തിരുവനന്തപുരം: സംസ്ഥാന സര്ക്കാരിന്റെ രാജാ രവിവര്മ്മ പുരസ്കാരം പ്രശസ്ത ചിത്രകാരന് സുരേന്ദ്രന് നായര്ക്ക്. ചിത്രകലാ രംഗത്ത് സമഗ്രമായ സംഭാവനകള് നല്കിയ പ്രതിഭകള്ക്ക് കേരള സര്ക്കാര് സാംസ്കാരിക വകുപ്പ് നല്കുന്ന പരമോന്നത അംഗീകാരമാണ് രാജാ രവിവര്മ്മ പുരസ്കാരം. 2022 വര്ഷത്തെ പുരസ്കാരമാണ് ഇപ്പോള് പ്രഖ്യാപിച്ചത്.
മൂന്നു ലക്ഷം രൂപയും പ്രശസ്തി പത്രവും ഫലകവും അടങ്ങുന്നതാണ് പുരസ്കാരം. പുരസ്കാരം വിതരണ തീയ്യതി പിന്നീട് പ്രഖ്യാപിക്കും. ചിത്രകലയുടെ വിവിധ മേഖലകളില് നല്കിയ നിസ്തുലമായ സംഭാവനകള് പരിഗണിച്ചാണ് സുരേന്ദ്രന് നായരെ പുരസ്കാരത്തിന് തെരഞ്ഞെടുത്തത്. പ്രശസ്ത എഴുത്തുകാരനും ആര്ട്ട് ക്യുറേറ്ററുമായ സദാനന്ദ മേനോന് ചെയര്മാനും ചിത്രകലാകാരായ നീലിമ ഷെയ്ഖ്, ഷിബു നടേശന്, കെഎം മധുസൂദനന്, കേരള ലളിത കലാ അക്കാദമി സെക്രട്ടറി എന് ബാലമുരളീകൃഷ്ണന് (മെമ്പര് സെക്രട്ടറി) എന്നിവര് അംഗങ്ങളുമായുള്ള പുരസ്കാര നിര്ണയ സമിതിയാണ് പുരസ്കാര ജേതാവിനെ തെരഞ്ഞെടുത്തത്.
ദൃശ്യകലയിലെ മികവ്, സ്ഥിരതയാര്ന്ന സാങ്കേതിക മികവ്, ശ്രദ്ധേയമായ മാനവികത, പ്രതീകാത്മക ഭാഷയുടെ ശക്തമായ പ്രയോഗം എന്നിവ പരിഗണിച്ചാണ് പുരസ്കാരമെന്ന് ജൂറി അഭിപ്രായപ്പെട്ടു. സമകാലികര്ക്കിടയില് വളരെയധികം സ്വാധീനം ചെലുത്താനും ദേശീയമായും അന്തര്ദ്ദേശീയമായും അംഗീകരിക്കപ്പെടാനും അദ്ദേഹത്തിന്റെ കലയ്ക്ക് കഴിഞ്ഞുവെന്ന് ജൂറി വിലയിരുത്തി.
