വാഷിംഗ്ടൺ: ചൈന പസഫിക് മേഖലയിൽ നീക്കങ്ങൾ ശക്തമാക്കുന്നതിനിടെ, ഏഷ്യൻ-പസഫിക് മേഖലയിൽ നിലയുറപ്പിച്ചിരുന്ന തങ്ങളുടെ അവസാന വിമാനവാഹിനി കപ്പലും പിൻവലിച്ച് അമേരിക്ക. ഇറാനെതിരെയുള്ള സൈനിക നീക്കങ്ങൾ ശക്തമാക്കുന്നതിൻ്റെ ഭാഗമായാണ് യുഎസ് പ്രസിഡൻ്റ് ഡോണൾഡ് ട്രംപിൻ്റെ ഈ തീരുമാനം. ഇതോടെ പസഫിക് മേഖലയിൽ നിലവിൽ അമേരിക്കയ്ക്ക് വിമാനവാഹിനി കപ്പലുകൾ ഇല്ലാത്ത അവസ്ഥയാണുള്ളത്.
ദീർഘകാലമായി മിഡിൽ ഈസ്റ്റിൽ വിന്യസിച്ചിരിക്കുന്ന യുഎസ്എസ് എബ്രഹാം ലിങ്കൺ എന്ന കപ്പലിന് പകരമായി പസഫിക്കിൽ നിന്നുള്ള യുഎസ്എസ് ജോർജ്ജ് വാഷിംഗ്ടൺ എന്ന വിമാനവാഹിനി കപ്പലാണ് അമേരിക്ക മിഡിൽ ഈസ്റ്റിലേക്ക് നിയോഗിക്കുന്നത്. എബ്രഹാം ലിങ്കണിലെ ജീവനക്കാരുടെ മാനസികാരോഗ്യ പ്രശ്നങ്ങളും കപ്പലിലെ സപ്ലൈ തടസ്സങ്ങളും കാരണമാണ് ഈ മാറ്റം. കഴിഞ്ഞ മെയ് മാസത്തിൽ മടങ്ങേണ്ടിയിരുന്ന എബ്രഹാം ലിങ്കണിൻ്റെ കാലാവധി ഇറാൻ വിഷയത്തെത്തുടർന്ന് നീട്ടുകയായിരുന്നു. തുടർച്ചയായി 240 ദിവസത്തിലേറെ കടലിൽ കഴിഞ്ഞ ഈ കപ്പലിലെ അവസ്ഥയെക്കുറിച്ച് ഡെമോക്രാറ്റിക് പാർട്ടി അംഗങ്ങൾ അന്വേഷണം ആവശ്യപ്പെടുന്നുണ്ട്.
അടുത്ത ഏതാനും മാസങ്ങൾക്കുള്ളിൽ മറ്റൊരു കപ്പൽ വിന്യസിച്ചേക്കുമെങ്കിലും, നിലവിലെ ഈ പിന്മാറ്റം പസഫിക് മേഖലയിലെ യുഎസ് സഖ്യകക്ഷികളിൽ വലിയ ആശങ്കയുണ്ടാക്കുന്നുണ്ട്. അമേരിക്കൻ ഭരണകൂടത്തിൻ്റെ ഈ അപ്രതീക്ഷിത നീക്കങ്ങളിൽ ജപ്പാൻ, ഫിലിപ്പീൻസ് തുടങ്ങിയ രാജ്യങ്ങൾ അസ്വസ്ഥരാണ്. അതേസമയം, അമേരിക്കയുടെ ഈ ശ്രദ്ധതിരിയലിലും സഖ്യകക്ഷികളുടെ ആശങ്കയിലും ചൈന അതീവ സന്തുഷ്ടരാണെന്ന് പ്രതിരോധ വിദഗ്ദ്ധർ ചൂണ്ടിക്കാണിക്കുന്നു.
