വാഷിംഗ്ടൺ: വിശ്വസ്തത മാത്രം പോരാ, തൻ്റെ താൽപ്പര്യങ്ങൾ സംരക്ഷിക്കപ്പെടുക കൂടി വേണമെന്ന കർശന നിലപാടറിയിച്ച് യുഎസ് പ്രസിഡൻ്റ് ഡോണൾഡ് ട്രംപ് അറ്റോർണി ജനറൽ പാം ബോണ്ടിയെ പുറത്താക്കി. ഒരു മാസത്തിനിടെ ട്രംപ് മന്ത്രിസഭയിൽ നിന്ന് പുറത്താക്കപ്പെടുന്ന രണ്ടാമത്തെ പ്രമുഖ വ്യക്തിയാണ് ബോണ്ടി. തൻ്റെ ട്രൂത്ത് സോഷ്യൽ പ്ലാറ്റ്ഫോമിലൂടെയാണ് ട്രംപ് ഈ വിവരം പ്രഖ്യാപിച്ചത്.
നീതിന്യായ വകുപ്പിൻ്റെ പ്രവർത്തനങ്ങളിൽ മാസങ്ങളായി നിലനിന്നിരുന്ന അതൃപ്തിയാണ് ബോണ്ടിയുടെ പുറത്താക്കലിൽ കലാശിച്ചത്. ജെഫ്രി എപ്സ്റ്റീനുമായി ബന്ധപ്പെട്ട വിവാദ ഫയലുകൾ കൈകാര്യം ചെയ്യുന്നതിൽ ബോണ്ടിക്ക് വീഴ്ച പറ്റിയതാണ് പ്രധാന കാരണം. രേഖകൾ സുതാര്യമായി പുറത്തുവിടുമെന്ന് ബോണ്ടി വാഗ്ദാനം നൽകിയിരുന്നെങ്കിലും, അവ്യക്തവും അപൂർണ്ണവുമായ റിപ്പോർട്ടുകളാണ് പുറത്തുവന്നത്. ഇത് ട്രംപ് അനുകൂലികളെയും പ്രതിപക്ഷത്തെയും ഒരുപോലെ ചൊടിപ്പിച്ചു.
എപ്സ്റ്റീൻ്റെ ‘ക്ലയൻ്റ് ലിസ്റ്റ്’ നിലവിലുണ്ടെന്ന് ബോണ്ടി ആദ്യം സൂചിപ്പിച്ചെങ്കിലും പിന്നീട് എഫ്.ബി.ഐയും നീതിന്യായ വകുപ്പും ഇത് തള്ളിക്കളഞ്ഞു. ഇത് പൊതുജനങ്ങളെ തെറ്റിദ്ധരിപ്പിക്കുന്നതിന് തുല്യമാണെന്ന വിമർശനം ഉയർന്നു. കൂടാതെ, രാഷ്ട്രീയ എതിരാളികളെ നേരിടുന്നതിനായുള്ള ബോണ്ടിയുടെ നീക്കങ്ങൾ കോടതികളിൽ പരാജയപ്പെട്ടതും ട്രംപിനെ പ്രകോപിപ്പിച്ചു.
പാം ബോണ്ടിക്ക് പകരമായി ഡെപ്യൂട്ടി അറ്റോർണി ജനറൽ ടോഡ് ബ്ലാഞ്ചിനെ ആക്ടിങ് അറ്റോർണി ജനറലായി ട്രംപ് നിയമിച്ചു. നേരത്തെ ഹോംലാൻഡ് സെക്യൂരിറ്റി ചീഫ് ക്രിസ്റ്റി നോമിനെയും ട്രംപ് പുറത്താക്കിയിരുന്നു. തുളസി ഗബ്ബാർഡും ഉടൻ പുറത്തായേക്കുമെന്ന് വാഷിംഗ്ടണിൽ അഭ്യൂഹങ്ങളുണ്ട്. അറ്റ്ലാന്റിക് റിപ്പോർട്ട് അനുസരിച്ച്, കാഷ് പട്ടേൽ, ആർമി സെക്രട്ടറി ഡാനിയൽ ഡ്രസ്കോൾ, ലേബർ സെക്രട്ടറി ലോറി ഷാവേസ്-ഡിറിമർ എന്നിവർ ഉടനെ പുറത്തായേക്കുമെന്നാണ് റിപ്പോർട്ട്. കാഷ് പട്ടേലിനെ ഇന്ന് തന്നെ പുറത്താക്കുമെന്നും പുനഃസംഘടന നടത്തിയേക്കുമെന്നും കൺസർവേറ്റീവ് കമന്റേറ്റർ സെറാഫിൻ പറഞ്ഞു. ഭരണപരമായ മികവിനേക്കാൾ വ്യക്തിപരമായ കൂറിന് പ്രാധാന്യം നൽകുന്ന ട്രംപിൻ്റെ ശൈലി ഭരണകൂടത്തിൽ വലിയ അനിശ്ചിതത്വമാണ് സൃഷ്ടിക്കുന്നത്.
Trump fires Attorney General over Epstein files leak, Todd Blanch becomes acting Attorney General, will Tulsi Gabbard also be out?
