തിരുവനന്തപുരം: എഫ്.സി.ആര്.എ ചട്ടം കേന്ദ്ര സര്ക്കാര് ഏകപക്ഷീയമായി ഭേദഗതി ചെയ്തത് പ്രതിഷേധാര്ഹമാണെന്ന് മുഖ്യമന്ത്രി വി.ഡി. സതീശൻ. പുതിയ ഭേദഗതി രാജ്യത്ത് സന്നദ്ധസംഘടനകള്ക്ക് പ്രവര്ത്തിക്കാനാകാത്ത സാഹചര്യമാണ് സൃഷ്ടിക്കപ്പെട്ടിരിക്കുന്നതെന്നും സംഘപരിവാര് സംഘടനകള് രാജ്യവ്യാപകമായി നടത്തുന്ന ന്യൂനപക്ഷ വേട്ട ശക്തമാക്കുന്നതിന്റെ ഭാഗമാണോ എഫ്.സി.ആര്.എ ചട്ടഭേദഗതിയെന്ന് സംശയിക്കേണ്ടിയിരിക്കുന്നുവെന്നും മുഖ്യമന്ത്രി വാർത്താകുറിപ്പിൽ പറഞ്ഞു.
ഉത്തരേന്ത്യയിലും വടക്കു കിഴക്കന് സംസ്ഥാനങ്ങളിലും ആദിവാസി മേഖലകളിലെ വിദ്യാഭ്യാസ സാമൂഹിക പ്രവര്ത്തനങ്ങള് നടത്തുന്ന സന്നദ്ധ സംഘടനകളെ ഇല്ലാതാക്കുന്നതാണ് ചട്ടം ഭേദഗതി. ഭരണകൂടത്തിന് സംഘപരിവാര് സംഘടനകളുടെ ആവശ്യപ്രകാരം രാജ്യത്തെ ഏത് സംഘടനകളുടെയും പ്രവര്ത്തനം നിരോധിക്കാനാകും. ന്യൂനപക്ഷ വിഭാഗങ്ങളെ ലക്ഷ്യം വച്ചുള്ള ചട്ടഭേദഗതിയില് നിന്നും അടിയന്തരമായി പിന്മാറാന് കേന്ദ്ര സര്ക്കാര് തയാറാകണമെന്നും വിഷയത്തില് ബി.ജെ.പി സംസ്ഥാന നേതൃത്വവും കേരളത്തില് നിന്നുള്ള കേന്ദ്ര മന്ത്രിമാരും അഭിപ്രായം വ്യക്തമാക്കണമെന്നും മുഖ്യമന്ത്രി കൂട്ടിച്ചേർത്തു.
Chief Minister VD Satheesan demands immediate withdrawal of FCRA amendment
