
അമേരിക്കൻ പ്രസിഡന്റ് ഡോണൾഡ് ട്രംപ് ഏഷ്യ-പസഫിക് സാമ്പത്തിക സഹകരണ ഉച്ചകോടിയിൽ പങ്കെടുക്കുന്നതിനായി ബുധനാഴ്ച ചൈനയിലെ ഷെൻഷെനിലെത്തി. വിമാനത്താവളത്തിൽ ചൈനീസ് പ്രസിഡന്റ് ഷി ചിൻപിങ് ട്രംപിനെ സ്വീകരിച്ചു. ഉച്ചകോടിക്കിടെ ഷി ചിൻപിങ്ങുമായും റഷ്യൻ പ്രസിഡന്റ് വ്ലാഡിമിർ പുട്ടിനുമായും ട്രംപ് ത്രികക്ഷി ചർച്ച നടത്തുമെന്നാണ് റിപ്പോർട്ടുകൾ. ട്രംപിന്റെ വരവിന് മുന്നോടിയായി പുട്ടിനും ഷിയും ഉഭയകക്ഷി ചർച്ച നടത്തിയിരുന്നു.
റഷ്യയും ചൈനയും തമ്മിലുള്ള ബന്ധം കൂടുതൽ ശക്തിപ്പെടുത്തേണ്ടതിന്റെ ആവശ്യകത ഇരുനേതാക്കളും ചർച്ച ചെയ്തു. ആഗോള വെല്ലുവിളികൾക്കിടയിൽ കൂടുതൽ നീതിയുക്തമായ ലോകക്രമം രൂപപ്പെടുത്താൻ ഇരുരാജ്യങ്ങളും ഒന്നിച്ച് പ്രവർത്തിക്കുകയാണെന്ന് പുട്ടിൻ പറഞ്ഞു.
രാജ്യാന്തര ബന്ധങ്ങളിൽ ജനാധിപത്യവൽക്കരണം ഉറപ്പാക്കുന്നതിൽ റഷ്യയും ചൈനയും നേതൃത്വം നൽകണമെന്ന് ഷി ചിൻപിങ്ങും ആഹ്വാനം ചെയ്തു. പരസ്പര ബഹുമാനത്തിലും സഹകരണത്തിലും അധിഷ്ഠിതമായ ഇരുരാജ്യങ്ങളുടെയും പങ്കാളിത്തം ആഗോള സ്ഥിരതയ്ക്ക് കരുത്തുപകരുന്നതാണെന്നും അദ്ദേഹം വ്യക്തമാക്കി.റഷ്യ-യുക്രെയ്ൻ യുദ്ധം അവസാനിപ്പിക്കുന്നതിനായി ചർച്ചകൾ നടത്തുമെന്ന് ട്രംപ് അറിയിച്ചിട്ടുണ്ട്. എന്നാൽ, നിർദിഷ്ട ത്രികക്ഷി ചർച്ചയുടെ അജൻഡയിൽ യുക്രെയ്ൻ വിഷയം ഉൾപ്പെടുത്തിയിട്ടില്ലെന്നാണ് ട്രംപിന്റെ സഹായികൾ നേരത്തെ വ്യക്തമാക്കിയത്.
യുദ്ധത്തിൽ ഓരോ മാസവും പതിനായിരക്കണക്കിന് റഷ്യൻ സൈനികർ കൊല്ലപ്പെടുന്ന സാഹചര്യം സമാധാന കരാറിലെത്താനുള്ള അവസരമാണെന്ന് ട്രംപ് ചൊവ്വാഴ്ച പ്രതികരിച്ചിരുന്നു. കരാറിലേക്ക് കാര്യങ്ങൾ അടുക്കുകയാണെന്നും മികച്ച ചർച്ച നടക്കുമെന്നുമാണ് അദ്ദേഹത്തിന്റെ പ്രതീക്ഷ.പുട്ടിനുമായി പ്രത്യേക കൂടിക്കാഴ്ച നടത്താനും ഉത്തരകൊറിയൻ ഭരണാധികാരി കിം ജോങ് ഉന്നുമായി ചർച്ച നടത്താനും സാധ്യതയുണ്ടെന്ന് ട്രംപ് സൂചിപ്പിച്ചു. കിമ്മുമായി കൂടിക്കാഴ്ച നടത്താൻ ട്രംപിന് താൽപര്യമുണ്ടെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോയും വ്യക്തമാക്കി. എന്നാൽ, വ്യാഴാഴ്ചത്തേക്ക് അത്തരമൊരു കൂടിക്കാഴ്ചയ്ക്ക് നിലവിൽ തീരുമാനമായിട്ടില്ലെന്നും അദ്ദേഹം അറിയിച്ചു.















