വാഷിംഗ്ടൺ: തൻ്റെ ഭരണത്തിൽ ഏഴുമാസത്തിനുള്ളിൽ ഏഴ് യുദ്ധങ്ങൾ അവസാനിപ്പിച്ചുവെന്ന വലിയ അവകാശവാദവുമായി പ്രസിഡൻ്റ് ഡോണൾഡ് ട്രംപ്. “ഞങ്ങൾ ഏഴ് യുദ്ധങ്ങൾ നിർത്തി, കഴിഞ്ഞ ഏഴ് മാസത്തിനിടെ മറ്റാരും ഇത് ചെയ്തിട്ടില്ല,” റിപ്പബ്ലിക്കൻ നിയമനിർമ്മാതാക്കൾക്കായി വൈറ്റ് ഹൗസിൽ സംഘടിപ്പിച്ച അത്താഴവിരുന്നിൽ ട്രംപ് പറഞ്ഞു. വിദേശനയത്തിലെ തൻ്റെ നേട്ടങ്ങൾ എണ്ണിപ്പറഞ്ഞ ട്രംപ്, അതിനെ ആഭ്യന്തര സുരക്ഷാ അജണ്ടയുമായി ബന്ധിപ്പിക്കാൻ ശ്രമിച്ചു.
അന്താരാഷ്ട്ര വിഷയങ്ങളിലെ നയതന്ത്ര വിജയങ്ങൾ ചൂണ്ടിക്കാട്ടിയതിനൊപ്പം, ആഭ്യന്തര വിഷയങ്ങളിലെ വിവാദപരമായ തീരുമാനങ്ങളിലും ട്രംപ് ഉറച്ചുനിന്നു. കുറ്റകൃത്യങ്ങൾ വർധിച്ചുവരുന്ന പോർട്ട്ലാൻഡ്, ചിക്കാഗോ, ന്യൂ ഓർലിയൻസ് തുടങ്ങിയ നഗരങ്ങളിൽ ഫെഡറൽ സേനയെ വിന്യസിക്കുമെന്നും അദ്ദേഹം പ്രഖ്യാപിച്ചു. “വാഷിംഗ്ടൺ ഡിസി രാജ്യത്തെ ഏറ്റവും അപകടകരമായ നഗരമായിരുന്നു. എന്നാൽ 12 ദിവസത്തിന് ശേഷം അത് സുരക്ഷിത നഗരമായി അറിയപ്പെട്ടു,” ട്രംപ് പറഞ്ഞു.
കഴിഞ്ഞ ജൂണിൽ നഗരത്തിലെ മെട്രോപൊളിറ്റൻ പോലീസിനെ ഫെഡറൽ നിയന്ത്രണത്തിലാക്കാനും നാഷണൽ ഗാർഡിനെ വിന്യസിക്കാനും ട്രംപ് തീരുമാനിച്ചിരുന്നു. ഈ നീക്കം നഗരത്തിലെ ഡെമോക്രാറ്റിക് നേതൃത്വവുമായി നിയമയുദ്ധത്തിന് കാരണമായിരുന്നു.
അതേസമയം, കുടിയേറ്റ, മയക്കുമരുന്ന് കേസുകളിൽ നാഷണൽ ഗാർഡ് സൈനികരെ ഉപയോഗിക്കുന്നത് നിയമവിരുദ്ധമാണെന്ന് കാലിഫോർണിയയിലെ ഫെഡറൽ ജഡ്ജി ഈ ആഴ്ച വിധിച്ചിരുന്നു. എന്നിരുന്നാലും, നിയമവാഴ്ച പുനഃസ്ഥാപിക്കാനുള്ള ദേശീയ കാമ്പെയ്നിൽ നിന്ന് തൻ്റെ ഭരണകൂടം പിന്നോട്ട് പോകില്ലെന്ന് വെള്ളിയാഴ്ച ട്രംപ് വ്യക്തമാക്കി. ട്രംപിൻ്റെ ഈ അവകാശവാദങ്ങൾ രാഷ്ട്രീയ രംഗത്ത് വലിയ ചർച്ചകൾക്ക് വഴിതുറന്നിരിക്കുകയാണ്.
