വാഷിംഗ്ടൺ: ഇറാനുമായുള്ള യുദ്ധം ഒരു വർഷം കൂടി നീണ്ടുനിന്നേക്കാമെന്ന് ഐക്യരാഷ്ട്രസഭയിലെ യുഎസ് അംബാസഡർ മൈക്ക് വാൾട്ട്സ്. പ്രസിഡന്‍റ് ഡോണൾഡ് ട്രംപ് ആദ്യം നാലോ അഞ്ചോ ആഴ്ചകൾ മാത്രം നീണ്ടുനിൽക്കുമെന്ന് പ്രഖ്യാപിച്ചിരുന്ന യുദ്ധം ഒരു വർഷം കഴിഞ്ഞും തുടർന്നേക്കാമെന്ന് ഫിനാൻഷ്യൽ ടൈംസിന് നൽകിയ അഭിമുഖത്തിൽ അദ്ദേഹം വ്യക്തമാക്കി.
ഇറാൻ തങ്ങളുടെ കൈവശമുള്ള ഉയർന്ന തോതിൽ സമ്പുഷ്ടീകരിച്ച യുറേനിയം പൂർണ്ണമായി ഒഴിവാക്കുകയും ആഭ്യന്തര സമ്പുഷ്ടീകരണവുമായി ബന്ധപ്പെട്ട് അർത്ഥവത്തായ ഒരു കരാറിന് തയ്യാറാകുകയും ചെയ്യാത്തിടത്തോളം കാലം യു.എസ് ലക്ഷ്യങ്ങൾ കൈവരിച്ചതായി കണക്കാക്കില്ലെന്ന് വാൾട്ട്സ് പറഞ്ഞു.
ഇറാനിയൻ തുറമുഖങ്ങൾക്ക് മേലുള്ള ഉപരോധം ദീർഘകാലത്തേക്ക് തുടരാൻ അമേരിക്കൻ നാവികസേനയ്ക്ക് സാധിക്കുമെന്നും, രാജ്യത്തിന്‍റെ സാമ്പത്തിക സമ്മർദ്ദ ക്യാമ്പയിൻ ഭരണകൂടം കൂടുതൽ ശക്തമാക്കുകയാണെന്നും അദ്ദേഹം കൂട്ടിച്ചേർത്തു. നവംബർ മൂന്നിന് നടക്കുന്ന യുഎസ് ഇടക്കാല തെരഞ്ഞെടുപ്പിന് ശേഷം ഇറാനിൽ പുതിയ വ്യോമാക്രമണങ്ങൾ നടത്തുമെന്ന് പ്രസിഡന്‍റ് ട്രംപും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും ആവർത്തിച്ച് മുന്നറിയിപ്പ് നൽകിയിട്ടുണ്ട്.
