വാഷിംഗ്ടൺ: അമേരിക്കൻ സ്വാതന്ത്ര്യ പ്രഖ്യാപനത്തിന്റെ ഇരുനൂറ്റി അൻപതാം വാർഷിക വേളയെ “ചരിത്രത്തിലെ ഏറ്റവും സന്തോഷകരവും മഹത്തരവുമായ നാഴികക്കല്ല്” എന്ന് വിശേഷിപ്പിച്ച് യുഎസ് പ്രസിഡന്റ് ഡോണൾഡ് ട്രംപ്. എന്നാൽ, രാജ്യത്തെ ഒന്നിപ്പിക്കാൻ പ്രസിഡന്റുമാർ പൊതുവെ ഉപയോഗിക്കുന്ന സ്വാതന്ത്ര്യദിന പ്രസംഗത്തെ, ട്രംപ് തന്റെ രാഷ്ട്രീയ നിലപാടുകളും തിരഞ്ഞെടുപ്പ് പ്രചാരണങ്ങളും വച്ചുപുലർത്താനുള്ള വേദിയാക്കി മാറ്റിയതായാണ് ആക്ഷേപം.
കടുത്ത കാറ്റും മഴയും കാരണം നാഷണൽ മാളിൽ നിന്ന് ആളുകളെ രണ്ട് മണിക്കൂറോളം ഒഴിപ്പിച്ചു മാറ്റിയതിന് ശേഷമാണ് വാഷിംഗ്ടണിൽ ട്രംപ് പൊതുവേദിയെ അഭിസംബോധന ചെയ്തത്. രണ്ടാം ലോകമഹായുദ്ധത്തിൽ പങ്കെടുത്തവർ ഉൾപ്പെടെയുള്ള സൈനികരെയും, വിയറ്റ്നാം യുദ്ധത്തിൽ സ്പെഷ്യൽ ഫോഴ്സ് ടീമിനെ നയിച്ച ആദ്യത്തെ കറുത്തവർഗ്ഗക്കാരനായ ഓഫീസറെയും ചടങ്ങിൽ ട്രംപ് ആദരിച്ചു. എബ്രഹാം ലിങ്കന്റെ ഭൗതികശരീരം പൊതിഞ്ഞ പതാകയും, റൈറ്റ് സഹോദരന്മാർ പറത്തിയ വിമാനത്തിലെ പതാകയും ഉൾപ്പെടെയുള്ള ചരിത്ര സ്മാരകങ്ങളുടെ പശ്ചാത്തലത്തിലായിരുന്നു ചടങ്ങ്.
എന്നാൽ, സാധാരണ ഗതിയിൽ ഇത്തരം ദേശീയ ദിനങ്ങളിൽ കക്ഷിരാഷ്ട്രീയത്തിന് അതീതമായി സംസാരിക്കാറുള്ള മുൻഗാമികളിൽ നിന്ന് വ്യത്യസ്തമായി ട്രംപ് കടുത്ത രാഷ്ട്രീയ വിമർശനങ്ങളാണ് നടത്തിയത്. സ്വന്തം പാർട്ടിയിലെ (റിപ്പബ്ലിക്കൻ) ജനപ്രതിനിധികൾക്കിടയിൽ പോലും ഭിന്നതയുള്ള ‘സേവ് അമേരിക്ക ആക്ട്’ എന്ന തിരഞ്ഞെടുപ്പ് ബില്ലിനായി അദ്ദേഹം വീണ്ടും വാദിച്ചു. തോക്ക് കൈവശം വെക്കാനുള്ള അവകാശത്തെ പിന്തുണച്ച ട്രംപ്, വരാനിരിക്കുന്ന നവംബർ മിഡ്ടേം തിരഞ്ഞെടുപ്പിന് മുന്നോടിയായി കമ്മ്യൂണിസത്തിനെതിരെയുള്ള തന്റെ കടുത്ത വിമർശനങ്ങൾ പ്രസംഗത്തിൽ ആവർത്തിക്കുകയും ചെയ്തു.
പൂർണ്ണമായും ട്രംപിന്റെ രാഷ്ട്രീയ താൽപ്പര്യങ്ങൾക്ക് അനുസരിച്ചാണ് ഇത്തവണത്തെ സ്വാതന്ത്ര്യദിനാഘോഷങ്ങൾ സംഘടിപ്പിച്ചത്. അദ്ദേഹത്തിന്റെ തിരഞ്ഞെടുപ്പ് റാലികളിൽ സ്ഥിരമായി പാടാറുള്ള ലീ ഗ്രീൻവുഡ് ഉൾപ്പെടെയുള്ള ഗായകരാണ് ചടങ്ങിൽ ഗാനങ്ങൾ ആലപിച്ചത്. ഒരു പതിറ്റാണ്ട് മുൻപ് യുഎസ് കോൺഗ്രസ് രൂപീകരിച്ച ഉഭയകക്ഷി സമിതിയെ മറികടന്ന്, വൈറ്റ് ഹൗസിനോട് പൂർണ്ണമായും ആഭിമുഖ്യമുള്ള സംഘാടകരാണ് ഇത്തവണത്തെ പരിപാടികൾക്ക് നേതൃത്വം നൽകിയതെന്നും അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
