വാഷിംഗ്ടൺ: ഇറാനിൽ നിന്നും റഷ്യയിൽ നിന്നുമുള്ള എണ്ണ ഇറക്കുമതിക്ക് നൽകിയിരുന്ന ഉപരോധ ഇളവുകൾ ഇനി പുതുക്കില്ലെന്ന് യുഎസ് ട്രഷറി സെക്രട്ടറി സ്കോട്ട് ബെസെൻ്റ് പ്രഖ്യാപിച്ചു. വൈറ്റ് ഹൗസിൽ നടന്ന വാർത്താ സമ്മേളനത്തിലാണ് വാഷിംഗ്ടണിൻ്റെ ഊർജ്ജ-ഉപരോധ നയങ്ങളിൽ വന്ന ഈ നിർണ്ണായക മാറ്റം അദ്ദേഹം വ്യക്തമാക്കിയത്.
റഷ്യൻ എണ്ണയുടെയും ഇറാനിയൻ എണ്ണയുടെയും പൊതു ലൈസൻസുകൾ പുതുക്കേണ്ടതില്ലെന്നാണ് ഭരണകൂടത്തിൻ്റെ തീരുമാനം. മാർച്ചിൽ നൽകിയ 30 ദിവസത്തെ താൽക്കാലിക ഇളവുകൾ അവസാനിക്കുന്നതോടെ ഈ രാജ്യങ്ങളിൽ നിന്നുള്ള എണ്ണ വിപണിയിൽ എത്തുന്നത് പൂർണ്ണമായും നിലയ്ക്കും.
കടലിൽ എത്തിയ എണ്ണ വിൽക്കാൻ നൽകിയിരുന്ന ഇളവുകൾ ഇനി ലഭിക്കില്ല. ഇതോടെ ഇറാനിൽ നിന്നുള്ള എണ്ണ കയറ്റുമതി പൂർണ്ണമായും തടസ്സപ്പെടും. അടുത്ത രണ്ട് മൂന്ന് ദിവസത്തിനുള്ളിൽ ഇറാൻ തങ്ങളുടെ എണ്ണ ഉൽപ്പാദനം നിർത്തിവെക്കേണ്ടി വരുമെന്നും ഇത് അവരുടെ എണ്ണക്കിണറുകളെ ദോഷകരമായി ബാധിക്കുമെന്നും ബെസെൻ്റ് മുന്നറിയിപ്പ് നൽകി.
ഇസ്രായേൽ-ഇറാൻ സംഘർഷത്തെത്തുടർന്ന് ഹോർമുസ് കടലിടുക്ക് അടച്ചതും ആഗോള എണ്ണ വിപണിയെ പ്രതിസന്ധിയിലാക്കിയിട്ടുണ്ട്. നേരത്തെ എണ്ണവില ബാരലിന് 100 ഡോളറിന് മുകളിൽ എത്തിയപ്പോഴാണ് വിപണി ശാന്തമാക്കാൻ ട്രഷറി വകുപ്പ് താൽക്കാലിക ഇളവുകൾ അനുവദിച്ചിരുന്നത്. പാവപ്പെട്ട രാജ്യങ്ങളുടെ അഭ്യർത്ഥന മാനിച്ചാണ് റഷ്യൻ എണ്ണയ്ക്ക് നേരത്തെ ചെറിയ ഇളവ് നൽകിയതെന്നും എന്നാൽ ഇനി അത്തരം നീക്കങ്ങൾ ഉണ്ടാകില്ലെന്നും ബെസെൻ്റ് കൂട്ടിച്ചേർത്തു. യുഎസിൻ്റെ ഈ കടുത്ത നിലപാട് ആഗോള എണ്ണവിലയിൽ വീണ്ടും ചലനങ്ങളുണ്ടാക്കുമെന്നാണ് സാമ്പത്തിക വിദഗ്ധരുടെ വിലയിരുത്തൽ.
US ends waivers for Iranian and Russian oil imports; global markets worried
