കീവ്: മധ്യ യുക്രെയ്നിലെ ക്രിവി റിയിലുള്ള തിരക്കേറിയ ഷോപ്പിംഗ് മാളിന് നേരെ റഷ്യ നടത്തിയ ക്രൂരമായ ഇരട്ട ഡ്രോൺ ആക്രമണത്തിൽ (‘ഡബിൾ-ടാപ്പ്’ ആക്രമണം) കുറഞ്ഞത് 16 പേർ കൊല്ലപ്പെടുകയും 23 കുട്ടികളടക്കം 130-ലധികം പേർക്ക് പരിക്കേൽക്കുകയും ചെയ്തു. യുക്രേനിയൻ പ്രസിഡന്റ് വോളോഡിമിർ സെലൻസ്കിയുടെ ജന്മനാടായ ക്രിവി റിയിൽ നടന്ന ഈ ദാരുണ സംഭവത്തിന് റഷ്യ തീർച്ചയായും വലിയ വില നൽകേണ്ടിവരുമെന്നും ശക്തമായി തിരിച്ചടിക്കുമെന്നും സെലൻസ്കി മുന്നറിയിപ്പ് നൽകി.
ആദ്യ ആക്രമണം നടന്ന് അരമണിക്കൂറിന് ശേഷം രക്ഷാപ്രവർത്തകരും അഗ്നിശമന സേനയും സ്ഥലത്തെത്തി രക്ഷാപ്രവർത്തനം നടത്തുന്നതിനിടെയാണ് റഷ്യ രണ്ടാമത്തെ ഡ്രോൺ ആക്രമണം നടത്തിയത്. ആദ്യ ആക്രമണത്തിൽ പരിക്കേറ്റവരെ സഹായിക്കാനെത്തിയവരെയും ലക്ഷ്യമിട്ട് നടത്തിയ ഈ നീക്കം തികച്ചും ഭീരുത്വവും ക്രൂരവുമാണെന്ന് സെലൻസ്കി ടെലിഗ്രാമിലൂടെ കുറ്റപ്പെടുത്തി. ആക്രമണത്തിന്റെ ദൃശ്യങ്ങൾ ഡ്രോൺ കെട്ടിടത്തിലേക്ക് പതിച്ച് വൻ തീഗോളമായി മാറുന്നത് വ്യക്തമാക്കുന്നു.
മാളിന്റെ മൂന്നിലൊന്ന് ഭാഗവും തകർന്നുവീഴുകയും വൻ തീപിടുത്തമുണ്ടാകുകയും ചെയ്തു. പരിക്കേറ്റവരിൽ 29 പേരുടെ നില അതീവ ഗുരുതരമായി തുടരുകയാണെന്ന് സിറ്റി ഡിഫൻസ് കൗൺസിൽ തലവൻ ഒലെക്സാണ്ടർ വിൽകുൽ അറിയിച്ചു. അവശിഷ്ടങ്ങൾക്കിടയിൽ ഇനിയും ആളുകൾ കുടുങ്ങിക്കിടക്കാൻ സാധ്യതയുള്ളതിനാൽ തെരച്ചിൽ തുടരുകയാണ്. റഷ്യൻ ബാലിസ്റ്റിക് മിസൈലുകളെ പ്രതിരോധിക്കാൻ ശേഷിയുള്ള യുഎസ് നിർമ്മിത ‘പേട്രിയറ്റ്’ വ്യോമ പ്രതിരോധ മിസൈലുകളുടെ കടുത്ത ക്ഷാമം ഉക്രെയ്ൻ നേരിടുന്നതിനിടെയാണ് റഷ്യ വ്യോമാക്രമണം കടുപ്പിച്ചിരിക്കുന്നത്.
