വി.ഡി. സതീശൻ നയിക്കുന്ന പുതിയ യുഡിഎഫ് സർക്കാരിന്റെ മന്ത്രിസഭാ രൂപീകരണ ചർച്ചകൾ പൂർത്തിയായതിന് പിന്നാലെ നിയമസഭാ സ്പീക്കർ ഉൾപ്പെടെയുള്ള സുപ്രധാന പദവികളിലും അന്തിമ തീരുമാനമായി. മന്ത്രിസ്ഥാനത്തേക്ക് സജീവമായി പരിഗണിക്കപ്പെട്ടിരുന്ന മുൻ ആഭ്യന്തര മന്ത്രിയും മുതിർന്ന കോൺഗ്രസ് നേതാവുമായ തിരുവഞ്ചൂർ രാധാകൃഷ്ണൻ പുതിയ നിയമസഭയുടെ നാഥനാകും. കോട്ടയത്ത് നിന്നുള്ള ഈ മുതിർന്ന ജനപ്രതിനിധിയുടെ പരിചയസമ്പത്ത് സഭാനടപടികൾ സുഗമമായി മുന്നോട്ട് കൊണ്ടുപോകാൻ സഹായിക്കുമെന്നാണ് യുഡിഎഫ് നേതൃത്വത്തിന്റെ വിലയിരുത്തൽ.
തിരുവഞ്ചൂരിനൊപ്പം മന്ത്രിസഭയിലേക്ക് പരിഗണിക്കപ്പെട്ടിരുന്ന പ്രമുഖ വനിതാ നേതാവ് ഷാനിമോൾ ഉസ്മാനെ ഡെപ്യൂട്ടി സ്പീക്കറായി നിയമിക്കാനും മുന്നണിയിൽ ധാരണയായിട്ടുണ്ട്. ഉമ്മൻചാണ്ടി സർക്കാരിന്റെ കാലത്ത് മന്ത്രിയായി തിളങ്ങിയ തിരുവഞ്ചൂർ രാധാകൃഷ്ണൻ സഭയെ നിയന്ത്രിക്കുമ്പോൾ, വനിതാ പ്രതിനിധിയെന്ന പരിഗണനയോടെയാണ് ഷാനിമോൾ ഉസ്മാൻ ഡെപ്യൂട്ടി സ്പീക്കർ പദവിയിലേക്ക് എത്തുന്നത്. ഇതോടെ സഭ നിയന്ത്രിക്കുന്ന സുപ്രധാന പദവികളിൽ കോൺഗ്രസിന്റെ രണ്ട് മുതിർന്ന നേതാക്കൾ തന്നെ ചുമതലയേൽക്കുമെന്ന് ഉറപ്പായി.
മന്ത്രിസഭയിലെ പ്രധാന ഘടകകക്ഷിയായ കേരള കോൺഗ്രസിന്റെ പ്രതിനിധിയെ ചീഫ് വിപ്പ് പദവിയിലേക്ക് നിശ്ചയിച്ചതാണ് മറ്റൊരു പ്രധാന തീരുമാനം. കേരള കോൺഗ്രസ് നേതാവ് അപു ജോൺ ജോസഫ് ആയിരിക്കും പുതിയ ചീഫ് വിപ്പ്. അപു ജോൺ ജോസഫിനെ ചീഫ് വിപ്പായി നിയമിക്കണമെന്ന ഔദ്യോഗിക തീരുമാനം വ്യക്തമാക്കി കേരള കോൺഗ്രസ് ചെയർമാൻ പി.ജെ. ജോസഫ് നിയുക്ത മുഖ്യമന്ത്രി വി.ഡി. സതീശന് കത്ത് നൽകിയിട്ടുണ്ട്. സത്യപ്രതിജ്ഞയ്ക്ക് തൊട്ടുപിന്നാലെ ഈ പദവികളിലെ ഔദ്യോഗിക പ്രഖ്യാപനങ്ങൾ ഉണ്ടാകും.
Thiruvanchoor Radhakrishnan to be Kerala Assembly Speaker; Shanimol Usman Deputy Speaker and Apu John Joseph Chief Whip
