യുക്രൈൻ-റഷ്യ യുദ്ധത്തിൽ പത്ത് ഇന്ത്യൻ പൗരന്മാർ കൊല്ലപ്പെട്ടതായി കേന്ദ്ര സർക്കാർ സുപ്രീം കോടതിയെ ഔദ്യോഗികമായി അറിയിച്ചു. റഷ്യൻ സേനയുടെ ഭാഗമായി യുദ്ധത്തിൽ പങ്കെടുത്തവരാണ് കൊല്ലപ്പെട്ടതെന്ന് കോടതിയിൽ സമർപ്പിച്ച സത്യവാങ്മൂലത്തിൽ കേന്ദ്രം വ്യക്തമാക്കി. റഷ്യൻ സൈന്യത്തിൽ കുടുങ്ങിക്കിടക്കുന്ന തങ്ങളുടെ ബന്ധുക്കളെ സുരക്ഷിതമായി നാട്ടിലെത്തിക്കണമെന്ന് ആവശ്യപ്പെട്ട് വിവിധ കുടുംബങ്ങൾ നൽകിയ ഹർജി പരിഗണിക്കവെയാണ് സർക്കാർ ഈ ഞെട്ടിക്കുന്ന കണക്കുകൾ പുറത്തുവിട്ടത്.
കൊല്ലപ്പെട്ടവരെല്ലാം സ്വന്തം ഇഷ്ടപ്രകാരം റഷ്യൻ സേനയുമായി കരാറിൽ ഏർപ്പെട്ടവരാണെന്നാണ് കേന്ദ്രത്തിന്റെ വിശദീകരണം. തൊഴിൽ ആവശ്യങ്ങൾക്കായി റഷ്യയിലെത്തുകയും പിന്നീട് സൈന്യത്തിൽ സഹായികളായും മറ്റും കരാർ അടിസ്ഥാനത്തിൽ ചേരുകയുമായിരുന്നു ഇവർ. യുദ്ധമേഖലയിൽ ഇപ്പോഴും തുടരുന്ന ബാക്കിയുള്ള ഇന്ത്യക്കാരെ എത്രയും വേഗം നാട്ടിലെത്തിക്കാനുള്ള നയതന്ത്ര ചർച്ചകൾ റഷ്യയുമായി തുടരുകയാണെന്നും സർക്കാർ കോടതിയെ ബോധിപ്പിച്ചു.
നാല് വർഷം പിന്നിട്ടിട്ടും റഷ്യ-യുക്രൈൻ യുദ്ധം സമാധാനമില്ലാതെ തുടരുന്ന സാഹചര്യത്തിലാണ് പുതിയ വിവരങ്ങൾ പുറത്തുവരുന്നത്. യുഎസ് പ്രസിഡന്റ് ഡോണൾഡ് ട്രംപിന്റെ നേതൃത്വത്തിലടക്കം മധ്യസ്ഥ ചർച്ചകൾ നടന്നെങ്കിലും ഇരുപക്ഷവും പിൻവാങ്ങാൻ തയ്യാറായിട്ടില്ല. കഴിഞ്ഞ ആഴ്ച ഓർത്തഡോക്സ് ഈസ്റ്ററിനോടനുബന്ധിച്ച് പ്രഖ്യാപിച്ച വെടിനിർത്തൽ ലംഘിച്ചുകൊണ്ട് റഷ്യ നടത്തിയ മിസൈൽ ആക്രമണത്തിൽ കുട്ടികളടക്കം നിരവധി പേർ കൊല്ലപ്പെട്ടിരുന്നു. ഇതിന് പിന്നാലെ യുക്രൈനും ശക്തമായ തിരിച്ചടി നൽകിയതോടെ മേഖലയിൽ യുദ്ധം കൂടുതൽ രൂക്ഷമായിരിക്കുകയാണ്.
10 Indians Killed in Ukraine-Russia Conflict; Centre Tells Supreme Court They Joined Russian Army Voluntarily
