വാഷിങ്ടൺ: ഏകദേശം 9.5 ലക്ഷം അമേരിക്കക്കാർക്ക് 500 ഡോളർ വീതം ഒബാമകെയർ റീഫണ്ട് ലഭിക്കുന്നു. സെപ്റ്റംബർ 30 മുതൽ വിതരണം ആരംഭിക്കുന്ന തുക അഫോർഡബിൾ കെയർ ആക്ട് (ACA) പ്രകാരമുള്ള ഫെഡറൽ ഹെൽത്ത് ഇൻഷുറൻസ് എക്സ്ചേഞ്ചിൽ ഉപഭോക്താക്കളിൽനിന്ന് അധികമായി ഈടാക്കിയ പണമാണെന്നാണ് ട്രംപ് ഭരണകൂടത്തിന്റെ വിശദീകരണം. 30 സംസ്ഥാനങ്ങളിലുള്ളവർക്കാണ് റീഫണ്ട് ലഭിക്കുക. യുഎസ് ട്രഷറി ഡിപ്പാർട്ട്മെന്റാണ് പണം വിതരണം ചെയ്യുന്നത്. ഗുണഭോക്താക്കൾക്ക് പ്രസിഡന്റ് ഡോണൾഡ് ട്രംപ് ഒപ്പിട്ട കത്തും ലഭിക്കും.
HealthCare.gov പ്രവർത്തിപ്പിക്കുന്നതിനായി ആവശ്യമായതിലധികം പണം ഉപഭോക്താക്കളിൽനിന്ന് ഈടാക്കിയെന്നും ആ അധിക തുക അമേരിക്കക്കാർക്ക് തിരികെ നൽകുകയാണെന്നുമാണ് ട്രംപിന്റെ വിശദീകരണം. ആരോഗ്യ ഇൻഷുറൻസ് കമ്പനികളിൽനിന്ന് ഫെഡറൽ സർക്കാർ ഈടാക്കിയ ഉപയോക്തൃ ഫീസിന്റെ ചെലവ് പിന്നീട് ഉയർന്ന ഇൻഷുറൻസ് പ്രീമിയങ്ങളിലൂടെ ഉപഭോക്താക്കളാണ് വഹിച്ചതെന്നും വൈറ്റ് ഹൗസ് പറയുന്നു. സെപ്റ്റംബർ 10നാണ് ട്രംപ് 500 ഡോളർ റീഫണ്ട് പദ്ധതി പ്രഖ്യാപിച്ചത്. നവംബറിലെ മിഡ്ടേം തിരഞ്ഞെടുപ്പിന് ഏകദേശം അഞ്ച് ആഴ്ച മുമ്പാണ് ചെക്കുകൾ വിതരണം ചെയ്യുന്നത്.
അതേസമയം, ട്രംപ് നിർദേശിച്ച 5,000 ഡോളർ ഡിവിഡന്റുമായി ഈ റീഫണ്ടിന് ബന്ധമില്ല. റിപ്പബ്ലിക്കൻ പാർട്ടി കോൺഗ്രസിന്റെ നിയന്ത്രണം നിലനിർത്തിയാൽ എല്ലാ അമേരിക്കക്കാർക്കും 5,000 ഡോളർ വീതം നൽകുമെന്ന് ട്രംപ് പ്രത്യേകം പ്രഖ്യാപിച്ചിട്ടുണ്ട്. സ്വന്തമായി ACA ഇൻഷുറൻസ് എക്സ്ചേഞ്ച് പ്രവർത്തിപ്പിക്കാത്ത, ഫെഡറൽ സർക്കാർ നടത്തുന്ന എക്സ്ചേഞ്ചിനെ ആശ്രയിക്കുന്ന 30 സംസ്ഥാനങ്ങളിലെ ആളുകൾക്കാണ് 500 ഡോളർ റീഫണ്ട് ലഭിക്കുക. അലബാമ, അലാസ്ക, അരിസോണ, അർക്കൻസാസ്, ഡെലവെയർ, ഫ്ലോറിഡ, ഹവായി, ഇന്ത്യാന, അയോവ, കൻസസ്, ലൂസിയാന, മിഷിഗൺ, മിസിസിപ്പി, മിസോറി, മൊണ്ടാന, നെബ്രാസ്ക, ന്യൂ ഹാംഷയർ, നോർത്ത് കരോലിന, നോർത്ത് ഡക്കോട്ട, ഒഹായോ, ഒക്ലഹോമ, ഒറിഗൺ, സൗത്ത് കരോലിന, സൗത്ത് ഡക്കോട്ട, ടെന്നസി, ടെക്സസ്, യൂട്ടാ, വെസ്റ്റ് വിർജീനിയ, വിസ്കോൺസിൻ, വ്യോമിങ് എന്നിവയാണ് ഈ സംസ്ഥാനങ്ങൾ.
സ്വന്തമായി ACA എക്സ്ചേഞ്ചുകൾ പ്രവർത്തിപ്പിക്കുന്ന മറ്റ് 20 സംസ്ഥാനങ്ങളിലെ ആളുകൾക്ക് ഈ റീഫണ്ട് ലഭിക്കില്ല. റീഫണ്ട് ലഭിക്കുന്നവരിൽ ഭൂരിഭാഗം പേരുടെയും വരുമാനം ഫെഡറൽ ദാരിദ്ര്യരേഖയുടെ ഏകദേശം 400 ശതമാനമാണ്. ഒരാൾക്ക് ഇത് വർഷത്തിൽ ഏകദേശം 64,000 ഡോളറും നാലംഗ കുടുംബത്തിന് 1,32,000 ഡോളറുമാണ്. 100 മുതൽ 400 ശതമാനം വരെ വരുമാനമുള്ള ചിലർക്കും റീഫണ്ട് ലഭിക്കും. 2025 അവസാനത്തോടെ ACAയുടെ അധിക സബ്സിഡികൾ കാലഹരണപ്പെട്ടതോടെ ദശലക്ഷക്കണക്കിന് അമേരിക്കക്കാർക്ക് ആരോഗ്യ ഇൻഷുറൻസ് ചെലവ് വർധിച്ചിരുന്നു. ഇതിനിടെയാണ് റീഫണ്ട് പദ്ധതി വരുന്നത്.
എന്നാൽ റീഫണ്ട് ലഭിക്കുന്നത് ആരോഗ്യ ഇൻഷുറൻസ് ചെലവ് കുറയുമെന്ന് ഉറപ്പാക്കുന്നില്ല. ആരോഗ്യപരിചരണ ചെലവ് കുറയ്ക്കുകയും ജനങ്ങളുടെ പണം സംരക്ഷിക്കുകയും ചെയ്യുകയാണ് ലക്ഷ്യമെന്ന് ട്രംപ് വ്യക്തമാക്കിയിട്ടുണ്ട്.
Trump $500 Obamacare refund checks: Who will get the ACA payments in 30 states?
