ്പദമായ നിലപാട് പുലർത്തുന്ന ഡെമോക്രാറ്റുകൾ, ഈ വിഷയത്തിൽ യുഎസിന്റെ പ്രധാന പങ്കാളിയായ ഇസ്രായേലിനോട് മുൻപത്തെപ്പോലെ ആനുകൂല്യം കാണിക്കുന്നുമില്ല. ഇതിനേക്കാളെല്ലാം ഉപരി, ട്രംപിന്റെ മുൻകാല റിപ്പബ്ലിക്കൻ ഭരണകൂടങ്ങളെ അപേക്ഷിച്ച് അദ്ദേഹത്തിന്റെ നടപടികളിൽ പ്രതിപക്ഷത്തിന് കടുത്ത അവിശ്വാസമാണുള്ളത്. ഇറാൻ യുദ്ധത്തിലെ ഓരോ തീരുമാനങ്ങളും ട്രംപ് കൈകാര്യം ചെയ്ത രീതിയിൽ ഡെമോക്രാറ്റുകൾ കടുത്ത പ്രതിഷേധത്തിലാണ്.
