കേന്ദ്രസര്ക്കാര് ജാതി സെന്സസില് നിന്ന് ഒളിച്ചോടുകയാണെന്ന് കോണ്ഗ്രസ് എംപി രാഹുല് ഗാന്ധി. ജാതി സെന്സസ് വിവരങ്ങള് നരേന്ദ്രമോദി എന്തുകൊണ്ട് പുറത്തുവിടുന്നില്ലെന്ന് രാഹുല് ചോദിച്ചു. ഛത്തിസ്ഗഢില് മുഖ്യമന്ത്രി ഗ്രാമീണ് ആവാസ് ന്യായ് യോജന ഉദ്ഘാടനം ചെയ്യവെയാണ് രാഹുല് ഗാന്ധി പ്രധാനമന്ത്രിയെ രൂക്ഷമായി വിമര്ശിച്ചത്. ഒബിസി വിഷയം വീണ്ടും ആവര്ത്തിച്ച രാഹുല് ഗാന്ധി കേന്ദ്രസര്ക്കാര് ജാതി സെന്സസില് നിന്ന് ഒളിച്ചോടുകയാണെന്ന് വിമര്ശിച്ചു.
കേന്ദ്രസര്ക്കാരില് ഒബിസി വിഭാഗത്തില് മൂന്ന് ഉദ്യോഗസ്ഥര് മാത്രമേയുള്ളൂ. ജാതി സെന്സസ് നടത്തുന്നതിലൂടെ ദളിതര്, ഒബിസി, എസ്സി/എസ്ടി വിഭാഗങ്ങള് എത്ര പേരുണ്ടെന്ന് അറിയാനാകും. എന്നാല് സര്ക്കാര് ജാതി സെന്സസില് നിന്ന് ഒളിച്ചോടുകയാണ്. കോണ്ഗ്രസ് സര്ക്കാര് ജാതി സെന്സസ് നടത്തുമെന്ന് താന് വാഗ്ദാനം ചെയ്യുന്നുവെന്നും രാഹുല് ഗാന്ധി പറഞ്ഞു.
കഴിഞ്ഞ ദിവസം തെരഞ്ഞെടുപ്പിന് മുന്നോടിയായി മധ്യപ്രദേശിലെ റാലിയെ അഭിസംബോധന ചെയ്ത് സംസാരിക്കവെ കോണ്ഗ്രസ് തുരുമ്പിച്ച പാര്ട്ടിയാണെന്ന് നരേന്ദ്രമോദി പരിഹസിച്ചിരുന്നു. ഇതിനു മറുപടിയായാണ് നരേന്ദ്രമോദിയെ വിമര്ശിച്ചുകൊണ്ടുള്ള രാഹുല് ഗാന്ധിയുടെ പ്രതികരണം. മോദിയുടെ കൈവശം ഒരു റിമോട്ട് കണ്ട്രോള് ഉണ്ട്. പക്ഷേ അദ്ദേഹമത് രഹസ്യമായി വച്ചിരിക്കുകയാണ്. ഞങ്ങളത് പരസ്യമായി തുറന്നുവിട്ടു. എന്നാല് ബിജെപി അതിനനുവദിക്കുന്നില്ല. മുംബൈ എയര്പോര്ട്ട് അടക്കം അദാനിക്ക് വിട്ടുകൊടുത്ത് എല്ലാ പൊതുമേഖലാ സ്ഥാപനങ്ങളും ബിജെപി സ്വകാര്യവത്ക്കരിക്കുകയാണെന്നും രാഹുല് വിമര്ശിച്ചു.
