പ്രധാനമന്ത്രി നരേന്ദ്ര മോദി രാജ്യത്തെ ഇന്ന് വൈകിട്ട് അഞ്ചു മണിക്ക് അഭിസംബോധന ചെയ്യും. പ്രധാനമന്ത്രി ഏത് വിഷയവുമായി ബന്ധപ്പെട്ടാണ് രാജ്യത്തെ അഭിസംബോധന ചെയ്യുകയെന്ന് ഔദ്യോഗികമായി പുറത്ത് വന്നിട്ടില്ല. റഷ്യയിൽ നിന്ന് എണ്ണ വാങ്ങുന്നതിന്റെ പേരിൽ യുഎസ് അധിക തീരുവ ചുമത്തിയതും എച്ച്-1ബി വിസയ്ക്കുള്ള വാർഷിക ഫീസ് നിരക്ക് ഒരു ലക്ഷം ഡോളറാക്കി ഉയർത്തിയ വിഷയങ്ങൾ നിലനിൽക്കുന്നതിനിടെയാണ് പ്രധാനമന്ത്രി രാജ്യത്തെ അഭിസംബോധന ചെയ്യുന്നത്. കൂടാതെ ജിഎസ്ടി ഇളവുകൾ നാളെ മുതൽ നടപ്പാക്കാനിരിക്കെയാണ് പ്രധാനമന്ത്രിയുടെ അഭിസംബോധന. ജനങ്ങൾക്ക് ദീപാവലി സമ്മാനമായി ജിഎസ്ടിയിൽ ഇളവുകൾ കൊണ്ടുവരുമെന്ന് പ്രധാനമന്ത്രി നേരത്തെ വ്യക്തമാക്കിയിരുന്നു.
