ഹാനോവർ: വടക്കൻ ജർമ്മനിയിലെ ഹാനോവറിനടുത്തുള്ള ന്യൂസ്റ്റാഡ് ആം റൂബൻബെർഗെയിൽ ജനക്കൂട്ടത്തിലേക്ക് ബിഎംഡബ്ല്യു കാർ മനഃപൂർവ്വം ഓടിച്ചുകയറ്റി നിരവധി പേർക്ക് പരിക്ക്. തിങ്കളാഴ്ച അർദ്ധരാത്രിക്ക് തൊട്ടുമുമ്പാണ് സംഭവം. അക്രമികൾക്ക് നേരെ പൊലീസ് വെടിയുതിർത്തുവെങ്കിലും കാറിലുണ്ടായിരുന്നവർ ഓടിരക്ഷപ്പെട്ടു. പ്രതികൾക്കായി പൊലീസ് ലുക്കൗട്ട് നോട്ടീസ് പുറപ്പെടുവിച്ച് വിപുലമായ തിരച്ചിൽ ആരംഭിച്ചതായി അന്താരാഷ്ട്ര വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു.
അപകടത്തിൽ നാല് മുതൽ അഞ്ച് വരെ ആളുകൾക്ക് പരിക്കേറ്റിട്ടുണ്ട്. ചിലരുടെ പരിക്ക് ഗുരുതരമാണെങ്കിലും ആരുടെയും ജീവന് നിലവിൽ ഭീഷണിയില്ലെന്നാണ് പോലീസ് വക്താവ് അറിയിച്ചത്. പരിക്കേറ്റവരെ ഉടനടി സമീപത്തെ ആശുപത്രികളിൽ പ്രവേശിപ്പിച്ചു.
സംഭവസ്ഥലത്തിന് സമീപം പതിവ് ട്രാഫിക് പരിശോധന നടത്തുകയായിരുന്ന പൊലീസ് പട്രോളിംഗ് സംഘമാണ് ക്രൂരമായ ഈ ആക്രമണം നേരിട്ട് കണ്ടത്. ഉടൻ തന്നെ ഇടപെട്ട പോലീസ് ഉദ്യോഗസ്ഥർ വാഹനം തടയാനായി ബിഎംഡബ്ല്യുവിന് നേരെ വെടിയുതിർത്തു. എന്നാൽ കാർ സംഭവസ്ഥലത്ത് ഉപേക്ഷിച്ച് പ്രതികൾ കാൽനടയായി ഓടിരക്ഷപ്പെടുകയായിരുന്നു.
പ്രതികളെ കണ്ടെത്തുന്നതിനായി വൻ പൊലീസ് സന്നാഹത്തെയാണ് പ്രദേശത്ത് വിന്യസിച്ചിരിക്കുന്നത്. ഹെലികോപ്റ്ററുകളും പ്രത്യേക പരിശീലനം ലഭിച്ച പൊലീസ് നായ്ക്കളും തിരച്ചിലിനായി രംഗത്തുണ്ട്. അന്വേഷണത്തിന്റെ ഭാഗമായി പ്രദേശം മണിക്കൂറുകളോളം പൊലീസ് വളയുകയും തെളിവുകൾ ശേഖരിക്കുകയും ചെയ്തു. അക്രമികളും പരിക്കേറ്റവരും തമ്മിൽ മുൻപരിചയമുണ്ടെന്നാണ് പ്രാഥമിക വിവരമെന്ന് പൊലീസ് വക്താവ് വ്യക്തമാക്കി. എന്നാൽ ഇവരുടെ ബന്ധത്തെക്കുറിച്ചോ ആക്രമണത്തിന് പിന്നിലെ യഥാർത്ഥ കാരണത്തെക്കുറിച്ചോ ഉള്ള കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ല.
സംഭവത്തിനിടയിൽ മറ്റ് ചില വാഹനങ്ങൾക്കും നാശനഷ്ടങ്ങൾ സംഭവിച്ചിട്ടുണ്ട്. ഒരു കാറിന്റെ പിൻവശത്തെ ഗ്ലാസ് തകർന്ന നിലയിലാണ്. എന്നാൽ ഈ നാശനഷ്ടങ്ങളെല്ലാം കാർ ഓടിച്ചുകയറ്റിയതുമായി നേരിട്ട് ബന്ധപ്പെട്ടതാണോ എന്ന് പൊലീസ് പരിശോധിച്ചു വരികയാണ്. അക്രമികൾ എത്രപേരുണ്ടെന്നതിനെക്കുറിച്ചോ അവരുടെ ഐഡന്റിറ്റിയെക്കുറിച്ചോ വ്യക്തമായ വിവരങ്ങൾ ഇതുവരെ ലഭ്യമായിട്ടില്ല. കേസിൽ ഇതുവരെ ആരുടെയും അറസ്റ്റ് രേഖപ്പെടുത്തിയിട്ടില്ലെന്നും സംഭവത്തെക്കുറിച്ച് വിശദമായ അന്വേഷണം പുരോഗമിക്കുകയാണെന്നും ജർമ്മൻ പൊലീസ് അറിയിച്ചു.
Car plows into a crowd in Germany, leaving several injured; police open fire, search underway for suspects.
