ഗ്രാൻഡ് ഐലൻഡ്: ഇറാനുമായുള്ള സംഘർഷത്തെത്തുടർന്ന് രാജ്യത്ത് ഇന്ധനവില കുതിച്ചുയരുന്ന പശ്ചാത്തലത്തിൽ, കാർഷിക-വ്യവസായ ആവശ്യങ്ങൾക്ക് ഉപയോഗിക്കുന്ന നികുതിരഹിത ‘റെഡ് ഡൈ’ ഡീസൽ ഉപയോഗിക്കുന്നതിനുള്ള നിയന്ത്രണങ്ങൾ ലഘൂകരിച്ചുകൊണ്ട് യുഎസ് പ്രസിഡന്‍റ് ഡോണൾഡ് ട്രംപ് എക്സിക്യൂട്ടീവ് ഉത്തരവിൽ ഒപ്പുവെച്ചു. ഈ നടപടി കർഷകർക്ക് ദശലക്ഷക്കണക്കിന് ഡോളറിന്റെ ലാഭമുണ്ടാക്കുമെന്നും വിപണിയിലെ നിത്യോപയോഗ സാധനങ്ങളുടെ വില കുറയ്ക്കാൻ സഹായിക്കുമെന്നും ട്രംപ് വ്യക്തമാക്കി.
നെബ്രാസ്കയിലെ ഗ്രാൻഡ് ഐലൻഡിൽ സംഘടിപ്പിച്ച തെരഞ്ഞെടുപ്പ് പ്രചാരണ റാലിയിൽ ജനങ്ങളെ അഭിസംബോധന ചെയ്തുകൊണ്ടാണ് ട്രംപ് ഉത്തരവിൽ ഒപ്പുവെച്ചത്. പുതിയ ഇളവുകൾ നിലവിൽ വരുന്നതോടെ ഓരോ തവണ ഇന്ധനം നിറയ്ക്കുമ്പോഴും ഒരു സാധാരണ ട്രക്ക് ഡ്രൈവർക്ക് നൂറിലധികം ഡോളർ ലാഭിക്കാൻ സാധിക്കുമെന്ന് ട്രംപ് പറഞ്ഞു. വരുന്ന ഇടക്കാല തെരഞ്ഞെടുപ്പിൽ മത്സരിക്കുന്ന മുൻ ഗവർണറും സെനറ്ററുമായ പീറ്റ് റിക്കറ്റ്സിന്റെയും, രണ്ടാം ഊഴം തേടുന്ന നെബ്രാസ്ക ഗവർണർ ജിം പില്ലന്റെയും വിജയം ഈ തീരുമാനം ഉറപ്പാക്കുമെന്നും റാലിയെ അഭിസംബോധന ചെയ്യവെ ട്രംപ് അവകാശപ്പെട്ടു.
സാധാരണയായി കാർഷിക ഉപകരണങ്ങൾക്കും ഓഫ്-റോഡ് വാഹനങ്ങൾക്കും മാത്രം അനുവദിച്ചിട്ടുള്ള ‘റെഡ് ഡൈ’ ഡീസലിന് ഫെഡറൽ-സംസ്ഥാന എക്സൈസ് നികുതികൾ ബാധകമല്ല. ഇതിന്റെ ഉപയോഗത്തിന്മേലുള്ള നിയന്ത്രണങ്ങൾ താൽക്കാലികമായി നീക്കുന്നത് ഡീസലിനെ ആശ്രയിക്കുന്ന വാണിജ്യ മേഖലകളുടെ ചെലവ് ഭാരം ഗണ്യമായി കുറയ്ക്കാൻ സഹായിക്കും. ഇറാൻ യുദ്ധത്തിന് പിന്നാലെ ഇന്ധനവില കുത്തനെ ഉയർന്നത് വോട്ടർമാർക്കിടയിൽ കടുത്ത അതൃപ്തി ഉണ്ടാക്കുകയും റിപ്പബ്ലിക്കൻ പാർട്ടിക്ക് മേൽ രാഷ്ട്രീയ സമ്മർദ്ദം വർദ്ധിപ്പിക്കുകയും ചെയ്തിരുന്നു. കഴിഞ്ഞ മാസം ഗാലന് 6.53 ഡോളർ എന്ന റെക്കോർഡ് നിലവാരത്തിലേക്ക് ഉയർന്ന ഡീസൽ വിലയിൽ നേരിയ കുറവ് മാത്രമേ പിന്നീട് ഉണ്ടായിട്ടുള്ളൂ. ആഭ്യന്തര വിപണിയിൽ വില നിയന്ത്രിക്കാനായി ഡീസൽ കയറ്റുമതി നിരോധിക്കുന്ന കാര്യം കഴിഞ്ഞ മാസം ട്രംപ് മുന്നോട്ടുവെച്ചിരുന്നു.
