മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഇന്ത്യാ സഖ്യം നടത്താനിരുന്ന ജനകീയ കുറ്റവിചാരണ ഡൽഹിയിലെ പ്രതികൂല കാലാവസ്ഥ മൂലം നാളത്തേക്ക് മാറ്റിവെച്ചു. കനത്ത മഴയെത്തുടർന്ന് മുതിർന്ന നേതാക്കൾക്ക് ദീർഘനേരം വേദിയിൽ തുടരാനുള്ള ബുദ്ധിമുട്ട് കണക്കിലെടുത്താണ് തീരുമാനമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി അറിയിച്ചു. പുതിയ തീരുമാനപ്രകാരം പരിപാടി നാളെ ഉച്ചക്ക് ശേഷം രണ്ടര മണിക്ക് സംഘടിപ്പിക്കും.
കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ ഡൽഹിയിലെ വസതിയിലാണ് പ്രതീകാത്മക പരസ്യ വിചാരണ നടക്കുക. മുൻ ലോക്സഭാ സ്പീക്കർ മീരാ കുമാർ പ്രതീകാത്മക സ്പീക്കറായി അധ്യക്ഷത വഹിക്കുന്ന ചടങ്ങിൽ ഗ്യാനേഷ് കുമാറിനെ പുറത്താക്കണമെന്ന് ആവശ്യപ്പെടുന്ന പ്രമേയം മല്ലികാർജുൻ ഖർഗെ അവതരിപ്പിക്കും. സഖ്യത്തിലെ വിവിധ എം.പിമാരും പ്രമുഖ നേതാക്കളും പൗരാവകാശ പ്രവർത്തകരും ചടങ്ങിൽ സംസാരിക്കും. വോട്ടർ പട്ടിക പരിഷ്കരണത്തിൽ വോട്ടവകാശം നഷ്ടപ്പെട്ടവരുടെ അനുഭവങ്ങളും വേദിയിൽ ഉന്നയിക്കും. രാഹുൽ ഗാന്ധിയുടെ മറുപടി പ്രസംഗത്തിന് ശേഷം ഗ്യാനേഷ് കുമാറിനെ പുറത്താക്കിക്കൊണ്ടുള്ള പ്രതീകാത്മക വിധി മീരാ കുമാർ പ്രഖ്യാപിക്കും.
അതേസമയം, പ്രക്ഷോഭത്തിന്റെ അടുത്ത ഘട്ടമായി നവംബർ ഒന്നിന് രാംലീല മൈതാനത്ത് നടക്കുന്ന മഹാറാലിയിൽ വലിയ ജനസമൂഹം അണിനിരക്കുമെന്ന് രാഹുൽ ഗാന്ധി വ്യക്തമാക്കി. ജനാധിപത്യ സംരക്ഷണത്തിനായുള്ള പോരാട്ടത്തിൽ രാഷ്ട്രീയ ഭേദമന്യേ മുഴുവൻ ജനങ്ങളും പങ്കാളികളാകണമെന്ന് അദ്ദേഹം ആഹ്വാനം ചെയ്തു. അന്ന് നടക്കുന്ന ജനപങ്കാളിത്തം എത്രത്തോളമെന്ന് രാജ്യം കാണുമെന്നും അദ്ദേഹം കൂട്ടിച്ചേർത്തു.
എന്നാൽ, ദീപാവലി സീസൺ പ്രമാണിച്ച് കച്ചവടത്തെ പ്രതികൂലമായി ബാധിക്കുമെന്നതിനാൽ നവംബർ ഒന്നിലെ മഹാറാലി നീട്ടിവെക്കണമെന്ന ആവശ്യത്തിൽ ഡൽഹിയിലെ വ്യാപാരികൾ ഉറച്ചുനിൽക്കുകയാണ്. മമത ബാനർജി, അഖിലേഷ് യാദവ് തുടങ്ങിയ ഇന്ത്യാ സഖ്യ നേതാക്കൾക്ക് വ്യാപാരികളുടെ കൂട്ടായ്മ ഇത് സംബന്ധിച്ച് കത്തയച്ചിട്ടുണ്ട്. നേരത്തെ രാഹുൽ ഗാന്ധിക്ക് കത്ത് നൽകിയിരുന്നെങ്കിലും റാലി മാറ്റിവെക്കാനാകില്ലെന്ന നിലപാടിലായിരുന്നു സഖ്യ നേതൃത്വം.
CEC Gyanesh Kumar’s Symbolic Trial Deferred Due to Bad Weather: Rahul Gandhi Calls for Mass Support in Sunday Rally
