വാഷിംഗ്ടൺ: നാറ്റോ (NATO) സഖ്യരാജ്യങ്ങളുടെ പ്രതിരോധ ചെലവുകളെ രൂക്ഷമായി വിമർശിച്ച് യുഎസ് പ്രസിഡൻ്റ് ഡോണൾഡ് ട്രംപ് രംഗത്ത്. ട്രൂത്ത് സോഷ്യൽ പ്ലാറ്റ്ഫോമിലൂടെയാണ് സഖ്യകക്ഷികൾക്കെതിരെ ട്രംപ് രംഗത്തെത്തിയത്. അമേരിക്ക മറ്റ് രാജ്യങ്ങളെ സംരക്ഷിക്കാൻ വൻ തുക ചിലവഴിക്കുമ്പോൾ സഖ്യകക്ഷികൾ തുച്ഛമായ വിഹിതം മാത്രമാണ് നൽകുന്നതെന്നും ഇതിലൂടെ അമേരിക്കയ്ക്ക് യാതൊരു പ്രയോജനവുമില്ലെന്നുമാണ് ട്രംപിൻ്റെ വാദം.
അമേരിക്ക നാറ്റോയ്ക്കായി 999 ബില്യൺ ഡോളർ ചിലവഴിക്കുമ്പോൾ യുകെ (90.5 ബില്യൺ), ഫ്രാൻസ് (66.5 ബില്യൺ), ഇറ്റലി (48.8 ബില്യൺ), പോളണ്ട് (44.3 ബില്യൺ) എന്നിങ്ങനെയാണ് മറ്റ് രാജ്യങ്ങളുടെ വിഹിതമെന്നും ജർമ്മനി ഉൾപ്പെടെയുള്ള രാജ്യങ്ങൾ ഇതിലും വളരെ കുറഞ്ഞ തുകയാണ് നൽകുന്നതെന്നും ട്രംപ് ആരോപിച്ചു.
എന്നാൽ, ട്രംപ് ഉന്നയിച്ച കണക്കുകൾ യഥാർത്ഥമാണെങ്കിലും അത് അവതരിപ്പിച്ച രീതി തികച്ചും വഴിതെറ്റിക്കുന്നതാണെന്ന് അന്താരാഷ്ട്ര നിരീക്ഷകർ ചൂണ്ടിക്കാണിക്കുന്നു. ട്രംപ് പരാമർശിച്ച 999 ബില്യൺ ഡോളർ എന്നത് അമേരിക്കയുടെ മൊത്തത്തിലുള്ള ആഗോള പ്രതിരോധ ബജറ്റാണ്. ഇത് നാറ്റോയ്ക്ക് വേണ്ടി മാത്രം ചിലവഴിക്കുന്ന തുകയല്ല. ഈ തുകയുടെ ഭൂരിഭാഗവും ഇൻഡോ-പസഫിക് മേഖലയിലെ പ്രതിരോധം, മിഡിൽ ഈസ്റ്റിലെ സൈനിക നീക്കങ്ങൾ, അമേരിക്കയുടെ സ്വന്തം ആഭ്യന്തര സുരക്ഷ, ആണവായുധ നവീകരണം എന്നിവയ്ക്കാണ് വിനിയോഗിക്കുന്നത്.
