ന്യൂഡൽഹി: ഉത്തർപ്രദേശിലെ അയോധ്യ രാമക്ഷേത്രത്തിലേക്ക് ലഭിച്ച സംഭാവനകളിൽ വൻതോതിൽ തട്ടിപ്പും മോഷ്ടിക്കലും നടന്നെന്ന ആരോപണത്തിൽ സിബിഐ അന്വേഷണം ആവശ്യപ്പെട്ടുള്ള ഹർജി അടിയന്തരമായി പരിഗണിക്കാൻ സുപ്രീം കോടതി വിസമ്മതിച്ചു. വിഷയത്തിൽ ഇത്രയധികം തിടുക്കം കൂട്ടുന്നത് എന്തിനാണെന്ന് ചോദ്യം ചെയ്ത കോടതി, “ആകാശം ഇടിഞ്ഞുവീഴാൻ പോകുന്നില്ലല്ലോ… എന്താണ് ഇത്ര അടിയന്തര സാഹചര്യം?” എന്ന് വാക്കാൽ പരാമർശിച്ചു.
ജസ്റ്റിസ് എം.എം. സുന്ദരേഷ്, ജസ്റ്റിസ് ഷീൽ നാഗു എന്നിവരടങ്ങിയ സുപ്രീം കോടതി ബെഞ്ചാണ് ഹർജി അടിയന്തരമായി ലിസ്റ്റ് ചെയ്യണമെന്ന ആവശ്യം നിരസിച്ചത്. കോടതിയുടെ വേനൽക്കാല അവധിക്ക് ശേഷം (ജൂലൈ രണ്ടാം വാരത്തോടെ) കേസ് കൃത്യമായി വാദം കേൾക്കുന്നതിനായി ലിസ്റ്റ് ചെയ്യുമെന്നും കോടതി വ്യക്തമാക്കി.
ഉത്തർപ്രദേശ് പൊലീസ് നടത്തുന്ന നിലവിലെ അന്വേഷണത്തിൽ വിശ്വാസമില്ലെന്നും, തെളിവുകൾ നശിപ്പിക്കപ്പെടാൻ സാധ്യതയുണ്ടെന്നും ചൂണ്ടിക്കാട്ടിയാണ് രണ്ട് അഭിഭാഷകർ സുപ്രീം കോടതിയെ സമീപിച്ചത്. എന്നാൽ അടിയന്തര ഇടപെടലിൻ്റെ ആവശ്യമില്ലെന്ന് കോടതി നിരീക്ഷിക്കുകയായിരുന്നു.
രാമക്ഷേത്ര സംഭാവനകളുമായി ബന്ധപ്പെട്ട വിവാദം നിലവിൽ വലിയ രാഷ്ട്രീയ-സാമൂഹിക പ്രതിഷേധങ്ങൾക്ക് വഴിതുറന്നിരിക്കുകയാണ്. വൻ സാമ്പത്തിക ക്രമക്കേട് ആരോപണങ്ങൾ ഉയർന്നതിന് പിന്നാലെ ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റ് ജനറൽ സെക്രട്ടറി ചമ്പത് റായ്, ട്രസ്റ്റ് അംഗം അനിൽ മിശ്ര എന്നിവർ ധാർമ്മിക ഉത്തരവാദിത്തം ഏറ്റെടുത്ത് സ്ഥാനങ്ങൾ രാജിവെച്ചിരുന്നു. കേസുമായി ബന്ധപ്പെട്ട് ചമ്പത് റായുടെ സഹായി ഉൾപ്പെടെ എട്ട് പേരെ പൊലീസ് ഇതിനകം അറസ്റ്റ് ചെയ്യുകയും പ്രതികളുടെ വീടുകളിൽ നിന്ന് ലക്ഷക്കണക്കിന് രൂപ കണ്ടുകെട്ടുകയും ചെയ്തിട്ടുണ്ട്. അതേസമയം, ഭക്തർ സമർപ്പിച്ച വെള്ളി ഇഷ്ടികകളും ആഭരണങ്ങളും ഉൾപ്പെടെയുള്ള എല്ലാ വിലപിടിപ്പുള്ള വസ്തുക്കളും സുരക്ഷിതമാണെന്നും കൃത്യമായ രേഖകൾ ഉണ്ടെന്നും ട്രസ്റ്റ് അറിയിച്ചു. ജൂലൈ 11-ന് നടക്കുന്ന അടുത്ത ട്രസ്റ്റ് യോഗത്തിൽ രാജിക്കാര്യങ്ങളിൽ അന്തിമ തീരുമാനമുണ്ടാകും.
Ayodhya Ram temple donation scam case: Supreme Court refuses to hear the matter urgently
