വാഷിംഗ്ടൺ: ദേശീയ സുരക്ഷാ കാരണങ്ങൾ ചൂണ്ടിക്കാട്ടി ഈ മാസം ആദ്യം ഏർപ്പെടുത്തിയ കയറ്റുമതി വിലക്കിൽ ഇളവ് വരുത്തിക്കൊണ്ട്, പ്രമുഖ ആർട്ടിഫിഷ്യൽ ഇന്റലിജൻസ് കമ്പനിയായ ആന്ത്രോപ്പിക്കിന്റെ ഏറ്റവും കരുത്തുറ്റ ‘മൈഥോസ്’ എഐ മോഡൽ തിരഞ്ഞെടുത്ത കമ്പനികൾക്കും സംഘടനകൾക്കും കൈമാറാൻ യുഎസ് സർക്കാർ അനുമതി നൽകി. സുരക്ഷാ ആശങ്കകൾ പരിഹരിക്കുന്നതിനായി ലൈസൻസ് നിബന്ധനകളിൽ പുതുക്കലുകൾ വരുത്തിയാണ് ഈ അനുമതി.
ജൂൺ ആദ്യവാരമുണ്ടായ കയറ്റുമതി നിരോധനത്തിന് ശേഷം, തങ്ങളുടെ എഐ മോഡലുകളുമായി ബന്ധപ്പെട്ട സുരക്ഷാ അപകടസാധ്യതകൾ പരിഹരിക്കാൻ ആന്ത്രോപ്പിക് യുഎസ് സർക്കാരുമായി ചേർന്ന് സജീവമായി പ്രവർത്തിച്ചിരുന്നു എന്ന് യുഎസ് കൊമേഴ്സ് സെക്രട്ടറി ഹൊവാർഡ് ലൂട്നിക്ക് കമ്പനിക്ക് അയച്ച ഔദ്യോഗിക കത്തിൽ വ്യക്തമാക്കി. ഈ ചർച്ചകളിലെ പുരോഗതി വിലയിരുത്തി, വിശ്വസ്തരായ ചില പങ്കാളികൾക്ക് ‘ക്ലോഡ് മൈഥോസ് 5’ മോഡൽ ലഭ്യമാക്കുന്നതിന് ആവശ്യമായ സുരക്ഷാ മുൻകരുതലുകൾ കമ്പനി ഉറപ്പാക്കിയിട്ടുണ്ടെന്ന് തനിക്ക് ബോധ്യപ്പെട്ടതായും അദ്ദേഹം കത്തിൽ കൂട്ടിച്ചേർത്തു. എന്നാൽ, മൈഥോസിനേക്കാൾ ശേഷി കുറഞ്ഞ ‘ഫേബിൾ’ എന്ന എഐ മോഡലിന്റെ വിലക്ക് നീക്കാൻ യുഎസ് സർക്കാർ ഇതുവരെ അനുമതി നൽകിയിട്ടില്ല.
തങ്ങളുടെ ഏറ്റവും ശക്തമായ സൈബർ സുരക്ഷാ എഐ മോഡലായ ‘മൈഥോസ് 5’ തിരഞ്ഞെടുത്ത ചില സൈബർ പ്രതിരോധ സ്ഥാപനങ്ങൾക്കും അടിസ്ഥാന സൗകര്യ വികസന ദാതാക്കൾക്കും കൈമാറാൻ യുഎസ് സർക്കാരിൽ നിന്ന് അനുമതി ലഭിച്ചതായി ആന്ത്രോപ്പിക് പ്രസ്താവനയിലൂടെ സ്ഥിരീകരിച്ചു. അംഗീകൃത ഗ്രൂപ്പുകൾക്ക് എത്രയും വേഗം ഇതിന്റെ ആക്സസ് പുനഃസ്ഥാപിക്കാനുള്ള നടപടികൾ ആരംഭിച്ചതായും, ‘ഫേബിൾ 5’ മോഡൽ പൊതുജനങ്ങൾക്ക് വീണ്ടും ലഭ്യമാക്കുന്നതിനായി സർക്കാരുമായി ചേർന്നുള്ള ചർച്ചകൾ തുടരുകയാണെന്നും കമ്പനി വ്യക്തമാക്കി.