The United States spends more money on NATO than any other country, by far, to protect them, without getting any benefit from so doing: U.S. 999 Billion Dollars, United Kingdom, 90.5 Billion Dollars, France, 66.5 Billion Dollars, Italy, 48.8 Billion Dollars, Poland, 44.3 Billion… pic.twitter.com/PWkCAp1Wp4
— Commentary Donald J. Trump Truth Social Posts On X (@TrumpTruthOnX) July 2, 2026
ചരിത്രപരമായ മാറ്റങ്ങളിലേക്ക് നാറ്റോ സഖ്യം
2014-ലെ വെയ്ൽസ് ഉച്ചകോടിയിലെ കരാർ പ്രകാരം ജിഡിപിയുടെ 2 ശതമാനം പ്രതിരോധത്തിനായി മാറ്റിവെക്കണമെന്ന് വ്യവസ്ഥയുണ്ടായിരുന്നു. നാറ്റോയുടെ ചരിത്രത്തിലാദ്യമായി നിലവിലെ 32 അംഗരാജ്യങ്ങളും ഈ ലക്ഷ്യം കൈവരിക്കുകയോ അതിൽക്കൂടുതൽ തുക ചിലവഴിക്കുകയോ ചെയ്യുന്നുണ്ട്. യൂറോപ്യൻ രാജ്യങ്ങളും കാനഡയും തങ്ങളുടെ പ്രതിരോധ ബജറ്റിൽ 20 ശതമാനത്തിൻ്റെ റെക്കോർഡ് വർദ്ധനവാണ് വരുത്തിയത്. പോളണ്ട് തങ്ങളുടെ ജിഡിപിയുടെ 5 ശതമാനത്തോളം പ്രതിരോധത്തിനായി മാറ്റിവെക്കുമ്പോൾ, ജർമ്മനി തങ്ങളുടെ ഭരണഘടനാപരമായ കടമെടുപ്പ് പരിധിപോലും മറികടന്ന് 114 ബില്യൺ ഡോളർ ഈ മേഖലയ്ക്കായി നീക്കിവെച്ചു.
യൂറോപ്യൻ രാജ്യങ്ങൾ തങ്ങളുടെ പ്രതിരോധ വിഹിതം വർദ്ധിപ്പിച്ചതിന് പിന്നിൽ ട്രംപ് മുൻപ് നൽകിയ കടുത്ത രാഷ്ട്രീയ സമ്മർദ്ദവും റഷ്യ-യുക്രെയ്ൻ യുദ്ധം ഉയർത്തുന്ന സുരക്ഷാ ഭീഷണികളും നിർണ്ണായക പങ്കുവഹിച്ചിട്ടുണ്ടെന്നും റിപ്പോർട്ടുകൾ വ്യക്തമാക്കുന്നു.
അമേരിക്കയ്ക്ക് പ്രയോജനമില്ലെന്ന വാദം തെറ്റ്
നാറ്റോ സഖ്യം കൊണ്ട് അമേരിക്കയ്ക്ക് യാതൊരു പ്രയോജനവുമില്ലെന്ന ട്രംപിൻ്റെ വാദം പ്രതിരോധ വിദഗ്ദ്ധർ തള്ളിക്കളയുന്നു. ഇരുവിഭാഗങ്ങളും തമ്മിലുള്ള വ്യാപാര-നിക്ഷേപ ബന്ധങ്ങൾ അമേരിക്കയ്ക്ക് കോടിക്കണക്കിന് ഡോളറിൻ്റെ ലാഭമാണ് നൽകുന്നത്. യൂറോപ്യൻ പ്രതിരോധ വിപണിയിൽ അമേരിക്കൻ കമ്പനികൾക്ക് വൻ അവസരങ്ങളാണുള്ളത്. കൂടാതെ, ആഗോളതലത്തിൽ സൈനിക ശക്തി പ്രകടിപ്പിക്കുന്നതിനും തന്ത്രപരമായ നീക്കങ്ങൾക്കും അമേരിക്കയ്ക്ക് യൂറോപ്പിലെ സൈനിക താവളങ്ങളും പ്രതിരോധ സംവിധാനങ്ങളും അത്യാവശ്യമാണ്. ചുരുക്കത്തിൽ, അമേരിക്ക യൂറോപ്യൻ സുരക്ഷയിലെ ഒരു നിക്ഷേപകനാണെന്നും അല്ലാതെ വെറുമൊരു ദാതാവ് മാത്രമല്ലെന്നുമാണ് വിലയിരുത്തലുകൾ.
Trump’s anti-NATO statement sparks controversy; Did Trump portray the US defense budget as public spending?