തായ്വാൻ പിടിച്ചെടുക്കാനുള്ള തങ്ങളുടെ ശ്രമങ്ങൾക്ക് അമേരിക്കൻ സാന്നിധ്യം എന്നും ഒരു തടസ്സമായാണ് ചൈന കണ്ടിരുന്നത്. അമേരിക്കൻ കപ്പലിൻ്റെ അഭാവം ചൈന ഉടൻ തന്നെ ഒരു അധിനിവേശത്തിന് ഉപയോഗിക്കില്ലെങ്കിലും, മേഖലയിൽ തങ്ങളാണ് ഇനി ‘വലിയ ശക്തി’ എന്ന് ജപ്പാൻ, ഫിലിപ്പീൻസ്, ഇൻഡോനേഷ്യ തുടങ്ങിയ രാജ്യങ്ങൾക്ക് മുന്നിൽ കാണിക്കാനുള്ള അവസരമായി ചൈന ഇതിനെ മാറ്റും. ഈ ആഴ്ചയിൽ ഇൻഡോനേഷ്യയുമായി ചേർന്ന് ചൈന നാവിക അഭ്യാസം നടത്തിയിരുന്നു. കൂടാതെ തർക്ക പ്രദേശമായ സ്കാർബറോ ഷോളിലും ജപ്പാൻ്റെ ഒക്കിനോട്ടോരി ദ്വീപിന് സമീപവും ചൈനീസ് സൈന്യം ലൈവ്-ഫയർ അഭ്യാസങ്ങൾ നടത്തി ഭീഷണി ഉയർത്തിയിട്ടുണ്ട്.
അതേസമയം, സഖ്യകക്ഷികൾക്ക് ആത്മവിശ്വാസം നൽകാൻ അമേരിക്കൻ സ്പെഷ്യൽ ഓപ്പറേഷൻസ് കമാൻഡ് തലവൻ അഡ്മിറൽ ഫ്രാങ്ക് ബ്രാഡ്ലി മനില സന്ദർശിച്ച് ഫിലിപ്പീൻസിന് പിന്തുണ പ്രഖ്യാപിച്ചു. അദ്ദേഹം ഉടൻ തന്നെ ജപ്പാനും സന്ദർശിക്കും.
തൻ്റെ രണ്ടാം ഔദ്യോഗിക കാലാവധിയിൽ ട്രംപ് വിമാനവാഹിനി കപ്പലുകളെ അമിതമായി ആശ്രയിക്കുന്നു എന്നാണ് വിലയിരുത്തൽ. വെനസ്വേലൻ നേതാവ് നിക്കോളാസ് മഡുറോയെ പിടികൂടാനും ഇറാൻ നീക്കങ്ങൾക്കുമായി 11 മാസം വിന്യസിക്കപ്പെട്ട യുഎസ്എസ് ജെറാൾഡ് ആർ. ഫോർഡ് എന്ന കപ്പൽ ഈയിടെയാണ് മടങ്ങിയത്. വിയറ്റ്നാം യുദ്ധത്തിന് ശേഷമുള്ള ഏറ്റവും ദൈർഘ്യമേറിയ വിന്യാസമായിരുന്നു ഇത്.
എന്നാൽ തുടർച്ചയായ ഇത്തരം ദീർഘകാല മിഷനുകൾ കപ്പലുകളിലെ ജീവനക്കാരെ മാനസികമായും ശാരീരികമായും തളർത്തുന്നതായി വിദഗ്ദ്ധർ മുന്നറിയിപ്പ് നൽകുന്നു. കൂടാതെ, തുടർച്ചയായ ഉപയോഗം കാരണം ഈ കൂറ്റൻ കപ്പലുകൾക്ക് അറ്റകുറ്റപ്പണികൾ നടത്തേണ്ടി വരുന്നത് യുഎസ് കപ്പൽശാലകളിൽ വലിയ തിരക്കിനും ഭാവിയിൽ കപ്പലുകളുടെ ലഭ്യതക്കുറവിനും കാരണമായേക്കാം. കൂടാതെ, ഡ്രോണുകളും ആധുനിക മിസൈലുകളും ഉള്ള ഇന്നത്തെ കാലത്ത് ഇത്തരം വലിയ കപ്പലുകളെക്കാൾ ചെറിയ അന്തർവാഹിനികളും കപ്പലുകളുമാണ് കൂടുതൽ ഫലപ്രദമെന്ന് ചില പ്രതിരോധ വിദഗ്ദ്ധരും യുഎസ് നേവിയിലെ ഉയർന്ന ഉദ്യോഗസ്ഥരും ഇപ്പോൾ അഭിപ്രായപ്പെടുന്നുണ്ട്.
Trump focuses on Iran; America withdraws last aircraft carrier from Asia, China happy!
