തിരുവനന്തപുരം: ജര്‍മനിയിലെ ബോഹുമില്‍ അപ്പാര്‍ട്ട്മെന്‍റ് സമുച്ചയത്തിലുണ്ടായ തീപിടിത്തത്തില്‍ ദാരുണമായി കൊല്ലപ്പെട്ട മൂന്ന് മലയാളികളുടെ മൃതദേഹം നാട്ടിലെത്തിക്കാനുള്ള നടപടികൾ സർക്കാർ തലത്തിൽ ആരംഭിച്ചു. കൊല്ലം ചെമ്മക്കാട് സ്വദേശി അഞ്ജലി ജോയി, കട്ടപ്പന സ്വദേശി നോവ സാബു, എറണാകുളം കാലടി സ്വദേശി സിവിന്‍ ജോണി എന്നിവരാണ് ചൊവ്വാഴ്ച പുലര്‍ച്ചെയുണ്ടായ അപകടത്തിൽ ജീവന്‍ വെടിഞ്ഞത്. ജോലിക്കും പഠനത്തിനുമായി ഏതാനും മാസങ്ങൾക്ക് മുൻപാണ് മൂവരും ജർമ്മനിയിലെത്തിയത്. മൃതദേഹങ്ങൾ നാട്ടിലെത്തിക്കുന്നതിനുള്ള മുഴുവൻ ചെലവുകളും നോര്‍ക്ക റൂട്ട്സ് വഹിക്കുമെന്ന് സംസ്ഥാന സർക്കാർ ഔദ്യോഗികമായി അറിയിച്ചു.
മന്ത്രിമാരും എം.പിമാരും ജർമ്മനിയിലെ മലയാളി സംഘടനകളും കുടുംബങ്ങളുമായി നിരന്തരം ബന്ധപ്പെടുന്നുണ്ട്. മുഖ്യമന്ത്രിയുടെ ഓഫീസിന്റെ നേരിട്ടുള്ള മേൽനോട്ടത്തിലും ഏകോപനത്തിലുമാണ് മൃതദേഹങ്ങൾ നാട്ടിലെത്തിക്കാനുള്ള നടപടികൾ പുരോഗമിക്കുന്നത്. അതേസമയം, അപ്പാര്‍ട്ട്മെന്‍റ് സമുച്ചയത്തിന് ബോധപൂർവ്വം തീയിട്ടതാണെന്ന സംശയത്തിൽ ജർമൻ പൊലീസ് കസ്റ്റഡിയിലെടുത്ത റുമേനിയൻ പൗരന്റെ ചോദ്യം ചെയ്യൽ തുടരുകയാണ്. കൊല്ലപ്പെട്ട മലയാളികളായിരുന്നില്ല ഇയാളുടെ ലക്ഷ്യമെന്നും, അപ്പാര്‍ട്ട്മെന്റുമായി ബന്ധപ്പെട്ട് നിലനിന്നിരുന്ന വ്യക്തിപരമായ തർക്കങ്ങളാണ് ദുരന്തത്തിലേക്ക് നയിച്ചതെന്നുമാണ് പ്രാഥമിക നിഗമനം.
മക്കളെ നഷ്ടപ്പെട്ടതിന്റെ ഞെട്ടലിലും തീരാവേദനയിലുമാണ് കുടുംബങ്ങളും ബന്ധുക്കളും. വെയര്‍ഹൗസ് അസിസ്റ്റന്റായി ജോലി ചെയ്യുന്നതിനിടയിൽ ജർമ്മനിയിൽ തന്നെ അധ്യാപികയായി ജോലിക്ക് കയറാനുള്ള തയാറെടുപ്പിലായിരുന്നു അഞ്ജലി. ജിം ട്രെയിനറായി ജോലി ചെയ്തിരുന്ന നോവ, സുഹൃത്തായ അഞ്ജലിയെ കാണാൻ അപ്പാർട്ട്മെന്റിൽ എത്തിയപ്പോഴാണ് അപകടത്തിൽ പെട്ടത്. വെറും നാല്‍പത് ദിവസം മുന്‍പ് നാട് വിട്ട് ജർമ്മനിയിലേക്ക് പോയ സിവിന്‍ ജോണിയുടെ വിയോഗവും കുടുംബത്തിന് താങ്ങാനാകാത്ത ആഘാതമായിരിക്കുകയാണ്. പ്രിയപ്പെട്ടവരുടെ വേർപാടിൽ നാടും ബന്ധുക്കളും കടുത്ത ദുഃഖത്തിലാണ്.
Tragic Germany Fire: Process Begins to Repatriate Bodies of 3 Keralites; NORKA Roots to Bear Expenses
